នៅព្រឹកថ្ងៃទី១៣ ខែមេសា ឆ្នាំ២០២៣នេះ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានក្រុមការងាររាជរដ្ឋាភិបាលចុះជួយមូលដ្ឋានខេត្តសៀមរាប បានអញ្ជើញជាអធិបតីដ៏ខ្ពង់ខ្ពស់ ក្នុងពិធីពុទ្ធាភិសេកព្រះ និង កាត់ខ្សែបូរសម្ពោធដាក់ឱ្យប្រើប្រាស់ជាផ្លូវការនូវអាគារសាលាអនុគណវត្តទេពពោធិវង្ស ស្ថិតនៅក្នុងភូមិត្រពាំងសេះ សង្កាត់គោកចក ក្រុងសៀមរាប ។
មានប្រសាសន៍ក្នុងឱកាសនោះ សម្តេចពិជ័យសេនា ទៀ បាញ់ បានវាយតម្លៃខ្ពស់និងចាត់ទុកថាជាសមិទ្ឋផលថ្មីមួយនេះសម្រាប់បម្រើឱ្យវិស័យព្រះពុទ្ឋសាសនា ក្នុងការធ្វើទំនាក់ទំនងគ្រប់វត្តអារាម អាជ្ញាធរមានសមត្ថកិច្ចពាក់ព័ន្ឋ និងជាពុទ្ឋិកៈសិក្សាធិការជួយបណ្តុះបណ្តាលធនធានព្រះសង្ឃ ប្រកបដោយចំណេះដឹង គុណធម៌ ប្រកាន់វិន័យខ្ជាប់ខ្ជួនតាមពុទ្ឋបញ្ញតិនិងពុទ្ឋានុញ្ញាតិ ក្នុងការចូលរួមអភិវឌ្ឍន៍សិល្បៈ វប្បធម៌ប្រពៃណីទំនៀមទម្លាប់ខ្មែរ ថែរក្សា លើកស្ទួយនិងទប់ស្កាត់វប្បធម៌អវិជ្ជមានទាំងឡាយដែលមានផលប៉ះពាល់ដល់វប្បធម៌ជាតិប្រកបដោយមនសិការ។
សម្តេចពិជ័យសេនា ទៀ បាញ់ មានប្រសាសន៍បន្តថា៖ គោលនយោបាយឈ្នះឈ្នះ និងក្រោមការដឹកនាំប្រកបដោយគតិបណ្ឌិត របស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានធ្វើឲ្យប្រទេសជាតិមានសុខសន្តិភាពពេញបរិបូរណ៍ និង បានខិតខំប្រឹងប្រែងអភិវឌ្ឍវិស័យព្រះពុទ្ឋសាសនាដើម្បីជាប្រយោជន៍ក្នុងការរួមចំណែកពង្រឹងសាមគ្គីភាព ការលើកកម្ពស់វប្បធម៌ និងការយោគយល់គ្នាក្នុងចំណោមពុទ្ឋសាសនិកក៏ដូចជាប្រជាជនកម្ពុជានាពេលបច្ចុប្បន្ន និងទៅអនាគត ដូច្នេះក្នុងឱកាសនេះ សូមអំពាវនាវដល់ប្រជាពលរដ្ឋគ្រប់រូប អាជ្ញាធរមូលដ្ឋានគ្រប់លំដាប់ថ្នាក់ត្រូវចូលរួមការពារសន្តិភាពមិនត្រូវឱ្យសន្តិភាពនេះត្រូវបានបំផ្លាញដោយជនណាម្នាក់ឬបក្សនយោបាយណាមួយនោះទេ ទោះអស់តម្លៃណាក៏ដោយ និងចូលរួមថែរក្សាការពារនូវសមិទ្ឋិផលទាំងឡាយរបស់ជាតិធ្វើយ៉ាងណាឱ្យសមិទ្ឋិផលសម្រេចបានដោយឆ្លងកាត់ការលំបាកនិងឧបសគ្គគ្រប់បែបយ៉ាងទម្រាំបានដូចសព្វថ្ងៃនេះឱ្យបានស្ថិតនៅគង់វង្សជាអមតៈ ជាពិសេសសមិទ្ឋផលជ័យជម្នះ៧មករា១៩៧៩ដែលជាបុព្វបទនៃការនាំមកនូវសន្តិភាពនិងការអភិវឌ្ឍរីកចម្រើនរបស់ជាតិយើងជាដរាមតរៀងមក។
ក្នុងឱកាសនោះដែរ សម្តេចពិជ័យសេនា ទៀ បាញ់ បានវេរប្រគេនបច្ច័យបានពីអង្គផ្កាប្រាក់ចំនួន ១១០លានរៀល និង ប្រាក់ដុល្លារចំនួន ១៦ពាន់ដុល្លារដល់ព្រះគ្រូចៅអធិការវត្តនិង បានធ្វើពិធីពុទ្ធាភិសេកព្រះអង្គផ្ចាញ់មា រទៅតាមគន្លងប្រពៃណី ព្រះពុទ្ធសាសនា ដើមី្បតម្កល់ ទុកក្នុងអគារសាលា អនុគណ សម្រាប់ព្រះសង្ឃ ពុទ្ធបរិស័ទគោរពប្រតិបត្តិធ្វើបុណ្យទានផ្សេងៗ ។
គួររំលឹកថា កាលពីរសៀលថ្ងៃទី១២ ខែមេសា ឆ្នាំ២០២៣ម្សិលមិញនេះ ឯកឧត្តម អ៊ាន ឃុន ប្រធានក្រុមប្រឹក្សាខេត្ត និងឯកត្តម ទៀ សីហា អភិបាល នៃគណៈអភិបាលខេត្ត ព្រមទាំងថ្នាក់ដឹកនាំ មន្ត្រីរាជការបងប្អូន ប្រជាពុទ្ធបរិស័ទចំណុះជើងវត្តក្នុងខេត្ត បានចូលរួមបុណ្យផ្កាប្រាក់សាមគ្គី និង ពុទ្ធាភិសេកព្រះផ្ចាញ់មារ ដែលផ្តួចផ្តើមឡើងដោយសម្តេចពិជ័យសេនា ទៀ បាញ់ បានដង្ហែរអង្គផ្កាប្រាក់ចូលវត្តទេពពោធិវង្ស (ហៅវត្តថ្មី) ដើម្បីរៃអង្គាសបច្ច័យ យកមកកសាងសមទ្ធិផលក្នុងវត្តទេពពោធិវង្ស និង សាងសង់សាលាអនុគណក្រុងសៀមរាប សម្រាប់បម្រើដល់វិ័ស័យព្រះពុទ្ធសាសនា ៕
អត្ថបទ និង រូបភាព ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
