គណៈកម្មការកំណត់ត្រាពិភពលោក(Guinness world record) បានប្រកាសនៅរសៀលថ្ងៃទី១១ខែមេសាឆ្នាំ២០២៣ ថា កម្ពុជាជាប្រទេសដែលមានអ្នកចូលរួមបត់បេះដូង បានចំនួនបេះដូងច្រើនជាងគេនៅលើពិភពលោក ដែលមានចំនួនដល់ទៅ៣.៩១៧.៨០៥បេះដូង។
ឯកឧត្តម ហ៊ុន ម៉ានី ប្រធានសហភាពសហព័ន្ឋយុវជនកម្ពុជា មានប្រសាសន៍ថា៖ ការសម្រេចបានកំណត់ត្រាពិភពលោកនេះ ច្បាស់ណាស់គឺបានកើតចេញពីការខិតខំប្រឹងប្រឺងរបស់ប្រជាជនកម្ពុជាម្នាក់ៗ ដែលបានប្រគល់នូវទឹកចិត្តនៃក្តីស្រលាញ់ជូនចំពោះកីឡាករ កីឡាការិនី ជម្រើសជាតិតាមរយៈការបត់បេះដូងជាតំណាង នេះជាភាសាបេះដូងរបស់យើងទាំងអស់គ្នាសម្រាប់កម្ពុជា។
ឯកត្តម ហ៊ុន ម៉ានី បន្តថា ក្នុងនាមជាពលរដ្ឋខ្មែរ និងក្នុងនាមជាផ្នែកមួយនៃយុទ្ធនាការបំបែកឯតទគ្គកម្មពិភពលោកនេះ សូមថ្លែងអំណរគុណដល់បងប្អូនជនរួមជាតិទូទាំងប្រទេស ដែលបានរួមគ្នាមូលមីរចូលរួមបត់បេះដូង រហូតសម្រេចចំនួនដ៏ច្រើនមហិមានាថ្ងៃនេះ ហើយគោលបំណងនៃការបត់បេះដូងច្រើនជាងគេលើពិភពលោកនេះ មិនមែនផ្តោតសំខាន់ទៅលើការបំបែកឯតទគ្គកម្មនេះមួយមុខនោះទេ អ្វីដែលជាបំណងបន្ថែមទៀតនោះគឺការបង្កើតកម្មវិធីដែលនាំមកនូវប្រជាជនគ្រប់ទិសទី គ្រប់កោសិកាសង្គម គ្រប់ឬអាចនិយាយថាការនាំមកនូវភាពខុសគ្នា មករួមគ្នាក្នុងចំណុចដូចគ្នា លះបង់ជាមួយគ្នាក្នុងគោលដៅតែមួយ។
ព័ត៌មានជាតិ ថ្មីៗ
តាមរយៈចំនួននៃការចូលរួមហួសពីការរំពឹងទុក ពិតជាសបញ្ជាក់ពីភាសាបេះដូងសម្រាប់កម្ពុជា ព្រោះថាការចូលរួមទាំងអស់ជាកាយវិការបង្ហាញពីការខ្វល់ខ្វាយ ការយកចិត្តទុកដាក់ ការគាំទ្រសាទរ ការចែករំលែក ស្គាល់ពីទុក្ខធុរៈគ្នា ការលះបង់ពេលវេលាឬធនធានផ្ទាល់ខ្លួនសម្រាប់អត្តពលិកកម្ពុជាផង និងការចូលរួមសាទរភាពជាម្ចាស់ផ្ទះរបស់កម្ពុជាផង។ ជាមួយគ្នានេះ លើសពីការចូលរួមជាលក្ខណៈបុគ្គលមានស្ថាប័នមួយចំនួនបានយកកម្មវិធីនេះទៅបង្កើតជាយុទ្ឋនាការផ្ទាល់ខ្លួនបង្កើតជាកម្មវិធីនៃការប្រកួតប្រជែង ជាកម្មវិធីប្រូម៉ូសិនបត់បេះដូង បង្កើតជា Challeng និងប្រមូលបេះដូងបង្កើតជាផ្នែកមួយចូលរួមក្នុងកម្មវិធីបេះដូងច្រើនជាងគេនៅលើពិភពលោក។
សូមជំរាបថា៖កម្មវិធីបត់បេះដូង មានប្រជាពលរដ្ឋខ្មែរពីគ្រប់មជ្ឈដ្ឋានមកពីទូទាំង២៥រាជធានីខេត្ត មានទាំងព្រះសង្ឃ សិស្ស និស្សិត មន្ត្រីស្ថាប័នរដ្ឋ វិស័យឯកជន អង្គការសមាគមនានា ជាពិសេសសមាជិក សមាជិកា សហភាពសហព័ន្ឋយុវជនកម្ពុជា ទូទាំងប្រទេស សរុបចំនួន៧៧ស្ថាប័នបានចូលរួម កម្មវិធីបត់បេះដូងច្រើនជាងគេលើពិភពលោក។
បន្ទាប់ពីការបំបែកឯតទគ្គកម្ម បេះដូងច្រើនជាងគេលើពិភពលោក សួនបេះដូងដែលបានរៀបចំនឹងដាក់តាំនៅក្នុងព្រឹត្តិការណ៍អង្គរសង្ក្រាន្តចាប់ពីថ្ងៃទី១១ខែមេសាឆ្នាំ២០២៣ ដល់ថ្ងៃចុ0ងក្រោយនៃព្រឹត្តិការណ៍នៅបរិវេណប្រាសាទអង្គរវត្ត។
គួរំលឹកថា កំណត់ត្រាចាស់ដែលគ្រប់គ្រងដោយប្រទេសអង់គ្លេស កាលពីឆ្នាំ២០១៩នោះ មានបេះដូងដែលបត់អំពីក្រដាសនេះ ចំនួន៥៣.៧០៤ បេះដូង៕
អត្ថបទ និង រូបភាព ៖ លោក ជា ស្រស់
កែសម្រួលដោយ លីវ សាន្ត
