នាព្រឹកថ្ងៃទី០៤ ខែមេសា ឆ្នាំ២០២៣នេះ លោក ង៉ូវ សេងកាក់ សមាជិកគណៈកម្មាធិការសាខាកាកបាទក្រហមកម្ពុជាខេត្ត បានដឹកនាំក្រុមការងារចុះសួរសុខទុក្ខ និងនាំយកអំណោយមនុស្សធម៌ ចែកជូនប្រជាពលរដ្ឋដែលរងគ្រោះដោយសារខ្យល់កន្ត្រាក់កាលពីពេលកន្លងទៅថ្មីៗនេះ ចំនួន២៣គ្រួសារ ក្នុងនោះ៖ ឃុំស្រែណូយ ចំនួន ២១គ្រួសារ មានរលំផ្ទះ ៦ខ្នង និងរបើកដំបូល ១៥ខ្នង និងបង្កឱ្យមានគ្រោះថ្នាក់របួសស្រាល ៣នាក់ និងក្នុងឃុំវ៉ារិន ចំនួន ២គ្រួសារ រលំផ្ទះ ១ខ្នង និងរបើកដំបូល ១ខ្នង។
មានប្រសាសន៍នាឱកាសនោះ លោក ង៉ូវ សេងកាក់ បានពាំនាំនូវការផ្ដាំផ្ញើសួរសុខទុក្ខពីសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងឯកឧត្តម ទៀ សីហា ប្រធានគណៈកម្មាធិការសាខា ដែលតែងតែយកចិត្តទុកដាក់គិតគូរខ្ពស់ចំពោះសុខទុក្ខប្រជាពលរដ្ឋគ្រប់រូប មិនប្រកាន់វណ្ណៈ ពណ៌សម្បុរ ជំនឿសាសនា ឬនិន្នាការនយោបាយណាមួយឡើយ។ ចំពោះការខូចខាតផ្ទះសំបែង ទ្រព្យសម្បត្តិសោយសារគ្រោះមហន្តរាយដោយធម្មជាតិនេះ លោកក៏បានសំដែងនូវការសោកស្ដាយជាពន់ពេក ក៏ព្រោះតែហេតុការណ៍នេះគឺគ្មាននរណាម្នាក់ចង់ជួបប្រទះឡើយ។
លោក ង៉ូវ សេងកាក់ មានប្រសាសន៍ទៀតថា ចំពោះអំណោយមនុស្សធម៌ដែលបាននាំយកមកចែកជូនបងប្អូននាពេលនេះ ក៏នឹងអាចជួយសម្រាលទុក្ខលំបាករបស់បងប្អូនបានមួយកម្រិត ហើយក៏ជាការបង្ហាញនូវការយកចិត្តទុកដាក់ចំពោះប្រជាពលរដ្ឋគ្រប់រូបពីសំណាក់ថ្នាក់ដឹកនាំ ពិសេសគឺកាកបាទក្រហមកម្ពុជា ដែលមានសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន ដូចដែលបានលើកឡើងថា “កាកបាទក្រហមកម្ពុជាមានគ្រប់ទីកន្លែង សម្រាប់គ្រប់ៗគ្នា-មិនទុកនរណាម្នាក់ចោល” និង “ទីណាមានទុក្ខលំបាក ទីនោះមានកាកបាទក្រហមកម្ពុជា”។
សូមជម្រាបថា អំណោយមនុស្សធម៌ដែលបានផ្ដល់ជូននាពេលនេះ៖
-សម្រាប់គ្រួសាររលំផ្ទះមួយគ្រួសារទទួលបាន៖ អង្ករ៣០គីឡូក្រាម ស័ង្កសី ១៦សន្លឹក មុង១ ភួយ១ សារុង១ ក្រមា១ កន្ទេល១ មី១កេស ទឹកត្រី១យួរ ត្រីខ១យួរ និងថវិកា ១សែន ៥ម៉ឺនរៀល។
-សម្រាប់គ្រួសាររបើកដំបូលមួយគ្រួសារទទួលបាន៖ អង្ករ៣០គីឡូក្រាម ស័ង្កសី១០សន្លឹក មុង១ ភួយ១ សារុង១ ក្រមា១ កន្ទេល១ មី១កេស ទឹកត្រី១យួរ ត្រីខ១យួរ និងថវិកា១សែនរៀល ។
ដោយឡែកជនរងគ្រោះរបួសស្រាលចំនួន ៣នាក់ក្នុងម្នាក់ទទួលបាន៖ អង្ករ៣០គីឡូក្រាម មុង១ ភួយ១ សារុង១ ក្រមា១ កន្ទេល១ មី១កេស ទឹកត្រី១យួរ ត្រីខ១យួរ និងថវិកា១សែនរៀលផងដែរ៕
អត្ថបទ និងរូបភាព៖ សាខាកាកបាទក្រហមខេត្ត
កែសម្រួល៖ អ៊ុន ណារាជ្យ
