មន្រ្តីក្រសួងព័ត៌មានចំនួន ៣១រូប បានចូលរួមវគ្គបណ្តុះបណ្តាលស្តីពីជំនាញថតរូបនិងបច្ចេកទេស សម្រាប់ព្រឹត្តិការណ៍ស៊ីហ្គេម ដេីម្បីទទួលបានបទពិសោធន៍ថ្មីៗបន្ថែមទៀត សម្រាប់ជំរុញ និងលេីកកម្ពស់តម្លៃជំនាញវិជ្ជាជីវ:របស់បណ្តាសិក្ខាកាមទាំងអស់ ពិសេសរួមចំណែក ធ្វេីឱ្យជោគជ័យក្នុងព្រឹត្តិការណ៍កីឡាស៊ីហ្គេមលើកទី៣២ ដែលកម្ពុជាធ្វើជាម្ចាស់ផ្ទះ។ វគ្គបណ្តុះបណ្តាលនេះដែរ រឿបចំឡើងនៅប្រទេសវៀតណាម នាថ្ងៃទី២០ ខែមេសា ឆ្នាំ២០២៣នេះ។
ឯកឧត្តម ជ្រីម ឆេងលីម ទីប្រឹក្សា និងជាអគ្គនាយករង ទទួលបន្ទុកជាប្រធាននាយកដ្ឋានរដ្ឋបាលទូទៅ នៃអគ្គនាយកដ្ឋានរដ្ឋបាល ក្រសួងព័ត៌មាន មានប្រសាសន៍ថា ការរៀបចំវគ្គបណ្ដុះបណ្ដាលជំនាញបច្ចេកទេសថតរូបសម្រាប់ព្រឹតិ្តការណ៍ស៊ីហ្គេម ជូនដល់សិក្ខាកាមជាមន្ត្រីរបស់ក្រសួងព័ត៌មានកម្ពុជានាពេលនេះ គឺពិតជាមានសារៈសំខាន់ខ្លាំងណាស់ ខណៈគិតមកដល់ពេលនេះ កម្ពុជានៅសល់តែ ១៥ថ្ងៃទៀតប៉ុណ្ណោះ ដែលកម្ពុជានឹងក្លាយទៅជាម្ចាស់ផ្ទះរៀបចំព្រឹត្តិការណ៍កីឡាស៊ីហ្គេមជាលើកដំបូង។
ព័ត៌មានជាតិ ថ្មីៗ
ឯកឧត្តម បន្តថា នៅព្រឹត្តិការណ៍កីឡាស៊ីហ្គេម គឺមានការផ្សាយផ្ទាល់នៅក្នុងកម្មវិធីបើក និងបិទជាផ្លូវការ តាមរយៈការផ្សាយផ្ទាល់ដល់បណ្ដាស្ថានីយទូរទស្សន៍នានារបស់កម្ពុជា រួមទាំងការផ្ដិតយក នូវរូបភាពសន្លឹករបស់កីឡាករតាមវិញ្ញាសាប្រកួតនីមួយៗ ដែលនេះគឺពិតជាសំខាន់ណាស់ ព្រោះរូបភាពដែលត្រូវបានថតដោយអ្នកមានស្នាដៃបច្ចេកទេស និងបំនិនប្រសប់ខ្ពស់នោះ នឹងមានតម្លៃយ៉ាងពិសេស ហើយរូបទាំងអស់នោះនឹងត្រូវបានរក្សាទុកជាឯកសារសម្រាប់ប្រើប្រាស់ទៅថ្ងៃអនាគតជាក់ជាពុំខានឡើយ។ ឯកឧត្តមជឿជាក់ថា វគ្គបណ្តុះបណ្តាលជំនាញបច្ចេកទេសថតរូបនេះ នឹងផ្តល់ឱ្យសិក្ខាកាមទាំងអស់នូវគុណវុឌ្ឍថ្មី និងការដកស្រង់បាននូវបទពិសោធន៍ថ្មីៗបន្ថែមទៀត សម្រាប់ជំរុញនិងលេីកកម្ពស់តម្លៃជំនាញវិជ្ជាជីវៈរបស់បណ្តាសិក្ខាកាមទាំងអស់ ពិសេសរួមចំណែកធ្វេីឱ្យជោគជ័យ ក្នុងព្រឹត្តិការណ៍កីឡាស៊ីហ្គេម តាមរយៈបំណិនក្នុងការផ្តិតយករូបភាពនានាក្នុងព្រឹត្តិការណ៍។
បើតាមលោកស្រី Mai Huong Giang (ម៉ៃ ហឿង សាង ) អគ្គនាយករង នៃអគ្គនាយកដ្ឋានសារព័ត៌មាន ក្រសួងព័ត៌មាន និងសារគមនាគមវៀតណាម បានឱ្យដឹងថា កាលពីឆ្នាំ២០២២កន្លងទៅ ប្រទេសវៀតណាមបានរៀបចំព្រឹតិ្តការណ៍ស៊ីហ្គេម ក្នុងនោះក៏មានអ្នកសារព័ត៌មានកម្ពុជា បានមកចូលរួមកម្មវិធីបើ និងបិទព្រឹត្តិការណ៍កីឡាស៊ីហ្គេមលើកទី៣១ ដើម្បីផ្លាស់ប្តូរនិងដកស្រង់បទពិសោធន៍នាពេលនោះដែរ។ បន្ទាប់មកភាគីទាំងពីរក៏បានពិភាក្សាគ្នាអំពីកម្មវិធីបន្តបន្ទាប់ ក្នុងនោះគឺវគ្គបណ្ដុះបណ្ដាលសម្រាប់អ្នកសារព័ត៌មានកម្ពុជា លើប្រធានបទស្តីពីជំនាញថតរូប បច្ចេកទេសសម្រាប់ព្រឹតិ្តការណ៍ស៊ីហ្គេម។ ដូច្នេះការចូលរួមនាពេលនេះ របស់សិក្ខាកាមកម្ពុជា នឹងអាចមានបទពិសោធន៍ក្នុងអាជីពរបស់ខ្លួន ដើម្បីអនុវត្តជាក់ស្ដែងនៅក្នុងការរៀបចំព្រឹត្តិការណ៍ស៊ីហ្គេម លើកទី៣២ នាពេលខាងមុខនេះក្នុងប្រទេសរបស់ខ្លួន។ លោកស្រី ជឿជាក់ថាសិក្ខាកាមកម្ពុជា នឹងទទួលបានជំនាញបច្ចេកទេសថត ពីអ្នកជំនាញរបស់ប្រទេសវៀតណាម ដែលមានបទពិសោធន៍ជាច្រើនឆ្នាំ ក្នុងការថតរូបកីឡា ដែលមិនត្រឹមតែក្នុងព្រឹត្តិការណ៍ស៊ីហ្គេមប៉ុណ្ណោះទេ ថែមទាំងនៅក្នុងព្រឹត្ដិការណ៍ កីឡាធំៗទៀតផងដែរ។
សូមបញ្ជាក់ថា វគ្គបណ្ដុះបណ្ដាលជំនាញថតរូបសម្រាប់ព្រឹត្តិការណ៍ស៊ីហ្គេម ប្រព្រឹត្តទៅចាប់ពីថ្ងៃទី១៩ ដល់២៥ ខែមេសា ឆ្នាំ២០២៣ នៅទីក្រុងហូជីម៉ិញ ប្រទេសវៀតណាម ដែលមានសិក្ខាកាមនៃក្រសួងព័ត៌មានសរុបចំនួន៣១រូប ៕
អត្ថបទ និងរូបភាព៖ លោក យូ វង្ស
កែសម្រួល៖ អ៊ុន ណារាជ្យ
