ស្របពេលព្រះរាជាណាចក្រកម្ពុជា កំពុងស្ថិតលើមាគ៌ាអភិវឌ្ឍយ៉ាងល្អប្រសើរលើគ្រប់វិស័យ ក្នុងក្របខណ្ឌសន្តិភាព ស្ថិរភាពនយោបាយ សន្តិសុខ សណ្ឌាប់ធ្នាប់សង្គម ការរៀបចំព្រឹត្តិការណ៍អង្គរសង្ក្រាន្ត មានតម្លៃយ៉ាងជ្រាលជ្រៅសម្រាប់ការអភិវឌ្ឍសេដ្ឋកិច្ច សង្គមកិច្ច តាមរយៈការលើកកម្ពស់តម្លៃវប្បធម៌ និងសង្គមធម៌ នេះបើតាមការលើកឡើង ឯកឧត្តម ទៀ សីហា អភិបាលខេត្តសៀមរាប ក្នុងពិធីបើកព្រឹត្តិការណ៍អង្គរសង្ក្រាន្ត នៅបរិវេណព្រះលានជល់ដំរី នាព្រឹកថ្ងៃទី១៤ ខែមេសា ឆ្នាំ២០២៣ ក្រោមអធិបតីភាពដ៏ខ្ពង់ខ្ពស់របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន។
ឯកឧត្តម ទៀ សីហា បន្ថែមថា សក្ដានុពលលើវិស័យទេសចរណ៍ និងកសិកម្ម របស់ខេត្តសៀមរាប គឺជាកាលានុវត្តភាព សម្រាប់ជំរុញឱ្យមានកំណើនសេដ្ឋកិច្ចសង្គម និងការអភិវឌ្ឍគួរឱ្យកត់សម្គាល់ក្នុងរយៈពេលកន្លងមក ដែលបានដើរតួយ៉ាងសំខាន់ ក្នុងការរួមចំណែក និងសម្រេចបាននូវគោលដៅជាយុទ្ធសាស្ត្រក្នុងការកាត់បន្ថយភាពក្រីក្ររបស់ប្រជាពលរដ្ឋ។ ទន្ទឹមនោះ ឯកឧត្តម នឹងបេ្ដជ្ញាពង្រឹងកិច្ចការដ្ឋបាល បម្រើសេវាសាធារណៈ និងជំរុញល្បឿននៃការអភិវឌ្ឍខេត្ត ឱ្យកាន់តែល្អប្រសើរ។
ឯកឧត្តមអភិបាលខេត្ត បានថ្លែងអំណរគុណ និងគាំទ្រ ដល់សហភាពសហព័ន្ធយុវជនកម្ពុជា ដែលបានរៀបចំនូវមហាព្រឹត្តិការណ៍វប្បធម៌ នេះឡើង នៅលើទឹកដីខេត្តសៀមរាប នាពេលកន្លងមក និងនៅឆ្នាំនេះផ្ទាល់។ ព្រឹត្តិការណ៍អង្គរសង្ក្រាន្ត ក្រោមប្រធានបទ “ក្ដីស្រមៃ និងក្ដីសង្ឃឹម” នៅឆ្នាំនេះ គឺជាសក្ខីភាពក្នុងការលើកទឹកចិត្តដ៏សំខាន់ដល់យុវជន ឱ្យបន្តកិច្ចប្រឹងប្រែងទាំងកម្លាំងកាយ កម្លាំងចិត្ត និងប្រាជ្ញា ដើម្បីអភិវឌ្ឍន៍ខ្លួនឱ្យរឹងមាំសម្រាប់អភិវឌ្ឍជាតិនាពេលអនាគត។
អត្ថបទ និង រូបភាព ៖ លោក សេង ផល្លី និងសហការី
