បើតាមគណៈកម្មាធិការប្រយុទ្ធប្រឆាំងអំពើជួញដូរមនុស្សខេត្តសៀមរាប (គ.ខ.ប.ជ) សម្រាប់ត្រីមាសទី៣ ឆ្នាំ២០២៥ ក្រុមការងារពាក់ព័ន្ធ បានសហការដោះស្រាយសម្របសម្រួលផ្ដល់សេវាកម្មផ្នែកច្បាប់ និងសុខាភិបាល លើករណីអំពើហិង្សាទាក់ទងទៅនឹងយេនឌ័របានចំនួន ២២ករណី ក្នុងនោះករណីអំពើហិង្សាក្នុងគ្រួសារ ១១ករណី និងការរំលោភបំពានផ្លូវភេទចំនួន ១១ករណី។
ក្នុងកិច្ចប្រជុំរបស់លេខាធិការដ្ឋាន នៃគណៈកម្មាធិការប្រយុទ្ធប្រឆាំងអំពើជួញដូរមនុស្សខេត្ត ប្រចាំត្រីមាសទី៣ ឆ្នាំ២០២៥ នាថ្ងៃទី២ ខែតុលានេះ លោកស្រី ម៉ននី រង្សី អភិបាលរងខេត្ត និងជាអនុប្រធាន គ.ខ.ប.ជ បានឱ្យដឹងថា ក្នុងចំណោម ២២ករណីនេះ ក្រុមការងារបានប្រឹក្សាយោបល់ផ្នែកច្បាប់ និងផ្លូវចិត្ត ៣ករណី, កិច្ចព្រមព្រៀងលែងលះ ៥ករណី, ដាក់ពាក្យបណ្ដឹងលែងលះទៅសាលាដំបូង ២ករណី, កិច្ចសន្យាឈប់ប្រព្រឹត្តអំពើហិង្សា ១ករណី, ករណីរំលោភសេពសន្ថវៈលើអនីតិជន ៥ករណី, ករណីរួមភេទជាមួយអនីតិជន ៤ករណី និងករណីរំលោភសេពសន្ថវៈដោយមានស្ថានភាពទម្ងន់ទោស ១ករណី។
លោកស្រី ម៉ននី រង្សី បានជំរុញ និងណែនាំដល់ដល់ក្រុមការងារលេខាធិការដ្ឋាន និងគ្រប់ភាគីពាក់ព័ន្ធទាំងអស់បន្តកិច្ចសហការគ្នាអនុវត្តផែនការសកម្មភាពដែលបានដាក់ចេញទៅតាមតួនាទីនីមួយៗដើម្បីកាត់បន្ថយ និងឈានដល់ការលុបបំបាត់ការប្រើប្រាស់អំពើហិង្សា និងការរំលោភបំពានផ្លូវភេទលើកុមារ។
លោកស្រីបន្តថា ផ្អែកទៅលើរបាយការណ៍ប្រចាំត្រីមាសទី៣នេះ លោកស្រីសូមថ្លែងការកោតសរសើរ និងវាយតម្លៃខ្ពស់ ចំពោះក្រុមការងារ មន្ទីរអង្គភាពពាក់ព័ន្ធ ដែលបានអនុវត្ដតួនាទី និងភារកិច្ចរបស់ខ្លួនបានល្អប្រសើរ ជាពិសេសចូលរួមដោះស្រាយបញ្ហាពាក់ព័ន្ធនឹងការប្រើប្រាស់អំពើហិង្សា និងការរំលោភបំពានផ្លូវភេទបានទាន់ពេលវេលា និងឆាប់រហ័ស៕
អត្ថបទ និងរូបភាព៖ លោក អោត រត់
កែសម្រួល៖ លោក អ៊ុន ណារាជ្យ
