នារសៀលថ្ងៃទី១៤ ខែតុលា ឆ្នាំ២០២៥ ឯកឧត្តម ប្រាក់ សោភ័ណ អភិបាលខេត្តសៀមរាប បានដឹកនាំកិច្ចប្រជុំជាមួយមន្ទីរ-អង្គភាពជំនាញ ដើម្បីត្រួតពិនិត្យទីតាំងដែលមានគ្រោះថ្នាក់ចរាចរណ៍កើតឡើងជាញឹកញាប់នៅក្នុងក្រុងសៀមរាប សំដៅរួមគ្នាកាត់បន្ថយគ្រោះថ្នាក់ចរាចរណ៍ឱ្យមកនូវកម្រិតទាបបំផុត។
បើតាម លោកឧត្តមសេនីយ៍ទោ ហួត សុធី ស្នងការ នៃស្នងការដ្ឋាននគរបាលខេត្ត បានបង្ហាញអំពីទីតាំងសំខាន់ៗដែលកើតមានគ្រោះថ្នាក់ចរាចរណ៍ញឹកញាប់នៅក្នុងក្រុងសៀមរាប រួមមាន៖ ផ្លូវជាតិលេខ៦ ចាប់ពីរង្វង់មូលផ្ការំដួល ដល់ស្ពានទឹកវិល, ចំណុចស្តុបចុងកៅស៊ូ ស្តុបឈ្នះឈ្នះ ស្តុបទន្លេសាប ផ្លូវបំបែកស្នាក់ការគយ ពេទ្យមេឌីឃៀ កែងសណ្ឋាគារបាយ័នអេរ៉ា, ផ្លូវស៊ីវុត្ថា ត្រង់កែងសាលាញូវយ៉ក, ផ្លូវសម្ដេចព្រះសីហនុ ផ្លូវក្រវាត់ក្រុង កែងJ7 ដល់កែងពេទ្យកុមារអង្គរ, ស្តុបកោះកេរ្តិ៍ ដល់ស្តុបតូតាល់, ផ្លូវបំបែកថ្មរមាស់ និងស្តុបសីហមុនី។
ឯកឧត្តម ប្រាក់ សោភ័ណ អភិបាលខេត្ត មានប្រសាសន៍គូសបញ្ជាក់ថា គ្រោះថ្នាក់ចរាចរណ៍មិនត្រឹមតែបង្កការខាតបង់ទ្រព្យសម្បត្តិ និងអាយុជីវិតមនុស្សប៉ុណ្ណោះទេ ប៉ុន្តែថែមទាំងបានបន្សល់ទុកនូវវិបត្តិសង្គមយ៉ាងធ្ងន់ធ្ងរដូចជា ពិការភាព កុមារកំព្រា ស្រ្តីមេម៉ាយ ចាស់ជរាឥតទីពឹង ព្រមទាំងប៉ះពាល់ដល់សេដ្ឋកិច្ចសង្គមជាតិទាំងមូល ដែលបណ្ដាលមកពីការបាត់បង់ធនធានមនុស្ស និងកម្លាំងពលកម្មសកម្ម។
ឯកឧត្តម ប្រាក់ សោភ័ណ ក៏បានណែនាំដល់មន្ត្រីពាក់ព័ន្ធ បន្តចុះពិនិត្យសិក្សា និងរៀបចំនៅចំណុចផ្លូវសំខាន់ៗដែលមានគ្រោះថ្នាក់ចរាចរណ៍ញឹកញាប់នៅក្នុងក្រុង និងតាមបណ្ដាលស្រុក ដើម្បីរៀបចំដាក់សញ្ញាចរាចរណ៍ គំនូសពញ្ញាក់អារម្មណ៍ និងគំនូសចរាចរណ៍បន្ថែម សំដៅរួមគ្នាកាត់បន្ថយគ្រោះថ្នាក់ចរាចរណ៍ឱ្យមកនូវកម្រិតទាប ដែលជាផ្នែកមួយដ៏សំខាន់ដើម្បីជំរុញការអនុវត្តច្បាប់ឱ្យទទួលបានលទ្ធផលជាវិជ្ជមាន។ បន្តយកចិត្តទុកដាក់ពិនិត្យការងារសណ្ដាប់ធ្នាប់ការលក់ដូរលើចំណីផ្លូវ បន្តពង្រឹងការផ្សព្វផ្សាយច្បាប់ស្ដីពីចរាចរណ៍ផ្លូវគោក និងអនុវត្តវិធានការទប់ស្កាត់គ្រោះថ្នាក់ចរាចរណ៍ឱ្យមានប្រសិទ្ធភាពបន្ថែមទៀត។
ឯកឧត្តម អភិបាលខេត្តបានថ្លែងអំណរគុណដល់កងកម្លាំងទាំងពីរប្រភេទ មន្ទីរ-អង្គភាពពាក់ព័ន្ធ និងអាជ្ញាធរមូលដ្ឋាន ដែលបានចូលរួមការពារសន្តិសុខ សណ្ដាប់ធ្នាប់ ចរាចរណ៍ និងការជួយដោះស្រាយការងារគ្រោះមហន្តរាយនាពេលកន្លងមក៕
អត្ថបទ និងរូបភាព÷ លោក ធន់ ពូថេ
កែសម្រួល÷ លោក អ៊ុន ណារាជ្យ
