បើគិតត្រឹមឆ្នាំ២០២២ ភ្ញៀទេសចរអន្តរជាតិមកកាន់ខេត្តសៀមរាប មានចំនួនសរុបប្រមាណ ២៨មុឺននាក់ ដោយឡែកគិតត្រឹម ៣ខែដើមឆ្នាំ២០២៣ ភ្ញៀទេសចរអន្តរជាតិមានចំនួនសរុបប្រមាណ ២៤ម៉ឹននាក់រួចទៅហើយ ដែលតួលេខនេះបានបង្ហាញពីការងើបឡើងវិញនៃវិស័យទេសចរណ៍ក្នុងខេត្ត នេះបើតាមការលើកឡើងរបស់ លោក យុន លីនណេ អភិបាលរងខេត្តសៀមរាប ក្នុងវេទិកាពិភាក្សា និងចែករំលែកបទពិសោធ ស្ដីពីការសិក្សាស្រាវជ្រាវ និងគោលនយោបាយទេសចរណ៍មួយ នៅថ្ងៃទី២០ ខែមេសា ឆ្នាំ២០២៣។
លោក យុន លីនណេ បញ្ជាក់ថា ការទទួលបានកំណើនចំនួនភ្ញៀវទេសចរ នៃក្ដីសង្ឃឹមនេះ គឺដោយសារតែប្រទេសកម្ពុជាមានសន្តិភាព ការគ្រប់គ្រងការរីករាលដាលនៃជំងឺកូវីដ១៩ បានយ៉ាងមានប្រសិទ្ធរបស់រាជរដ្ឋាភិបាល និងអាជ្ញាធរខេត្ត រហូតទទួលបានចំណាត់ថ្នាក់លេខ១ ក្នុងចំណោមប្រទេស១៦៦ និងការត្រៀមលក្ខណៈទទួលឧស្សាហកម្មទេសចរណ៍ SOP។ លើសពីនោះ សមិទ្ធផលហេដ្ឋារចនាសម្ព័ន្ធផ្លូវ ៣៨ខ្សែ ការកែលម្អសោភណ្ឌភាពស្ទឹងសៀមរាប ដែលផ្ដល់ដោយសម្ដេចតេជោ ហ៊ុន សែន និងគម្រោងទីក្រុងឆ្លាតវៃ ព្រមជាមួយការបើកដំណើរការនូវព្រលានយន្តហោះអន្តរជាតិសៀមមរាប អង្គរនាខែតុលាខាងមុខ នឹងជួយជំរុញឱ្យខេត្តទេសចរណ៍ដ៏ធំមួយនេះ កាន់តែមានសក្ដានុពល អាចទទួលភ្ញៀវទេសចរពីជុំវិញពិភពលោក។
ជាមួយនោះ ឯកឧត្តម ថុក សុខុម រដ្ឋលេខាធិការក្រសួងទេសចរណ៍ ក៏បានលើកឡើងផងដែរថា នាដើមឆ្នាំ២០២៣នេះ ក្រុមការងាររាជរដ្ឋាភិបាល និងឯកជន ដើម្បីស្តារ និងលើកស្ទួយវិស័យទេសចរណ៍កម្ពុជា ក្នុងនិងក្រោយវិបត្តិជំងឺកូវីដ-១៩ បានសម្រេចឯកភាពលើផែនការសកម្មភាពសំខាន់ ៥ចំណុច ដើម្បីបន្តការទាក់ទាញភ្ញៀវទេសចរអន្តរជាតិ និងជួយគាំទ្រដល់យុទ្ធនាការ “ឆ្នាំទស្សនាកម្ពុជា២០២៣ (Visit Cambodia Year 2023)” ក្រោមទិសស្លោក “រាល់ថ្ងៃ គឺជាអច្ឆរិយ: (Every day is a Wonder)”។ ឈរលើមូលដ្ឋាននៃការកម្រើកឡើងវិញនៃចរន្តទេសចរណ៍សកលលោក ក៏ដូចជាទេសចរណ៍ តំបន់ ជាមួយនឹងកិច្ចអន្តរាគមន៍ប្រកបដោយស្មារតីបុរេសកម្មរបស់រាជរដ្ឋាភិបាលកម្ពុជា យើងរំពឹងថានឹងអាចទទួលបានភ្ញៀវទេសចរអន្តរជាតិក្នុងរង្វង់ប្រមាណ ២ លាននាក់ នៅក្នុង២០២៣ ដែលជាឆ្នាំដែលកម្ពុជានឹងធ្វើជាម្ចាស់ផ្ទះ ព្រឹត្តិការណ៍កីឡាស៊ីហ្គេម-អាស៊ានប៉ារ៉ាហ្គេមផងដែរ។
សូមរំលឹកថា សម្រាប់រយៈពេល ៣ថ្ងៃ នៃពិធីបុណ្យចូលឆ្នាំខ្មែរប្រពៃណីជាតិ ដែលទើបបញ្ចប់ទៅថ្មីៗនេះ ប្រទេសកម្ពុជា ទទួលបានភ្ញៀវទេសចរសរុបជាង ១៣លាននាក់ ក្នុងនោះ ទេសចរជាតិមានប្រមាណជាង ១៣លាននាក់ និងទេសចរអន្តរជាតិមានជាង ៥ម៉ឺននាក់។ ក្នុងនោះដែរ ខេត្តសៀមរាប ទទួលបានភ្ញៀវទេសចរជាង ២លាននាក់ និងជាប់ចំណាត់ថ្នាក់លេខ១ ជាខេត្តមានទេសចរទៅកម្សាន្តច្រើនជាងគេបំផុត។
អត្ថបទ និងរូបភាព៖ លោក ស៊ាន សុផាត
កែសម្រួល៖ លោក សេង ផល្លី
