យោងតាមសេចក្ដីប្រកាសព័ត៌មានរបស់គ្រឹះស្ថានអង្គរ ចេញផ្សាយនៅថ្ងៃទី១ខែមេសាឆ្នាំ២០២៣នេះ បានបង្ហាញថា សម្រាប់រយៈពល៣ខែ ចាប់ពីខែមករា ដល់ខែដំណាច់ខែមីនាឆ្នាំ២០២៣នេះ មានភ្ញៀវទេសចរទិញសំបុត្រចូលទស្សនាអង្គរចំនួន ២៣៦ ៣៤១នាក់ កើនឡើងជាង១០០០ភាគរយ បើធៀបរយៈពេលដូចគ្នាឆ្នាំ២០២២ និងទទួលបានប្រាក់ចំណូលចំនួន ១១ ១៣៥ ៤៩២ ដុល្លារអាមេរិក កើនឡើងជាង ១០០០ភាគរយ បើធៀបនឹងឆ្នាំ២០២២កន្លងទៅ។
សេចក្ដីប្រកាសព័ត៌មានបានបន្ថែមថា សម្រាប់បីខែឆ្នាំ២០២៣ មូលនិធិមន្ទីរពេទ្យគន្ធបុប្ផា មានចំនួន ៤៧២ ៦៨២ដុល្លារអាមេរិក ហើយចំណូលពីការលក់បណ្ណចូលទស្សនាប្រាសាទកោះកេរ ក្នុងរយៈពេលបីខែក្នុងឆ្នាំ២០២៣ មានចំនួន ៤ ៣៥៩នាក់ ស្មើនឹង៦៥ ៣៨៥ដុល្លារអាមេរិក និង ចំណូលពីការលក់សំបុត្រទូក រយៈពេលបីខែក្នុងឆ្នាំ២០២៣មានចំនួន១៨០ ១៦៤ដុល្លារអាមេរិក ។
របាយការណ៍ដដែលបានបន្ថែមថា សម្រាប់ខែមីនាឆ្នាំ២០២៣នេះ មានភ្ញៀវទេសចរអន្ដរជាតិទិញបណ្ណចូលទស្សនាអង្គរ មានចំនួន៧៩ ៣៩០នាក់ បើធៀបនឹងឆ្នាំ២០២២កន្លងទៅកើនឡើងជាង៨០០ភាគរយ និងចំណូលថវិកាចំនួន៣ ៧៤៨ ៧០០ដុល្លារអាមេរិក កើនឡើងជាងឆ្នាំ២០២២ជាង១០០០ភាគរយ ក្នុងរយៈពេលដូចគ្នា៕
អត្ថបទ និងរូបភាព: លោក ជា ស្រស់
កែសម្រួល: លោក លីវ សាន្ត
