បើទោះបីជាពិធីបុណ្យចូលឆ្នាំថ្មីប្រពៃណីជាតិខ្មែរ ជាពិសេសព្រឹត្ដិការណ៍អង្គរសង្ក្រាន្ដបានបញ្ចប់ទៅហើយក្ដី ប៉ុន្ដែគេឃើញប្រជាពលរដ្ឋខ្មែរ ក៏ដូចជាភ្ញៀវទេសចរជាតិ និងអន្ដរជាតិ នៅតែបន្ដទស្សនាសួនបេះដូងបត់ នៅក្នុងបរិវេណអង្គរជាបន្ដបន្ទាប់ ដើម្បីផ្ដិតយករូបភាពទុកជាអនុស្សាវរីយ៍។
បើតាមលោក ឡេក គឹមលីន ប្រធានគ្រប់គ្រងភ្នាក់ងារទេសចរនៅប្រាសាទអង្គរ នៃអាជ្ញាធរជាតិអប្សរា បានឱ្យដឹងនៅថ្ងៃទី១៩ ខែមេសានេះថា រយៈពេល២ថ្ងៃ គឺចាប់ពីថ្ងៃទី១៧-១៨ ខែមេសា ឆ្នាំ២០២៣នេះ អ្នកទេសចរជាតិ និងអន្ដរជាតិ ទៅស្សនាបេះដូងបត់នៅសួនបេះដូងក្នុងបរិវេណប្រាសាទអង្គរជាង ៣ម៉ឺន ៦ពាន់នាក់ បន្ទាប់ពីបញ្ចប់ពិធីព្រឹត្ដិការណ៍អង្គរសង្ក្រាន្ដ នៃពិធីអបអរចូលឆ្នាំថ្មីប្រពៃណីខ្មែរ។ លោកថានៅថ្ងៃខាងមុខនេះ ក្រុមការងាររៀបចំបេះដូងនឹងដកចេញវិញ ប៉ុន្ដែយ៉ាងនេះក្ដី មន្ដ្រីអាជ្ញាធរជាតិអប្សរារូបនេះ ក៏បានអំពាវឱ្យប្រជាពលរដ្ឋទៅទស្សនាប្រាសាទអង្គរវត្ដបន្ដទៀត ហើយស្នើរឱ្យជួយថែរក្សាបរិស្ថាន គោរពក្រមប្រតិបត្ដិអង្គររួមមាន ការស្លៀកពាក់ខ្លី សិចស៊ី ហាមប៉ះក្បាច់ចម្លាក់ ស្រែកឡូឡា ហាមជក់បារីជាដើម ដើម្បីរក្សានិងលើកតម្លៃវប្បធម៌ អរិយធម៌ខ្មែរ។
អ្នកទេសចរដែលបានចូលមកកំសាន្តនៅទីតាំងនេះ ពួកគាត់មានការសប្បាយរីករាយ បើទោះបីពួកគាត់មិនបានទៅទស្សនានាថ្ងៃចូលឆ្នាំខ្មែរក្ដី។ ពួកគាត់បានលើកឡើងថា បេះដូងបត់រាប់លានដែលបានដោតធ្វើជាអក្សរបេះដូងខ្មែរនៅបរិវេណប្រាសាទអង្គរនេះ បង្ហាញពីភាពអស្ចារ្យនូវស្នាដៃឆ្នៃប្រឌិតបានល្អឯករបស់ខ្មែរ ដែលធ្វើឱ្យអ្នកទេសចរជាតិ និងអន្ដរជាតិចាប់អារម្មណ៍ទៅទស្សនាកំសាន្ដរាប់លាននាក់ ដែលធ្វើឱ្យដួងចិត្ដពួកគាត់សប្បាយរីករាយ និងបានថតរូបទុកជាអនុស្សាវរីយ៍នូវបេះដូងបត់ដែលមិនធ្លាប់មានកន្លងមក៕
ព័ត៌មានជាតិ ថ្មីៗ
អត្ថបទ និងរូបភាព៖ លោក បូ សាវី
កែសម្រួល៖ អ៊ុន ណារាជ្យ
