នាថ្ងៃទី៨ ខែតុលា ឆ្នាំ២០២៥នេះ គណៈកម្មការ អាចារ្យ និងពុទ្ធបរិស័ទចំណុះជើងវត្ត បានរួមគ្នាដង្ហែអង្គកឋិនទានសាមគ្គី ដើម្បីវេរប្រគេនព្រះសង្ឃដែលគង់ចាំព្រះវស្សាអស់ត្រីមាស នៅក្នុងខណ្ឌសីមាវត្តព្រះព្រហ្មរ័ត្ន ក្រុងសៀមរាប ដើម្បីប្រមូលបច្ច័យសម្រាប់កសាងហេដ្ឋារចនាសម្ព័ន្ធ និងសមិទ្ធិផលនានាក្នុងវត្ត ព្រមទាំងទ្រទ្រង់ចង្ហាន់ព្រះសង្ឃ ដែលជាប្រយោជន៍រួមដ៏ថ្លៃថ្លាសម្រាប់ព្រះពុទ្ធសាសនា និងសង្គមជាតិទាំងមូល។
ព្រះសាសនសត្ថា តង់ តន ព្រះគ្រូចៅអធិការវត្ត មានថេរដីកាថា កឋិនទាន គឺជាបុណ្យប្រពៃណីរបស់ព្រះពុទ្ធសាសនា ដែលមានចែងយ៉ាងច្បាស់នៅក្នុងព្រះវិន័យបិដក មហាវគ្គ កឋិនក្ខន្ធកៈ។ ប៉ុន្តែបុណ្យកឋិនទានមានលក្ខណៈប្លែកពីបុណ្យដទៃ ៥យ៉ាងសំខាន់ៗ គឺប្លែកដោយកាល ជាកាលទានដែលក្នុងមួយឆ្នាំអាចប្រារព្ធធ្វើបានតែ ១ដង ហើយវត្តមួយទទួលបានកឋិនតែ ១ដងប៉ុណ្ណោះ, ប្លែកដោយវត្ថុ គឺសំពត់ដែលជាវត្ថុកឋិន មានតែស្បង់ចីវរ និងសង្ឃាដី ដែលគេធ្វើត្រឹមត្រូវតាមពុទ្ធបញ្ញត្តិ, ប្លែកដោយអំពើ ទាំងអ្នកធ្វើ និងព្រះសង្ឃ ត្រូវធ្វើឱ្យបានត្រឹមត្រូវតាមព្រះវិន័យបញ្ញត្តិ, ប្លែកដោយបដិគ្គាហកៈ គឺអ្នកទទួលសំពត់កឋិនបានតែភិក្ខុដែលនៅចាំព្រះវស្សាគ្រប់ ៣ខែ ដោយមិនដាច់វស្សាប៉ុណ្ណោះ និងប្លែកដោយអានិសង្ស ជាបុណ្យមានផលានិសង្សច្រើន ដែលអ្នកធ្វើទទួលបានអានិសង្ស ៥យ៉ាង ដូចជា មានប្រាជ្ញាក្លៀវក្លាមុតមាំ មានសម្បុរ និងរូបល្អ មានទ្រង់ទ្រាយល្អ និងបានជាស្តេចចក្រពត្តិក្នុងជាតិណាមួយពុំខានឡើយ។
ព្រះគ្រូចៅអធិការ បានបន្ថែមថា តាមរយៈកឋិនទាននេះ វត្តក៏មានលទ្ធភាពទទួលបានបរិវាកឋិន រួមមាន សម្ភារ និងបច្ច័យ សម្រាប់បម្រើដល់ការកសាងទីសេនាសនៈផ្សេងៗ ដូចជា ព្រះវិហារ កុដិ ឧបដ្ឋានសាលា ការទំនុកបម្រុងវិស័យពុទ្ធិកសិក្សា និងការកសាងសមិទ្ធផលសង្គមជាដើម។ ក្រៅពីនេះ បុណ្យកឋិនសាមគ្គី ក៏បង្ហាញអំពីការរួបរួមគ្នាជាធ្លុងមួយ របស់ពុទ្ធបរិស័ទចំណុះជើងវត្ត ឬញាតិញោមមកពីគ្រប់ទិសទី ក្នុងការចូលរួមចំណែកកម្លាំងកាយចិត្ត និងថវិកាដោយមិនប្រកាន់វណ្ណៈ ឬនិន្នាការណាមួយឡើយ៕
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
