នៅព្រឹកថ្ងៃទី២១ ខែ មេសា ឆ្នាំ២០២៣ សាខាកាកបាទក្រហមកម្ពុជាខេត្តសៀមរាបដឹកនាំដោយ លោក ចៅ ម៉ៅមុន្នី សមាជិកគណៈកម្មាធិការសាខាកាកបាទក្រហមកម្ពុជាខេត្ត បាននាំយកអំណោយមនុស្សធម៌ ទៅចែកជូនគ្រួសាររងគ្រោះដោយខ្យល់កន្ត្រាក់ ចំនួន៣៥គ្រួសារ មកពី៣ឃុំ ស្មើ៧ភូមិក្នុងស្រុកស្វាយលើ ខេត្តសៀមរាប ស្ថិតក្នុងបរិវេណសាលាបឋមសិក្សា អូររូង ឃុំតាសៀម ស្រុកស្វាយលើ ខេត្តសៀមរាប ។
តាមរបាយការណ៍ របស់អនុសាខាកាកបាទក្រហមកម្ពុជាស្រុកស្វាយលើ បង្ហាញថា កាលពីថ្ងៃទី១៥ ខែមេសា ឆ្នាំ២០២៣ មានគ្រោះធម្មជាតិ ខ្យល់កន្ត្រាក់ លាយឡំនឹងភ្លៀង ផ្គររន្ទះ ធ្វើឱ្យប៉ះពាល់លើ ឃុំចំនួន៣ ក្នុងចំណោមឃុំចំនួន៥ ក្នុងស្រុកស្វាយលើ រួមមានឃុំកន្ទួត ឃុំតាសៀម និងឃុំស្វាយលើ និងបណ្តាលឲ្យ រលំផ្ទះ ៥ខ្នង និង របើកដំបូល ៣០ខ្នង ព្រមទាំង មានប្រជាពលរដ្ឋរងរបួសម្នាក់ផងដែរ។
ក្នុងនាមឯកឧត្តម ទៀ សីហា ប្រធានគណៈកម្មាធិការសាខាកាកបាទក្រហមកម្ពុជាខេត្តសៀមរាប លោក ចៅ ម៉ៅមុន្នី បាននាំយកនូវការសួរសុខទុក្ខពីសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ព្រមទាំងចូលរួមសោកស្ដាយ ចំពោះការបាត់បង់នូវទ្រព្យសម្បត្តិរបស់បងប្អូនប្រជាពលរដ្ឋ ដែលរងគ្រោះដោយបាតុភូតធម្មជាតិនេះ។ លោកបន្ថែមថា កាកបាទក្រហមកម្ពុជា តែងតែយកចិត្តទុកដាក់ចំពោះសុខទុក្ខប្រជាពលរដ្ឋ និងចូលរួមជួយសម្រួលទុក្ខលំបាករបស់ប្រជាពលរដ្ឋរងគ្រោះគ្រប់រូប ដោយមិនប្រកាន់វណ្ណៈ ពណ៌សម្បុរ ជំនឿសាសនា ឬនិន្នាការនយោបាយណាមួយឡើយ ដូចដែលលើកឡើងថា «កាកបាទក្រហមកម្ពុជាមានគ្រប់ទីកន្លែង សម្រាប់គ្រប់ៗគ្នា មិនទុកនរណាម្នាក់ចោល»។
ព័ត៌មានជាតិ ថ្មីៗ
សូមជម្រាបថា អំណោយដែលបានប្រគល់ជូន គ្រួសារដែលរលំផ្ទះ ក្នុង១គ្រួសារ ទទួលបានអង្ករ ៣០គ.ក្រ មី, ត្រីខ ,អំបិល ,ស្ករស , ប៊ីចេង ,ទឹកត្រី , កន្ទេល ,ឃីត១កញ្ចប់ និង ស័ង្កសី១៦សន្លឹក និងថវិកាចំនួន១៥ម៉ឺនរៀល ។ ចំពោះគ្រួសារ ផ្ទះរបើកដំបូល ជញ្ជាំង ក្នុងមួយគ្រួសារទទួលបាន អង្ករ ៣០គ.ក្រ មី, ត្រីខ ,អំបិល ,ស្ករស , ប៊ីចេង ,ទឹកត្រី , កន្ទេល ,ឃីត១កញ្ចប់ និង ស័ង្កសី១០សន្លឹក និងថវិកាចំនួន១០ម៉ឺនរៀល ។ ចំពោះប្រជាពលរដ្ឋរងរបួសដោយគ្រោះធម្មជាតិម្នាក់ ទទួលបានអង្ករ៣០គ.ក្រ មី, ត្រីខ ,អំបិល ,ស្ករស , ប៊ីចេង ,ទឹកត្រី , កន្ទេល ,ឃីត១កញ្ចប់ និង ថវិកា ២០ម៉ឺនរៀល។ ក្នុងនោះ លោក ចៅ ម៉ៅមុន្នី និង អាជ្ញាធរឃុំទាំង៣ ក៏បានឧបត្ថម្ភសម្ភារៈនិងថវិកាបន្ថែមដល់បងប្អូនរងគ្រោះ និង អ្នករងរបួសផងដែរ៕
អត្ថបទ និងរូបភាព៖ លោក ម៉ី សុខារិទ្ធ
កែសម្រួល៖ លោក សេង ផល្លី
