នៅព្រឹកថ្ងៃទី១៥ ខែតុលា ឆ្នាំ២០២៥ រដ្ឋបាលខេត្តសៀមរាប បានប្រារព្ធពិធីគោរពព្រះវិញ្ញាណក្ខន្ធ ព្រះករុណា ព្រះបាទសម្ដេចព្រះនរោត្តម សីហនុ ព្រះវររាជបិតាឯករាជ្យ បូរណភាពទឹកដី និងឯកភាពជាតិខ្មែរ ព្រះបរមរតនកោដ្ឋ គម្រប់ខួប ១៣ឆ្នាំ (១៥ តុលា ២០១២ – ១៥ តុលា ២០២៥)។ ពិធីនេះត្រូវបានធ្វើឡើងនៅទីតាំងព្រះរាជដំណាក់ក្នុងក្រុងសៀមរាប។
ពិធីដ៏មានសារៈសំខាន់នេះ ប្រព្រឹត្តទៅក្រោមវត្តមានដ៏ខ្ពង់ខ្ពស់របស់ ឯកឧត្តម តោ គឹមស៊ាន សមាជិកក្រុមប្រឹក្សាខេត្ត និង ឯកឧត្តម ប្រាក់ សោភ័ណ អភិបាលខេត្តសៀមរាប ព្រមទាំងមានការចូលរួមពី ឯកឧត្តម លោកជំទាវសមាជិកក្រុមប្រឹក្សាខេត្ត លោក លោកស្រីអភិបាលរងខេត្ត មេបញ្ជាការ បញ្ជាការរងកងកម្លាំងប្រដាប់អាវុធ ថ្នាក់ដឹកនាំមន្ទីរ-អង្គភាព និងមន្ត្រីរាជការជាច្រើនរូប។
វត្តមានរបស់អ្នកចូលរួមទាំងអស់ គឺដើម្បីរំឭកនឹកដល់ព្រះគុណូបការៈដ៏ថ្លៃថ្លារបស់ព្រះអង្គចំពោះជាតិមាតុភូមិ និងសម្តែងនូវសេចក្តីសោកស្តាយ អាឡោះអាល័យចំពោះការយាងសោយព្រះទិវង្គត។
ក្នុងនាមជាកូន ជាចៅ ចៅទួត ចៅលួតរបស់ព្រះអង្គ អ្នកចូលរួមទាំងអស់បានរំឭកអំពីស្នាព្រះហស្ថដ៏ឧត្តុង្គឧត្តម និងវិសេសវិសាល ដែលព្រះករុណាព្រះបរមរតនកោដ្ឋបានបន្សល់ទុកសម្រាប់ជាតិ មាតុភូមិ និងប្រជារាស្ត្រកម្ពុជាទូទាំងប្រទេស។
គួររំលឹកថា ជារៀងរាល់ឆ្នាំ រដ្ឋបាលខេត្តសៀមរាប តែងតែរៀបចំពិធីគោរពព្រះវិញ្ញាណក្ខន្ធ ព្រះបាទសម្តេចព្រះនរោត្តម សីហនុ ព្រះមហាវីរក្សត្រ ព្រះបិតាឯករាជ្យជាតិ ដើម្បីបង្ហាញនូវការគោរពស្រឡាញ់ ពោរពេញទៅដោយភក្ដីភាពដ៏ជ្រាលជ្រៅមិនអាចកាត់ថ្លៃបាន។ ស្នាព្រះហស្ថសំខាន់ៗរបស់ព្រះអង្គ រួមមាន៖ ជោគជ័យក្នុងការទាមទារឯករាជ្យជាតិពីអាណានិគមនិយមបារាំងសេសនាឆ្នាំ១៩៥៣ (មិនមែនឆ្នាំ១៩៥១) ការទាមទារប្រាសាទព្រះវិហារខ្មែរមកវិញពីសំណាក់សៀមឈ្លានពាននាឆ្នាំ១៩៦២ ការបង្រួបបង្រួមផ្សះផ្សាជាតិ និងសមិទ្ធផលធំៗជាច្រើនទៀត។
ព្រះករុណា ព្រះបាទសម្ដេចព្រះនរោត្ដម សីហនុ អតីតព្រះមហាក្សត្រ នៃព្រះរាជាណាចក្រកម្ពុជា ព្រះអង្គប្រសូតនៅថ្ងៃអង្គារ ទី៣១ ខែតុលា ឆ្នាំ១៩២២ នៅរាជធានីភ្នំពេញ។ ទ្រង់យាងចូលទិវង្គតនៅថ្ងៃចន្ទ ទី១៥ ខែតុលា ឆ្នាំ២០១២ វេលាម៉ោង១៖២០នាទីយប់ នៅទីក្រុងប៉េកាំង ប្រទេសចិន ដោយព្រះជរាពាធ ក្នុងព្រះជន្មាយុ ៩០ព្រះវស្សា។
សូមបញ្ជាក់ផងដែរថា នៅព្រឹកថ្ងៃទី១៥ ខែតុលានេះដែរ នៅតាមវត្តអារាមនានាក្នុងក្រុងសៀមរាប ក៏បានរៀបចំពិធីគោរពព្រះវិញ្ញាណក្ខន្ធ និងបង្សុកូលថ្វាយព្រះរាជកុសល ព្រះករុណា ព្រះបាទសម្ដេចព្រះនរោត្តម សីហនុ ព្រះបរមរតនកោដ្ឋ គម្រប់ ១៣ឆ្នាំផងដែរ។
គំរូវីរភាពរបស់ព្រះអង្គធ្វើឱ្យយើងចងចាំជានិច្ច នឹងយកជាគំរូតាម ហើយរាជរដ្ឋាភិបាលកម្ពុជា និងអាជ្ញាធរគ្រប់លំដាប់ថ្នាក់ នឹងខិតខំប្រឹងប្រែងកសាងអភិវឌ្ឍន៍ប្រទេសជាតិ ឱ្យកាន់តែរីកចម្រើនលើគ្រប់វិស័យ ដើម្បីធ្វើយ៉ាងណាឱ្យប្រជានុរាស្ត្រមានជីវភាពកាន់តែល្អប្រសើរឡើង៕
អត្ថបទ និងរូបភាព÷ លោក ទ្រា ពន្លឺ
កែសម្រួល÷ លោក អ៊ុន ណារាជ្យ
