នៅថ្ងៃទី១៥ ខែមករា ឆ្នាំ២០២៦ ក្រុមប្រឹក្សាខេត្តសៀមរាប បានរៀបចំវេទិកាផ្សព្វផ្សាយ និងពិគ្រោះយោបល់ សម្រាប់គោលដៅស្រុកបន្ទាយស្រី ក្រោមអធិបតីភាព ឯកឧត្តម តោ គឹមស៊ាន សមាជិកក្រុមប្រឹក្សាខេត្ត និងជាប្រធានក្រុមការងារថ្នាក់ខេត្ត ដោយមានការចូលរួមពី ឯកឧត្តម លោកជំទាវជាសមាជិកក្រុមប្រឹក្សាខេត្ត ថ្នាក់ដឹកនាំមន្ទីរអង្គភាព អាជ្ញាធរមូលដ្ឋាន និងអ្នកពាក់ព័ន្ធជាច្រើនរូប។
ឯកឧត្តម តោ គឹមស៊ាន មានប្រសាសន៍ថា វេទិកាផ្សព្វផ្សាយ និងពិគ្រោះយោបល់នាពេលនេះ រៀបចំឡើងដើម្បីផ្ដល់ឱកាសដល់ប្រជាពលរដ្ឋក្នុងស្រុកបន្ទាយស្រី អាចបញ្ចេញមតិយោបល់ និងសំណូមពរដោយផ្ទាល់ទៅកាន់ថ្នាក់ដឹកនាំខេត្ត ក្រុមប្រឹក្សាខេត្ត និងអ្នកពាក់ព័ន្ធ ជុំវិញក្ដីកង្វល់ បញ្ហាប្រឈម សំណូមពរ និងតម្រូវការនានាក្នុងមូលដ្ឋាន ដើម្បីឱ្យអ្នកពាក់ព័ន្ធធ្វើការពិនិត្យ ឆ្លើយតប និងដោះស្រាយ និងដោះស្រាយជូនបងប្អូនឱ្យបានទាន់ពេលវេលា។
ឯកឧត្តមបន្តថា វេទិកានាពេលនេះ ជាការបើកចំហក្នុងការទទួលយកមតិយោបល់ពីបងប្អូនប្រជាពលរដ្ឋក្នុងមូលដ្ឋាន ជាកម្លាំងចលករដ៏មានប្រសិទ្ធភាពក្នុងការអនុវត្តនូវយុទ្ធសាស្ត្រអភិវឌ្ឍន៍ មនុស្ស ផ្លូវ ទឹក ភ្លើង និងបច្ចេកវិទ្យា ដែលជាអាទិភាពគន្លឹះរបស់ខេត្ត។ វេទិកានាពេលនេះ ពិតជាមានសារៈសំខាន់ណាស់ ក្នុងគោលដៅធានាឱ្យមានការអនុវត្តនូវគោលការណ៍នៃអភិបាលកិច្ចល្អ និងការគ្រប់គ្រងតាមបែបប្រជាធិបតេយ្យនៅថ្នាក់ក្រោមជាតិ ជំរុញការអភិវឌ្ឍនៅក្នុងមូលដ្ឋាន ដើម្បីឱ្យអាជ្ញាធរបានដឹងឮ និងរកដំណោះស្រាយជូនបងប្អូន។
លោក រិន ឡូត អភិបាលស្រុកបន្ទាយស្រី វេទិកានេះដែរ ជាឱកាសសម្រាប់ប្រជាពលរដ្ឋបង្ហាញពីភាពអសកម្មក្នុងមូលដ្ឋាន លើគ្រប់ផ្នែកទាំងអស់ សម្រាប់ឱ្យអាជ្ញាធរ និងមន្ត្រីជំនាញធ្វើការពិនិត្យ កែលម្អ ក្នុងន័យជំរុញការអភិវឌ្ឍក្នុងមូលដ្ឋាន ជាពិសេសការបម្រើសេវាសាធារណៈឱ្យកាន់តែប្រសើរឡើង។ ក្នុងន័យនេះ លោកបានស្នើដល់បងប្អូនប្រជាពលរដ្ឋ លើកឡើងពីក្ដីកង្វល់ បញ្ហាប្រឈម សំណូមពរ និងតម្រូវការនានាក្នុងមូលដ្ឋានរបស់ខ្លួនដើម្បីឱ្យមន្ត្រីជំនាញបកស្រាយជូន។
សូមជម្រាបថា វេទិកានាពេលនេះ ក្រុមការងារបានទទួលក្ដីកង្វល់ សំណូមពររបស់ប្រជាពលរដ្ឋចំនួន៣ រួមមានការជួសជុលអណ្ដូងទឹកមួយកន្លែងក្នុងឃុំខ្នារសណ្ដាយ, ស្នើសុំសាងសងរបងសាលា និងបញ្ហាគ្រូបង្រៀនក្រៅម៉ោង។ ចំពោះសំណួរសំណូមពរទាំង៣ ត្រូវបានមន្ត្រីជំនាញឆ្លើយបំភ្លឺ និងដោះស្រាយជូនប្រជាពលរដ្ឋភ្លាមៗផងដែរ៕
អត្ថបទ និងរូបភាព៖ លោក ឡៃ បញ្ញា
កែសម្រួល៖ លោក អ៊ុន ណារាជ្យ
