អង្គកឋិនទានសាមគ្គី វត្តប្រាសាទចន្ទរង្សី ហៅវត្តគោកចាន់ ស្រុកប្រាសាទបាគង ដែលផ្ដួចផ្ដើមដោយអាចារ្យ គណៈកម្មការវត្ត ព្រមទាំងពុទ្ធបរិស័ទចំណុះជើងវត្ត និងពុទ្ធបរិស័ទមកពីក្នុង និងក្រៅខេត្ត នារសៀលថ្ងៃទី១២ ខែតុលា ឆ្នាំ២០២៥ នេះ ដោយបានប្រមូលបច្ច័យសរុបចំនួន ១០លានរៀល សម្រាប់ទ្រទ្រង់និងកសាងសមិទ្ធផលនានាក្នុងទីអារាម។
ព្រះធម្មានុរ័ក្ខញាណ ស៊ុម ពិសិទ្ធ ព្រះចៅអធិការវត្តប្រាសាទចន្ទរង្សី មានថេរដីកាបញ្ជាក់ថា បច្ច័យដែលប្រមូលបានពីអង្គកឋិនទាននាពេលនេះ នឹងត្រូវប្រើប្រាស់ដើម្បីទ្រទ្រង់ចតុបច្ច័យដល់ភិក្ខុសាមណេរក្នុងវត្ត ក្រោយពេលចាំព្រះវស្សាអស់រយៈពេលបីខែ, សម្រាប់ផ្គត់ផ្គង់ដល់សមណសិស្សដែលមន្តសិក្សារៀនសូត្រនិងស្នាក់នៅទីនេះ, និងមួយចំនួនទៀតយកទៅសាងសង់សមិទ្ធផលនានាក្នុងទីអារាម ក៏ដូចជាកសាងទីសេនាសេនៈសម្រាប់ព្រះសង្ឃគង់នៅ។
ព្រះគ្រូចៅអធិការ ក៏បានសម្ដែងនូវព្រះទ័យសោមនស្សសាទរយ៉ាងក្រៃលែងចំពោះសទ្ធាជ្រះថ្លារបស់ប្រជាពុទ្ធបរិស័ទជិតឆ្ងាយ ដែលបានស្រុះស្រួលគ្នាដង្ហែអង្គកឋិននេះឡើង។ ព្រះអង្គមានថេរដីកាថា នេះជាការបញ្ជាក់ឱ្យឃើញពីការជឿគោរពព្រះពុទ្ធសាសនា និងស្មារតីសាមគ្គីជួយគ្នារបស់ប្រជាពុទ្ធបរិស័ទ ដើម្បីទ្រទ្រង់ព្រះពុទ្ធសាសនាឱ្យបានចម្រើនរុងរឿងនៅយូរអង្វែង និងជាការជួយទំនុកបម្រុងដល់ព្រះភិក្ខុសង្ឃ ក្រោយពីគង់ចាំព្រះវស្សាអស់កាលត្រីមាសកន្លងមក។
ព្រះអង្គបានបន្តថា ពិធីបុណ្យកឋិនទាននាពេលនេះ ប្រារព្ធឡើងក្នុងគោលបំណងបង្កើនសាមគ្គីភាពរវាងបុគ្គល គ្រួសារ និងសង្គមជាតិ, ទ្រទ្រង់ព្រះពុទ្ធសាសនា ឱ្យបានចម្រើនរុងរឿងនិងគង់វង្សយូរអង្វែង, ផ្ដល់កម្លាំងកាយចិត្តដល់ព្រះភិក្ខុសង្ឃដែលជាសាសនទាយាទបន្តអាយុព្រះពុទ្ធសាសនា និងដើម្បីបានថ្វាយឧបការៈទំនុកបម្រុងឧបត្ថម្ភព្រះភិក្ខុសាមណេរ ដែលជាមហាកុសលដ៏ប្រសើរ៕
អត្ថបទ និងរូបភាព៖ លោក ឃុត សៅ
កែសម្រួល៖ លោក អ៊ុន ណារាជ្យ
