ដូចការគ្រោងទុករថយន្តក្រុងចំនួន ១០០គ្រឿង ផ្ដល់ដោយសម្ដេចតេជោ ហ៊ុន សែន សម្រាប់ដឹកអ្នកដំណើរពីរាជធានីភ្នំពេញ មកកាន់ខេត្តសៀមរាប បានធ្វើដំណើរមកដល់ចំណតក្នុងបរិវេណមណ្ឌលមន្ទីររដ្ឋបាលខេត្តសៀមរាប ជាបន្តបន្ទាប់ ដែលរៀបចំដោយអាជ្ញាធរខេត្តសៀមរាប នៅប្រមាណម៉ោង១២រសៀល ថ្ងៃទី១៣ ខែមេសា ឆ្នាំ២០២៣។
តាមការបញ្ជាក់ពីអ្នកបើកបររថយន្តក្រុង រថយន្តដែលបានធ្វើដំណើរមកនេះ មាន២ប្រភេទ គឺប្រភេទទី១ ដាក់អ្នកដំណើរសរុបបាន ២២នាក់ និងប្រភេទទី២ ដាក់អ្នកដំណើរសរុបបាន ៤០នាក់។ រថយន្តទាំងអស់ នឹងមកដល់ខេត្តសៀមរាបនៅថ្ងៃនេះ ដោយមួយចំនួន ត្រឡប់ទៅវិញជាមួយនឹងអ្នកដំណើរទៅកាន់រាជធានីភ្នំពេញ និងមួយចំនួនទៀតនៅសម្រាកមួយយប់ និងចេញដំណើរនៅព្រឹកថ្ងៃបន្ទាប់។
តាមការលើកឡើងពីអ្នកដំណើរ ការធ្វើដំណើរដោយមិនគិតថ្លៃតាមរយៈរថយន្តក្រុងដែលបានផ្ដល់សម្ដេចតេជោ ហ៊ុន សែន នាពេលនេះ បានជួយកាត់បន្ថយការចំណាយរបស់ពួកគាត់យ៉ាងច្រើន លើសពីនោះ ពួកគាត់មានលទ្ធភាពធ្វើដំណើរមកលេងខេត្តសៀមរាប ជាលក្ខណៈគ្រួសារ ដែលពួកកម្រនឹងមានឱកាសបែបនេះណាស់ ដោយសារតែការចំណាយច្រើន។
គួររំលឹកថា កាលពីថ្ងៃទី៦ ខែមីនាកន្លងទៅ សម្តេចតេជោ ហ៊ុន សែន បានសម្រេចប្រើប្រាស់រថយន្តក្រុងរបស់រដ្ឋចំនួន ៣៤៥គ្រឿង សម្រាប់សម្រួលដល់ការធ្វើដំណើររបស់ប្រជាពលរដ្ឋ ទៅកាន់ស្រុកកំណើតដោយឥតគិតថ្លៃ ក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ រយៈពេល ៥ថ្ងៃ ចាប់ពីថ្ងៃទី១៣ ដល់ថ្ងៃទី១៧ ខែមេសា ឆ្នាំ២០២៣។
អត្ថបទ និង រូបភាព ៖ លោក សេង ផល្លី និងសហការី
