ព្រះចៅអធិការ គណៈកម្មការ អាចារ្យវត្តអារញ្ញសាគរ ក្រុងសៀមរាប ដោយបានការសហការគាំទ្រពីអាជ្ញាធរមូលដ្ឋាន និងប្រជាពុទ្ឋបរិស័ទចំណុះជើងវត្ត បានរៀបចំពិធីពូនភ្នំខ្សាច់ ស្រង់ព្រះ ឬហៅថាឆ្លងចេត្រ និងឱបស្ទបនូវការចែកទេយ្យទានដល់គ្រួសារខ្វះខាត ចាស់ជរាគ្មានទីពឹង អ្នកមានពិការភាព ចំនួន ១២៥គ្រួសារ រស់នៅភូមិអារញ្ញ សង្កាត់សៀមរាប ក្រុងសៀមរាប។ ពិធីនេះដែរក៏មានការចូលរួមពី លោក ពិន ប្រាកដ អភិបាលរងខេត្ត និងលោក ម៉ៃ សាម៉េត ចៅសង្កាត់សៀមរាប រួមទាំងព្រះសង្ឃ និងប្រជាពលរដ្ឋជាច្រើនរូប។
ព្រះវិភត្តិមុនីញាណ ហ៊ាក់ គឹមហ៊ត់ វិសារទោ ព្រះចៅអធិការវត្តអារញ្ញសាគរ មានសង្ឃដីកាបញ្ជាក់ថា ពិធីស្រង់ព្រះ ដែលជាការលាងសំអាតព្រះពុទ្ឋបដិមា ស្រង់ទឹក ដល់ព្រះសង្ឃ មាតាបិតា គ្រូឧបជ្ឈាយ៍ជាដើម គឺទទួលបានផលានិសង្សច្រើនណាស់ ហើយអនាគតជាតិនឹងបានទៅកើតក្នុងឋានទេវលោកបានសេចក្តីសុខ គ្រប់បែបយ៉ាង។ ដោយសារមានជំនឿ និងទំនៀមទម្លាប់របស់ដូនតាយើង ដូច្នេះហើយទើបបានជាប់ជាប្រពៃណីនេះមានរហូតមកដល់សព្វថ្ងៃ ឲ្យតែដល់ពេល ឬក្រោយចូលឆ្នាំថ្មីម្តងៗគេតែតែងធ្វើពិធីស្រង់ទឹកពុទ្ធរូប ព្រះសង្ឃ មាតាបិតា ជីដូនជីតានៅតាមទីអារាម និងភូមិស្រុកនានា អ្នកខ្លះហៅថាពិធីឆ្លងចែត្រ។ ហើយដោយឡែក ចំពោះទេយ្យទានជាគ្រឿងឧបភោគបរិភោគ និងថវិកា ដែលបានចែកជូនប្រជាពលរដ្ឋនាពេលនេះ បានមកពីការប្រគេនរបស់ប្រជាពុទ្ឋរិស័ទក្នុងឱកាសចូលឆ្នាំប្រពៃណីជាតិខ្មែរ និងមួយចំនួនទៀត បានពីការសន្សំទុកតាមរយៈពិធីបុណ្យផ្សេងៗ តែដោយមើលឃើញពីភាពខ្វះខាតជាក់ស្តែងរបស់បងប្អូនប្រជាពលរដ្ឋទាំង ១២៥គ្រួសារ ព្រះសង្ឃក៏បានពិភាក្សាជាមួយគណៈកម្មការវត្តធ្វើការបែងចែកជូននាពេលនេះ ដោយក្នុងមួយគ្រួសារទទួលបានថវិកាចំនួន ២ម៉ឺនរៀល អង្ករ ទឹកត្រី ទឹកស៊ីអ៊ីវ ទឹកដោះគោ តែ ស្ករ មី ទឹកក្រូច និងសម្ភារៈផ្ទះបាយ១កញ្ចប់ធំទៀត។
មានប្រសាសន៍ក្នុងពិធីនោះ លោក ពិន ប្រាកដ បានសំដែងនូវការកោតសរសើរ ចំពោះព្រះចៅអធិការ អាចារ្យ គណៈកម្មការវត្ត និងពុទ្ធបរិស័ទចំណុះជើងវត្តទាំង អស់ ដែលបានប្រឹងប្រែងយកព្រះទ័យ និងយកចិត្តទុកដាក់ក្នុងការថែរក្សានិងអភិរក្សប្រពៃណី វប្បធម៌ ទំនៀមទម្លាប់ដូនតាខ្មែរ ញ៉ាំងឱយវិស័យពុទ្ធចក្រកាន់តែរីកចំរើនគង់វង្សស្ថិតស្ថេរថែមទៀត។ លើសពីនេះជារឿយៗ ព្រះចៅអធិការវត្តនេះតែងតែយកព្រះទ័យទុកដាក់ចំពោះទុគតជន ជនមានពិការភាព ចាស់ជរា ដែលមានលំនៅឋានក្បែរៗវត្ត ចែករំលែកនូវទេយ្យទាន គ្រឿងឧបភោគបរិភោគ ទៅតាមលទ្ឋភាពដែលព្រះអង្គមាន នេះជាវប្បធម៌ចែករំលែក និងជាការស្គាល់ទុកធុរៈគ្នាទៅវិញទៅមកតាមលំអានដូនតាខ្មែរយើងធ្លាប់ធ្វើពីមុនមក។ លោកអភិបាលរងខេត្តបន្តថា កម្ពុជាក្រោមការដឹកនាំរបស់រាជរដ្ឋាភិបាល ដែលមានសម្តេចតេជោ ហ៊ុនសែន ជាប្រមុខដឹកនាំ បានធ្វើអោយប្រទេសជាតិមាន សុខសន្តិភាព និងការអភិវឌ្ឍន៏ រីកចំរើនគ្រប់វិស័យ ទាំងអាណាចក្រ និងពុទ្ធចក្រ ពិសេសតាមរយៈគោលនយោបាយឈ្នះ ឈ្នះ របស់សម្តេចតេជោ ប្រទេសកម្ពុជាទាំងមូលទទួលបាននូវការផ្សះផ្សារជាតិ សន្តិភាព ឯកភាពជាតិ ប្រជាធិបតេយ្យ សន្តិសុខ ស្ថេរភាពនយោបាយនិងពង្រឹងឡើងវិញលើគ្រប់វិស័យទាំងអាណាចក្រ និងពុទ្ធចក្រ ហើយបងប្អូនប្រជាពលរដ្ឋមានសិទ្ឋិសេរីភាពនិងអាចជួបជុំធ្វើបុណ្យទានបានគ្រប់ទីកន្លែងដោយពុំមានការភ័យខ្លាច៕
អត្ថបទ និងរូបភាព៖ លោក យូ វង្ស
កែសម្រួល៖ អ៊ុន ណារាជ្យ
