ថ្លែងបិទអង្គសិក្ខាសាលាឆ្លុះបញ្ចាំងលទ្ធផលការងារឆ្នាំ២០២៥ និងលើកទិសដៅឆ្នាំ២០២៦ របស់គណៈកម្មាធិការពិគ្រោះយោបល់កិច្ចការស្ត្រី និងកុមារ (គ.ក.ស.ក) នៃរដ្ឋបាលខេត្តសៀមរាប នារសៀលថ្ងៃទី២៦ ខែមករា ឆ្នាំ២០២៦ ឯកឧត្តម លី សំរិទ្ធ ប្រធានក្រុមប្រឹក្សាខេត្តសៀមរាប បានណែនាំឱ្យគណៈកម្មាធិការពិគ្រោះយោបល់កិច្ចការស្ត្រី និងកុមារគ្រប់លំដាប់ថ្នាក់ បន្តពង្រឹងសមត្ថភាព និងភាពអង់អាចដល់ស្ត្រី ដើម្បីឆ្លើយតបទៅនឹងគោលនយោបាយកំណែទម្រង់វិមជ្ឈការ និងវិសហមជ្ឈការ របស់រាជរដ្ឋាភិបាលកម្ពុជា។
ឯកឧត្តមប្រធានក្រុមប្រឹក្សាខេត្ត ឯកឧត្តម លី សំរិទ្ធ បានគូសបញ្ជាក់ថា លទ្ធផលដែលសម្រេចបានកន្លងមក បានបង្ហាញពីស្មារតីទទួលខុសត្រូវខ្ពស់របស់ គ.ក.ស.ក ក្នុងការអនុវត្តតួនាទី និងភារកិច្ចនៅក្នុងដែនសមត្ថកិច្ចរបស់ខ្លួន។ អង្គសិក្ខាសាលានេះ គឺជាវេទិកាដ៏សំខាន់ក្នុងការដកស្រង់បទពិសោធន៍ រកឱ្យឃើញនូវចំណុចខ្លាំង ចំណុចខ្វះខាត និងបញ្ហាប្រឈមនានា ដើម្បីដាក់ចេញនូវនីតិវិធីដោះស្រាយឱ្យមានប្រសិទ្ធភាព។
ឯកឧត្តមប្រធានក្រុមប្រឹក្សាខេត្ត ក៏បានជំរុញឱ្យអ្នកពាក់ព័ន្ធទាំងអស់ ត្រូវបន្តជំរុញការគាំទ្រដល់ស្ត្រីជាអ្នកដឹកនាំ និងការងារលើកកម្ពស់សិទ្ធិស្ត្រី យុវជន កុមារ និងជនងាយរងគ្រោះ។ ក្រុមប្រឹក្សាក្រុង ស្រុក និងឃុំ សង្កាត់ ត្រូវរៀបចំផែនការអភិវឌ្ឍន៍ឱ្យមានភាពស៊ីសង្វាក់គ្នា ដោយសហការជិតស្និទ្ធជាមួយអាជ្ញាធរពាក់ព័ន្ធ និងដៃគូអភិវឌ្ឍន៍ និងត្រូវធានាឱ្យបាននូវតម្លាភាព ប្រសិទ្ធភាព អព្យាក្រឹតភាព និងសមធម៌ ក្នុងការផ្តល់សេវាជូនប្រជាពលរដ្ឋនៅមូលដ្ឋាន។
ព័ត៌មានជាតិ ថ្មីៗ
ឯកឧត្តមបានសង្កត់ធ្ងន់ថា រាល់សកម្មភាពទាំងអស់ គឺជាផ្នែកមួយដ៏សំខាន់ក្នុងការចូលរួមសម្រេចឱ្យបាននូវ យុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាលកម្ពុជា នីតិកាលទី៧ ក្រោមការដឹកនាំរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដែលផ្តោតលើ “កំណើន ការងារ សមធម៌ ប្រសិទ្ធភាព និងចីរភាព”។
ឯកឧត្តមសង្ឃឹមជឿជាក់ថា ធាតុចូលដែលទទួលបានពីសិក្ខាសាលានេះ នឹងក្លាយជា «ត្រីវិស័យ» សម្រាប់ថ្នាក់មូលដ្ឋានយកទៅអនុវត្ត បង្កើននូវភាពច្នៃប្រឌិត និងនាំមកនូវអត្ថប្រយោជន៍ពិតប្រាកដជូនដល់ប្រជាពលរដ្ឋនៅក្នុងខេត្តសៀមរាបទាំងមូល៕
អត្ថបទ និងរូបភាព៖ លោក មុី សុខារិទ្ធ
កែសម្រួល៖ លោក អ៊ុន ណារាជ្យ
