កសិករមានពិការភាពមកពីខេត្តបាត់ដំបង ខេត្តពោធិ៍សាត់ និងខេត្តសៀមរាប ចំនួន៣៩នាក់ ក្នុងនោះស្រ្តីចំនួន ៣០នាក់ បានចូលរួមវេទិការពិភាក្សាស្តីពី ការចែករំលែកការរៀនសូត្រ និងឆ្លុះបញ្ជាំងស្តីពី បរិយាបន្នពិការភាពក្នុងការអនុវត្តលើវិស័យកសិកម្ម ដើម្បីបង្កើនការចូលររួមបងប្អូនជាជនមានពិការភាពជាពិសេសស្រ្តីមានពិការភាពក្នុងការបង្កើនសេដ្ឋកិច្ចក្រុមគ្រួសារ ដែលរៀបចំឡើងនៅសាលាស្រុកសូទ្រនិគម ខេត្តសៀមរាប នៅថ្ងៃទី៦ ខែមេសាឆ្នាំ២០២៣ ក្រោមអធិបតីភាពលោក គិម វណ្ណ: អភិបាលស្រុកសូទ្រនិគម ដោយមានការអញ្ជើញចូលរួមពីសំណាក់លោក លោកស្រីជាតំណាងមន្ទីរ អង្គភាពពាក់ព័ន្ធ មេឃុំ តំណាងអង្គការមិនមែនរដ្ឋាភិបាល និងកសិករមានពិការភាព។
លោក គិម វណ្ណៈ បានលើកឡើងថា ប្រមុខរាជរដ្ឋាភិបាលកម្ពុធា តែងតែយកចិត្តទុកដាក់ចំពោះបងប្អូនមានពិការភាព ជាពិសេសស្រី្តមានពិការភាព តាមរយៈការផ្តល់បណ្ណ័សមធម៌ បណ្ណ័សម្គាល់ពិការភាព ក្នុងនោះស្រ្តីមានពិការភាពក្នុងការប្រកបការងារកសិកម្មលក្ខណៈគ្រួសារ។ ជាមួយគ្នានោះ លោកក៏បានសម្ដែងនូវការគាំទ្រលើកិច្ចសហការដ៏ល្អកន្លងមកជាមួយអង្គការសកម្មភាពប្រជាជនដើម្បីការអភិវឌ្ឍបរិយាបន្ន ហៅកាត់ថា ផាហ្វីត PAfID និងអង្គការក្រេដ (GRET) ដើម្បីចូលរួមលើកកម្ពស់ការរបស់ចូលរួមរបស់បងប្អូនមានពិការភាពជាពិសេសស្រ្តីមានពិការនៅជនបទ នៅក្នុងវិស័យកសិកម្ម ដូច្នេះសូមឲ្យអង្គការដៃគូដើម្បីពង្រីកវិសាលភាពគម្រោង បន្តជួយគាំទ្រជនមានពិការភាពជាច្រើនទៀត ដើម្បីឲ្យពួកគាត់ទទួលបាននូវជីវភាពល្អប្រសើតាមរយៈការងារកសិកម្ម ។
លោក ខេង វីរៈ នាយកប្រតិបត្តិអង្គការសកម្មភាពប្រជាជនដើម្បីការអភិវឌ្ឍបរិយាបន្ន បានលើកឡើងថា វិស័យកសិកម្មគឺពិតមានសារៈសំខាន់ក្នុងការចូលរួមចំណែកបង្កើនសេដ្ឋកិច្ចរបស់ប្រជាពលរដ្ឋនៅតាមសហគន៍។ ខណៈដែលជនមានពិការភាពកំពុងប្រឈមនូវឧបសគ្គជាច្រើនដូចជា បាត់បង់ឱកាសក្នុងការចូលរួមក្នុងសហគមន៍ មិនមានជំនាញកសិកម្មច្បាស់លាស់ ជាពិសេស សម្ភារៈកសិកម្មនៅលើទីផ្សារមិនបានបង្កភាពងាយឲ្យពួកគាត់ចូលរួមធ្វើការងារកសិកម្មបានពេញលេញនៅឡើយ ហេតុនេះអង្គការPAfID (ផាហ្វីត) កំពុងអនុវត្តគម្រោង លើកកម្ពស់សមត្ថភាពជនមានពិការភាពដើម្បីមានលទ្ធភាពរស់នៅសមរម្យតាមរយៈការធ្វើការងារកសិកម្ម។ លោកបន្តថា គម្រោងរបស់យើងទាមទារការធ្វើការងារជាមួយកសិករមានពិការតាមរយៈការរៀចំកម្មវិធិសិក្ខាសាលាសហគមន៍ចំនួន៣វគ្គខុសៗគ្នាក្នុងយល់ពីបញ្ហា និងតម្រូវការពិតប្រាកដ ដើម្បីឈានទៅដល់ការផលិតសម្ភារៈកសិកម្មបែបច្នៃប្រឌិតដើម្បីជួយសម្រួលដល់ការដាំដុំបន្លែរបស់កសិករមានពិការភាពនៅក្នុងសហគមន៍។
អ្នកស្រី សួន ភាព កសិករមានពិការភាព បានទទួលស្គាល់ថា តាមរយៈការគាំទ្រពីសំណាក់អង្គការសកម្មភាពប្រជាជនដើម្បីការអភិវឌ្ឍបរិយាបន្ន និងអង្គការក្រេដ ទៅលើសម្ភារៈកសិកម្មបែបច្នៃប្រឌិត និងជំនាញបច្ចេកទេសលើការដាំបន្លែនោះ បានធ្វើឲ្យគាត់អាចពង្រឹកការដាំបន្លែច្រើនជាងមុន ហើយបន្លែមានសុវត្ថិភាព និង អាចលក់បានតម្លៃសមរម្យ ដែលជួយឲ្យជីវភាពរបស់ពួកយើងល្អប្រសើជាងមុន៕
អត្ថបទ និងរូបភាព៖ លោក ធន់ ពូថេ
កែសម្រួល៖ លោក លីវ សាន្ត
