នៅថ្ងៃទី១៤ ខែតុលា ឆ្នាំ២០២៥នេះ ក្បាលដីប្រជាពលរដ្ឋចំនួន ៨ ៣៥៣ ក្បាលដី ក្នុងភូមិភូមិឈូក ភូមិបុស្ស ភូមិបុស្សធំ ភូមិដំរីឆ្លង ភូមិសំបាត ភូមិសំរោង ភូមិរំដេង និងភូមិជុំ ឃុំខ្នារពោធិ៍ ស្រុកសូទ្រនិគម ខេត្តសៀមរាប ត្រូវបានមន្ត្រីជំនាញសហការជាមួយអាជ្ញាធរមូលដ្ឋាន បិទផ្សាយជាសាធារណៈ ដើម្បីឱ្យបងប្អូនជាម្ចាស់កម្មសិទ្ធធ្វើការពិនិត្យផ្ទៀងផ្ទាត់ និងស្នើសុំកែតម្រូវ ដែលការបិទផ្សាយនេះមានរយៈពេល១៥ថ្ងៃ ចាប់ពីថ្ងៃទី១៤-២៨ ខែតុលា នៅក្នុងវត្ដឈូកត្រសាលរស្មីមានជ័យ ហៅវត្ដឈូក។
លោក ស៊ុន សុជាតិ អនុប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត បានឱ្យដឹងថា ក្រោយពីបញ្ចប់ការបិទផ្សាយនេះ គណៈកម្មការរដ្ឋបាល នឹងលើកសំណើជូនទៅឯកឧត្តមអភិបាលខេត្ត ដើម្បីសម្រេចចេញវិញ្ញាបនបត្រ សម្គាល់ម្ចាស់អចលនវត្ថុ ជូនប្រជាពលរដ្ឋដែលជាម្ចាស់ដី និងអ្នកកាន់កាប់ដី ដែលបានបំពេញលក្ខខណ្ឌគ្រប់គ្រាន់ តាមនីតិវិធីច្បាប់ និងជាក្បាលដីមិនមានទំនាស់។
លោកអនុប្រធានមន្ទីរ បានអំពាវនាវដល់បងប្អូនជាម្ចាស់ ដីនិងអ្នកកាន់កាប់ដី រួមនឹងអ្នកជាប់ពាក់ព័ន្ធ សូមពិនិត្យផ្ទៀងផ្ទាត់មើលទិន្នន័យឱ្យបានគ្រប់ៗគ្នា ជាពិសេសផ្ទៀងផ្ទាត់នៅលើឈ្មោះម្ចាស់ដី សាវតា ទំហំដី ប្រភេទទ្រព្យ ជាពិសេសប្លង់សុរិយោដី និងរូបរាងដី ព្រោះនេះជាឱកាសចុងក្រោយដែលបងប្អូនមានសិទ្ធិធ្វើការកែតម្រូវ ឬជំទាស់តវ៉ា។ ប្រសិនបើក្នុងករណីពិនិត្យទៅឃើញថាមានកំហុសឆ្គង សូមបងប្អូនស្នើមកគណៈកម្មការរដ្ឋបាលពិនិត្យ និងកែតម្រូវជូន ព្រោះវាមានសារៈសំខាន់ណាស់ដើម្បីធានាបានភាពសុក្រឹត ត្រឹមត្រូវ ក្នុងការចេញវិញ្ញាបនបត្រសម្គាល់ម្ចាស់អចលនវត្ថុ។
លោក គិម វណ្ណៈ អភិបាលស្រុក មានប្រសាសន៍ថា ការចុះបញ្ជីដីធ្លីមានលក្ខណៈជាប្រព័ន្ធ ពិតជាអនុវត្តទៅតាមនីតិវិធី និងបច្ចេកវិទ្យាទំនើប មានតម្លាភាព និងការទទួលខុសត្រូវ ដែលប្រទេសជឿនលឿនលើពិភពលោកកំពុងអនុវត្ត ហើយមានប្រសិទ្ធភាពខ្ពស់ ក្នុងការគ្រប់គ្រងដីធ្លី។ ការចុះបញ្ជីដីធ្លី គឺជាគោលការណ៍រួមមួយ ជួយកាត់បន្ថយទំនាស់ដីធ្លី ធានាសុវត្ថិភាព ក្នុងការកាន់កាប់ដីធ្លីរបស់ប្រជាពលរដ្ឋ ទទួលបាននូវសិទ្ធិស្របច្បាប់ ក្លាយជាម្ចាស់ដីពិតប្រាកដ ដែលត្រូវបានការពារដោយច្បាប់ និងធានាដោយរដ្ឋ ដែលអាចធ្វើការបង្កបង្កើនផល ឬប្រកបមុខរបរផ្សេងៗលើដីធ្លីរបស់ខ្លួនដោយគ្មានការព្រួយបារម្ភ និងអាចប្រើប្រាស់វិញ្ញាបនបត្រសម្គាល់ម្ចាស់អចលនវត្ថុ ដើម្បីផលប្រយោជន៍ផ្សេងៗទៀតផងដែរ៕
អត្ថបទ និងរូបភាព៖ លោក អោត រត់
កែសម្រួល៖ លោក អ៊ុន ណារាជ្យ
