នៅព្រឹកថ្ងៃទី១៨ ខែមេសា ឆ្នាំ២០២៣នេះ ប្រជាពលរដ្ឋដែលរងគ្រោះដោយសារខ្យល់កន្ត្រាក់ បណ្តាលឲ្យខូចខាត់លំនៅឋាន ចំនួន ៦០គ្រួសារ រស់នៅក្នុងឃុំចំនួន៤ នៃស្រុកបន្ទាយស្រី មានឃុំរុនតាឯក ឃុំព្រះដាក ឃុំរំចេក និងឃុំឃុន បានទទួលអំណោយជាសង្ក័សី ពីសម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តសៀមរាប ដើម្បីធ្វើការជួសជុលលំនៅដ្ឋានឡើងវិញ។
បើតាមលោក រិន ឡូត អភិបាលស្រុកបន្ទាយស្រី បានឲ្យដឹងថា កាលពីថ្ងៃទី១៥ ខែមេសា ឆ្នាំ២០២៣ នៅក្នុងមូលដ្ឋានស្រុកបន្ទាយស្រី មានភ្លៀង និងខ្យល់កន្ត្រាក់បក់ខ្លាំង ដែលបណ្ដាលឲ្យរបើកជញ្ជាំង ដំបូលផ្ទះ និងរំលំផ្ទះទាំងស្រុងរបស់ប្រជាពលរដ្ឋ ក្នុងឃុំចំនួន៥ ស្មើ ៦២ខ្នងផ្ទះ។ ហើយកន្លងមកក្រុមការងាររាជរដ្ឋាភិបាល ចុះមូលដ្ឋានស្រុកបន្ទាយស្រី ក៏បានជួយជួសជុលលំនៅដ្ឋានជូនប្រជាពលរដ្ឋក្នុងភូមិធម្មជាតិរុនតាឯកថ្មី បានចំនួន ១៤ខ្នង ផងដែល ដែលរងផល់ប៉ះពាល់ដោយសារគ្រោះមហន្តរាយធម្មជាតិ។
ព័ត៌មានជាតិ ថ្មីៗ
ចំពោះគ្រោះមហន្តរាយដោយធម្មជាតិនេះដែរ លោកអភិបាកស្រុក បានសំដែងនូវការសោកស្ដាយជាពន់ពេកចំពោះបងប្អុនប្រជាពលរដ្ឋរងគ្រោះ ដោយសារតែហេតុការណ៍នេះ គឺគ្មាននរណាម្នាក់ចង់ជួបប្រទះឡើយ។ ជាមួយនោះលោក ក៏បានផ្តាំផ្ញើដល់បងប្អូនប្រជាពលរដ្ឋទាំងអស់ ត្រូវបង្កើនការប្រុងប្រយ័ត្នឲ្យបានខ្ពស់ក្នុងរដូវនេះ ជាពិសេសការថែទាំសុខភាព ការរកកន្លែងសុវត្តិភាពពេលមានភ្លៀង ផ្គរន្ទះ និងខ្យល់កន្ត្រាក់ ជៀសវាងហានិភ័យ ដល់អាយុជីវិត និងស្នើសុំបងប្អូនទាំងអស់ដាំដើមឈើនៅតាមលំនៅដ្ឋានរៀងៗខ្លួន ដើម្បីបានជាម្លប់ និងការពារខ្យល់កន្ត្រាក់។
សូមជម្រាបថា សម្រាប់ប្រជាពលរដ្ឋរងគ្រោះមកពីឃុំទាំង៤ ទទួលបានសង្ក័សីសរុបទាំងអស់ ៧៦១សន្លឹក ក្នុងនោះ៖ ឃុំឃុនរាម មាន១៤គ្រួសារ ទទួលបានសង្ក័សី ១១៥សន្លឹក, ឃុំរំចេក ១គ្រួសារ ទទួលបានសង្ក័សី ២៥សន្លឹក, ឃុំព្រះដាក់ ១២គ្រួសារ ទទួលបានសង្ក័សី ៩៨សន្លឹក និងឃុំរុនតាឯក ៣៣គ្រួសារ ទទួលបានសង្ក័សី ៥២៣សន្លឹក៕
អត្ថបទ និងរូបភាព៖ លោក ធន់ ពូថេ
កែសម្រួល៖ អ៊ុន ណារាជ្យ
