ក្រុមលោកគ្រូអ្នកគ្រូនៃវិទ្យាល័យហ៊ុនសែនស្វាយធំ ឃុំកណ្ដែក ស្រុកប្រាសាទបាគង ខេត្ដសៀមរាប បានដឹកនាំសិស្សានុសិស្សរៀបចំព្រឹត្តិការណ៍សង្ក្រាន្ដវិទ្យាល័យ ដើម្បីអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរដែលមកដល់នាពេលឆាប់ៗខាងមុខ ហើយក៏ដើម្បីអភិរក្សប្រពៃណីវប្បធម៌ ព្រមទាំងបង្កើតការការជួបជុំសប្បាយរីករាយដល់សិស្សានុសិស្ស និងប្រជាពលរដ្ឋទូទៅ ដែលកម្មវិធីនេះមានរយៈពេល ពីរថ្ងៃ ចាប់ពីថ្ងៃទី០៥-០៦ ខែមេសា ឆ្នាំ២០២៣កន្លងទៅនេះ។
លោក កៃ គង់ គ្រូបង្រៀននៅវិទ្យាល័យហ៊ុនសែនស្វាយធំ និងជាអ្នករៀបចំកកម្មវិធី បានឱ្យដឹងថា ការរៀបចំសង្ក្រាន្ដវិទ្យាល័យនេះ ក្នុងគោលបំណងប្រមូលផ្ដុំប្រពៃណីវប្បធម៌ និងអរិយធម៌ខ្មែរ បង្ហាញដល់យុវជនប្រជាពរដ្ឋឱ្យបានស្គាល់កាន់តែច្បាស់នូវវប្បធម៌របស់ខ្លួន និងដើម្បីអភិរក្ស និងថែរក្សាទុកឱ្យគង់វង្ស បន្ទាប់ពីអាក់ខានមួយរយៈដោយសារជំងឺកូវីដ-១៩។ ចំពោះសង្ក្រាន្ដវិទ្យាល័យស្វាយធំ មានបង្ហាញនូវល្បែងប្រជាប្រិយខ្មែរជាច្រើនទម្រង់ ដូចជាល្បែងវាយក្បម ទាញព្រាត់ បោះអង្គុយ រាំវង្ស រាំក្បាច់ សារ៉ាវាន់ ឡាំឡាវជាដើម ដែលជាប្រពៃណីវប្បធម៌របស់ខ្មែរ។ ជាមួយគ្នានេះ ក៏មានពិព័រណ៌ស្ដង់ម្ហូបអារហារ បង្ហែមដែលជារបស់ខ្មែរ ដែលធ្វើឡើងដោយស្នារដៃសិស្សានុសិស្ស។ ហើយការបង្កើតសង្ក្រាន្ដវិទ្យាល័យ ក៏ជាការបង្កើតការជួបជុំអតីតសិស្សប្រជាពលរដ្ឋ ហើយលោកគ្រោងនឹងបង្កើតនៅឆ្នាំក្រោយៗទៀត ជាពិសេសប្រទេសជាតិមានសុខសន្ដិភាព គឺត្រូវបង្កើតនូវអ្វីដែលប្រជាជននិងសិស្សានុសិស្សសប្បាយរីករាយ។
ក្នុងឱកាសនោះដែរ ក្រុមសិស្សានុសិស្សដែលបានចូលរួមក្នុងកម្មវិធិនេះ បានសម្ដែងការសប្បាយរីករាយ ដោយពួកគាត់លើកឡើងស្រដៀងគ្នាថា ការបង្កើតកម្មវិធីវិសង្ក្រាន្ដវិទ្យាល័យនេះ ដោយសារមានការគាំទ្រពីអាជ្ញាធរ ជាពិសេសប្រទេសជាតិមានសុខសន្ដិភាព។ កម្មវិធីនេះក៏ជាការគាស់រំលើងនូវប្រពៃណីវប្បធម៌ខ្មែរបង្ហាញដល់សាធារណៈជន ជាពិសេសបានចូលរួមគាំគ្រនូវវប្បធម៌ប្រពៃណីខ្មែរដែលមានតាំងពីអតីតាកាលទៀតផង៕
អត្ថបទ និងរូបភាព៖ លោក បូ សាវី
កែសម្រួល៖ អ៊ុន ណារាជ្យ
