នៅថ្ងៃទី៨ ខែតុលា ឆ្នាំ២០២៥នេះ វត្តកេសរារាម ក្រុងសៀមរាប បានទទួលបច្ច័យជាង ២៥លានរៀល ពីអង្គកឋិនទានសាមគ្គី សម្រាប់ទុកសង់អគារផ្ទះបាយ ទីសេនាសេនៈសង្ឃ រួមនឹងសមិទ្ធផលនានាបន្ថែម នៅក្នុងបរិវេនវត្ត។
ព្រះគ្រូ រី សាត ព្រះចៅអធិការវត្ត មានថេរដីកាបញ្ជាក់ថា បច្ច័យដែលប្រមូលបានពីអង្គកឋិនទាននាពេលនេះ គឺសម្រាប់ទ្រទ្រង់ចតុបច្ច័យដល់ភិក្ខុ សាមណេរក្នុងវត្ត ក្រោយចាំព្រះវស្សាអស់ពេលបីខែ សម្រាប់ផ្គត់ផ្គង់ដល់សមណសិស្សដែលនិងមន្តសិក្សារៀនសូត្រ និងស្នាក់នៅទីនេះ និងមួយចំនួនទៀតយកទៅសាងសង់អគារមួយខ្នង កម្ពស់២ជាន់ ដែលគ្រោងចំណាយថវិកាប្រមាណ ១២ម៉ឺនដុល្លារ សម្រាប់ជាផ្ទះបាយ និងជាទីសេនាសេនៈព្រះសង្ឃគង់នៅ។
ព្រះគ្រូចៅអធិការ ក៏បានសម្តែងនូវព្រះទ័យសោមនស្សសាទរ ចំពោះសទ្ធាជ្រះថ្លារបស់ប្រជាពុទ្ឋបរិស័ទជិតឆ្ងាយ ដែលបានស្រុះស្រួលគ្នាដង្ហែអង្គកឋិននេះឡើង ដែលនេះជាសទ្ធាបញ្ជាក់ឱ្យឃើញពីការជឿ គោរពព្រះពុទ្ធសាសនា និងស្មារតីសាមគ្គីជួយគ្នារបស់ប្រជាពុទ្ធបរិស័ទ ដើម្បីទ្រទ្រង់ព្រះពុទ្ធសាសនាឱ្យបានចម្រើន រុងរឿងនៅយូរអង្វែង និងជាការជួយទំនុកបម្រុងដល់ព្រះភិក្ខុសង្ឃ ក្រោយពីគង់ចាំព្រះវស្សាអស់កាលត្រីមាសកន្លងមក។
ព្រះអង្គមានថេរដីកាបន្តថា បុណ្យកឋិនទាននាពេលនេះដែរ ប្រារព្ធឡើងក្នុងគោលបំណងបង្កើនសាមគ្គីភាពរវាងបុគ្គល គ្រួសារ និងសង្គមជាតិ, ទ្រទ្រង់ព្រះពុទ្ធសាសនា ឱ្យបានចម្រើនរុងរឿង និងគង់វង្សយូរអង្វែង, ផ្ដល់កម្លាំងកាយ ចិត្ត ដល់ព្រះភិក្ខុសង្ឃ ដែលជាសាសនទាយាទបន្តអាយុព្រះពុទ្ធសាសនា និងដើម្បីបានថ្វាយឧបការៈទំនុកបម្រុងឧបត្ថម្ភព្រះភិក្ខុសាមណេរ ដែលជាមហាកុសលដ៏ប្រសើរ៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
