នារាត្រីថ្ងៃទី១២ ខែតុលា ឆ្នាំ២០២៥ ព្រះសង្ឃ គណៈកម្មការ អាចារ្យវត្ត និងប្រជាពលរដ្ឋចំណុះជើងវត្តសុវណ្ណសាគរ ហៅវត្តកោះខ្សាច់ ក្នុងសង្កាត់ចុងឃ្នៀស ក្រុងសៀមរាប បានរៀបចំបណ្ដែតប្រទីបជ្វាលាថ្វាយព្រះគង្គា លើផ្ទៃទន្លេសាប ដើម្បីសម្តែងការដឹងគុណ សុំខមាលទោសចំពោះព្រះម៉ែគង្គា ធម្មជាតិ ម្ចាស់ទឹកម្ចាស់ដី និងដើម្បីបួងសួងសុំសេចក្ដីសុខដល់វីរៈកងទ័ព ដែលកំពុងឈរជើងការពារតាមបណ្ដោយបន្ទាត់ព្រំដែន។
ព្រះតេជគុណ ម៉ៃ ភីរុណ ព្រះគ្រូចៅអធិការវត្ត មានថេរដីកាថា ការរៀបចំបណ្ដែតប្រទីបជ្វាលាលើផ្ទៃទន្លេសាបនាពេលនេះ គឺធ្វើឡើងដើម្បីដឹងគុណចំពោះព្រះម៉ែគង្គា (ព្រះនៃទឹក) ដែលបានផ្ដល់ប្រភពទឹកសម្រាប់ប្រើប្រាស់ និងសម្រាប់ស្រោចស្រពដំណាំ។ ពិធីនេះក៏ជាការសូមស្មារលា ឬសុំខមាទោស ពីព្រះគង្គា ព្រះពាយ ព្រះធរណី (ផែនដី) និងព្រះពៃស្រពណ៍ (ព្រះនៃស្រូវ) ចំពោះអំពើបាបទាំងឡាយដែលមនុស្សបានប្រព្រឹត្តដោយចេតនា ឬអចេតនា។
ព្រះតេជគុណ បានសង្កត់ធ្ងន់ថា គោលបំណងធំមួយទៀតក្នុងពិធីនេះ គឺបួងសួងសុំសេចក្ដីសុខដល់វីរៈកងទ័ពជួរមុខទាំងអស់ ព្រមទាំងប្រជាពលរដ្ឋនៅទូទាំងប្រទេស សូមឱ្យជួបតែសេចក្ដីសុខ សេចក្តីចម្រើនគ្រប់ៗគ្នា ឈ្នះអស់មារសត្រូវ សូមឱ្យប្រទេសជាតិរួចផុតពីសង្គ្រាម ឈ្លានពាន ជំងឺដង្កាត់ គ្រោះកាចចង្រៃ មានទឹកភ្លៀងគ្រប់គ្រាន់តាមរដូវកាល ទទួលបានទេសចរណ៍ និងអ្នកវិនិយោគទុនកាន់តែកើនឡើង និងកសិផលទទួលបានទិន្នផលខ្ពស់ ដើម្បីចូលរួមចំណែកដល់កិច្ចអភិវឌ្ឍន៍ជាតិ។
ព្រះគ្រូចៅអធិការវត្ត មានថេរដីកាបន្តថា ការរៀបចំបណ្ដែតប្រទីបនេះ ក៏ជាការអបអរសាទរចំពោះការចេញព្រះវស្សា ដែលព្រះសង្ឃគ្រប់អង្គចេញពីវស្សា ហើយជាពេលដែលប្រជាជនបានធ្វើបុណ្យកុសលផ្សេងៗ។ នៅក្នុងប្រទីបក៏មានរៀបចំគ្រឿងដង្វាយ ទៀន ធូប ផ្កា សម្រាប់បូជា និងបួងសួងសុំសេចក្ដីសុខ ដែលជាការកុសលយ៉ាងធំ ជឿថាអាចនាំមកនូវសេចក្ដីសុខ សិរីសួស្ដី ភាពចម្រើនរុងរឿងដល់ខ្លួន និងក្រុមគ្រួសារ។
ព្រះតេជគុណ បញ្ជាក់បន្ថែមថា ការដង្ហែ និងបណ្ដែតប្រទីប គឺជាពិធីមួយដែលផ្សារភ្ជាប់យ៉ាងជ្រៅរវាងជំនឿព្រះពុទ្ធសាសនា និងជំនឿក្នុងវប្បធម៌តាំងពីបុរាណកាល ក្នុងគោលបំណងដឹងគុណ សុំខមាទោស និងផ្សងសេចក្ដីសុខចម្រើន។ ព្រះអង្គក៏បានលើកឡើងថា ការរៀបចំពិធីនេះ ក៏ដើម្បីបង្ហាញដល់ក្មេងៗជំនាន់ក្រោយឱ្យបានដឹង បានយល់អំពីវប្បធម៌ទំនៀមទំលាប់ដែលបុព្វបុរសខ្មែរបានបន្សល់ទុក ហើយរួមគ្នាសំខាន់គោរព និងថែរក្សាកុំឱ្យសាបរលាបបាត់បង់ សម្រាប់ទុកជាកេរ្តិ៍ដំណែល តកូនចៅគ្រប់ៗជំនាន់ទៅថ្ងៃក្រោយផងដែរ៕
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
