អាជ្ញាធរខេត្តសៀមរាប នៅថ្ងៃទី១៩ ខែមេសា ឆ្នាំ២០២៣នេះ បានចេញសេចក្ដីណែនាំមួយ ដោយបានធ្វើការព្រមានបិទអាជីវកម្ម ចំពោះម្ចាស់អាជីវកម្មកម្សាន្តទាំងឡាយណា ដែលមិនគោរពតាមសេចក្តីណែនាំ និងលិខិតបទដ្ឋាននានាដែលមានជាធរមានបានណែនាំ។
យោងតាមសេចក្តីណែនាំខាងលើ បានបញ្ជាក់ថា ដើម្បីធានាបាននូវសន្តិសុខ សុវត្ថិភាព និងសុខុមាលភាពរបស់ប្រជាពលរដ្ឋ ក៏ដូចជាការរៀបចំសណ្តាប់ធ្នាប់របៀបរៀបរយសាធារណៈ សំដៅកាត់បន្ថយការរំខានដោយសំឡេង រួមទាំងការប្រកបអាជីវកម្មស្របតាមច្បាប់ និងលិខិតបទដ្ឋានគតិយុត្តជាធរមាន រដ្ឋបាលខេត្តសៀមរាប សូមណែនាំ និងអនុវត្តកិច្ចការមួយចំនួនដូចខាងក្រោម៖
-មន្ទីរបរិស្ថានខេត្ត មន្ទីរទេសចរណ៍ខេត្ត និងរដ្ឋបាលក្រុង-ស្រុក បន្តជំរុញផ្សព្វផ្សាយ និងចុះអប់រំ ណែនាំដល់ម្ចាស់អាជីវកម្មរង្គសាល ឌីស្កូតែក ខារ៉ាអូខេ បៀរហ្កាឌិន ការប្រគំតន្ត្រី ឬការរៀបចំកម្មវិធីនានា និងបងប្អូនប្រជាពលរដ្ឋដែលមានការបង្កជាសំឡេងរំខាន ដោយត្រូវអនុវត្តគោលការណ៍ដូចខាងក្រោម៖
១.ពេលវេលាដំណើរការ៖ អាជីវកម្មរង្គសាល ឌីស្កូតែក បៀរហ្គាឌិន ការប្រគំតន្ត្រី និងកម្មវិធីនានា ចាប់ដំណើរការពីម៉ោង ១៨៖០០នាទី ដល់ម៉ោង ២៤៖០០នាទី។ ហើយអាជីវកម្មខារ៉ាអូខេ ចាប់ដំណើរការពីម៉ោង ១០៖០០នាទី ដល់ម៉ោង២៤៖០០នាទី។
២.កម្រិតកំណត់ស្តង់ដារសំឡេងអតិបរមា ដែលអនុញ្ញាតនៅតំបន់លំនៅឋាន ដូចជា តំបន់ស្ងប់ស្ងៀមដូចជា មន្ទីរពេទ្យ បណ្ណាល័យ សាលារៀន និងសាលាមត្តេយ្យ៖ គឺចាប់ពីម៉ោង ០៦ព្រឹក-១៨ល្ងាច កម្រិតសំឡេង 45ដេស៊ីប៊ែល, ពីម៉ោង ១៨ល្ងាច-២២យប់ កម្រិតសំឡេង 40ដេស៊ីប៊ែល, ពីម៉ោង ២២-៦ព្រឹក កម្រិត 35ដេស៊ីប៊ែល។ ចំពោះតំបន់លំនៅឋានរួមមាន សណ្ឋាគារ ផ្ទះសំណាក់ ប៊ូទិក ទីកន្លែងរដ្ឋបាល ភូមិគ្រឹះនិងផ្ទះល្វែង៖ គឺចាប់ពីម៉ោង ៦ព្រឹក-១៨ល្ងាច កម្រិតសំឡេង 60ដេស៊ីប៊ែល, ពីម៉ោង ១៨ល្ងាច-២២យប់ កម្រិតសំឡេង 50ដេស៊ីប៊ែល, ពីម៉ោង ២២យប់-៦ព្រឹក កម្រិតសំឡេង 45ដេស៊ីប៊ែល។ តំបន់ពាណិជ្ជកម្ម សេវាកម្ម និងចម្រុះ៖ គឺចាប់ពីម៉ោង ៦ព្រឹក-១៨ល្ងាច កម្រិតសំឡេង 70ដេស៊ីប៊ែល, ពីម៉ោង ១៨ល្ងាច-២២យប់ កម្រិតសំឡេង 65ដេស៊ីប៊ែល និងពីម៉ោង ២២យប់-៦ព្រឹក កម្រិតសំឡេង 50ដេស៊ីប៊ែល។ តំបន់ឧស្សាហកម្មធន់ស្រាលលាយចម្រុះនៅក្នុងតំបន់លំនៅឋាន៖ គឺចាប់ពីម៉ោង ៦ព្រឹក-១៨ល្ងាច កម្រិតសំឡេង 75ដេស៊ីប៊ែល, ពីម៉ោង ១៨ល្ងាច-២២យប់ កម្រិតសំឡេង 70ដេស៊ីប៊ែល, ពីម៉ោង ២២យប់-៦ព្រឹក កម្រិតសំឡេង 50ដេស៊ីប៊ែល នៅក្នុងមូលដ្ឋាន និងតាមសមត្ថកិច្ចរបស់ខ្លួន។
លិខិតដដែលបន្ថែមថា ចំពោះម្ចាស់ ឬអ្នកគ្រប់គ្រងដែលប្រកបអាជីវកម្មគ្រប់ប្រភេទរួមមាន៖ អាជីវកម្មរង្គសាល ឌីស្កូតែក ខារ៉ាអូខេ បៀរហ្គាឌិន អាជីវកម្មផ្សេងៗទៀត និងការប្រគំតន្ត្រី ឬការរៀបចំកម្មវិធីនានា ត្រូវចូលរួមសហការជាមួយមន្ទីរ-អង្គភាព និងរដ្ឋបាលក្រុង-ស្រុក ឃុំ-សង្កាត់ និងត្រូវអនុវត្ត ដូចមានចែងក្នុងខ្លឹមសារចំណុចទី២ នៃសេចក្ដីណែនាំនេះ។ ក្នុងនោះមន្ទីរទេសចរណ៍ខេត្ត មន្ទីរបរិស្ថានខេត្ត ស្នងការដ្ឋាននគរបាលខេត្ត បញ្ហាការដ្ឋានកងរាជអាវុធហត្ថខេត្ត និងរដ្ឋបាលក្រុង-ស្រុក ត្រូវតាមដាន ត្រួតពិនិត្យ និងចាត់វិធានការចំពោះម្ចាស់ ឬអ្នកគ្រប់គ្រងអាជីវកម្មគ្រប់ប្រភេទរួមមាន៖ អាជីវកម្មរង្គសាល ឌីស្គូតែក ខារ៉ាអូខេ បៀរហ្គាឌិន អាជីវកម្មផ្សេងៗទៀត និងការប្រគំតន្ត្រី ឬការរៀបចំកម្មវិធីនានា ដែលប្រព្រឹត្តផ្ទុយនឹងសេចក្ដីណែនាំខាងលើនេះ និហមិនអនុវត្តតាមវិធានការដែលបានណែនាំនេះ រដ្ឋបាលខេត្ត ក្រុង-ស្រុក មន្ទីរ-អង្គភាព និងសមត្ថកិច្ចជំនាញពាក់ព័ន្ធ ត្រូវផ្អាកជាបណ្ដោះអាសន្ន ឬជាស្ថាពរចំពោះអាជីវកម្មរង្គសាល ឌីស្លតែក ខារ៉ាអូខេ បៀរហ្គាឌិន និងការប្រគំតន្ត្រី ឬការរៀបចំកម្មវិធីនានា ស្របតាមនីតិវិធីឡាយ លិខិតបទដ្ឋានគតិយុត្តិជាធរមាន៕
ព័ត៌មានជាតិ ថ្មីៗ
អត្ថបទ៖ ជា ស្រស់
កែសម្រួល៖ អ៊ុន ណារាជ្យ
