កាលពីថ្ងៃទី១១ ខែមេសា ឆ្នាំ២០២៣ម្សិលមិញនេះ ឯកឧត្ដម ទៀ សីហា អភិបាលនៃគណៈអភិបាលខេត្តនិងជាប្រធានគណៈបញ្ជាការឯកភាពរដ្ឋបាលខេត្តសៀមរាប និង ឯកឧត្ដម អ៊ាន ឃុន ប្រធានក្រុមប្រឹក្សាខេត្ត បានដឹកនាំប្រតិភូខេត្ត ចុះសួរសុខទុក្ខកងទ័ពប្រចាំសមរភូមិមុខ ក្នុងនោះមាន ៖ កងពលតូចអន្តរាគមន៍លេខ៥នៃកងពលធំអន្តរាគមន៍លេខ២ប្រចាំទិសទី៣ ឈរជើងនៅ ក្នុងភូមិសាស្រ្តស្រុកបន្ទាយអម្ពិលខេត្តឧត្តរមានជ័យ ជាអង្គភាពសម្ពន្ឋ័មេត្រីភាពរបស់ខេត្ត , អង្គភាពទ័ពប្រចាំសមរភូមិមុខ , យោធភូមិភាគទី៤ ប្រចាំទិសទី២ និង អង្គភាពវរៈសេនាតូចលេខ១ ចំណុះតំបន់ប្រតិបត្តិការសឹករងសៀមរាប ឈរជើងតំបន់អូរកូនតឹង ស្ថិតភូមិត្រពាំងក្រសាំង ឃុំ ស្រែណូយ ស្រុកវ៉ារិន ខេត្តសៀមរាប តំបន់ព្រៃស្អាក ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ឆ្នាំថោះ បញ្ចស័ក ព.ស ២៥៦៦ ។
មានប្រសាសន៍សំណេះសំណាលជាមួយមេបញ្ជាការ មេបញ្ជាការងនិងយោធិនទាំងពីរគោលដៅ ឯកឧត្តម ទៀ សីហា បានសម្ដែងនូវការកោតសរសើរចំពោះនាយទាហាន ពលទាហានទាំងអស់ ដែលកំពុងឈរជើងយ៉ាងរឹងមាំ ដើម្បីបុព្វហេតុការពារបូរណភាពទឹកដីជាតិខ្មែរ ប៉ុន្តបើទោះបីស្ថានការណ៍នៅតាមបណ្តោយព្រំដែន មានសភាពស្ងប់ស្ងាត់ យ៉ាងណាក៏ដោយ ក៏បានក្រើនរំលឹកបងប្អូនកងទ័ពទាំងអស់ត្រូវយកចិត្តទុកដាក់ ក្នុងការហ្វឹកហាត់ឲ្យបានជាប្រចាំ នូវយុទ្ធវិធីយុទ្ធសាស្រ្តរបស់កងទ័ព ត្រូវត្រៀមលក្ខណៈនៅគ្រប់ពេលវេលា ក្នុងការជួយអន្តរាគមន៍ពេលមានសភាពការណ៍កើតឡើង ។
ឯកឧត្តមមានប្រសាសន៍បន្តថា៖ អនុសាសន៍របស់សម្តេចតេជោ នាយករដ្ឋមន្ត្រី គឺបានបំផុសឲ្យមានចលនាចងសម្ព័ន្ធមេត្រីភាពរវាងសមរភូមិក្រោយ និង មួយសមរភូមិមុខ ក្នុងកាលៈទេសៈមួយ ដើម្បីពង្រឹងខឿនការពារជាតិ ការពារប្រជាជន ប៉ុន្តែការសួរសុខទុក្ខដល់អង្គភាពទ័ពសម្ព័ន្ឋមេត្រីភាពតាមព្រំដែន ជាមួយរដ្ឋបាលខេត្តសៀមរាប ត្រូវបានអាក់ខាន ជាងបីឆ្នាំ ដោយបញ្ហាការឆ្លងរាលដាលជាសកលជំងឺកូវីដ-១៩ តែចំពោះកិច្ចទំនាក់ទំនង និង សហប្រតិបត្តិការនៅរក្សាបានល្អប្រសើរ ។
ក្នុងឱកាសនោះដែរ ឯកឧត្តមអភិបាលខេត្តសៀមរាប ក៏បានផ្តាំផ្ញើដល់បងប្អូនកងកម្លាំងទាំងអស់ត្រូវយកចិត្តទុកដាក់ខ្ពស់ទៅលើបញ្ហាសុខភាព អនាម័យ និង ធ្វើការកសាង ជម្រកក្នុងអង្គភាព ព្រមទាំងធ្វើការដាំដុះដំណាំបន្លែបង្កា និង ចិញ្ចឹមសត្វ ដើមី្បផ្គត់ផ្គង់ដល់ជីវភាពកងទ័ព ក្នុងអង្គភាព និង គ្រួសារកងទ័ព ជាពិសេសលើការគ្រប់គ្រង និង ថែរក្សានូវគ្រឿងបំពាក់សម្ភារៈយោធូបករណ៍កងទ័ពឲ្យបានល្អ និងក្រៅពីភារកិច្ចស្នូល កងទ័ពក៏មានភារកិច្ចចូលរួមការពារមូលដ្ឋាន ភូមិឃុំមានវត្ថិភាព ជាពិសេសក្នុងឱកាសបុណ្យចូលឆ្នាំប្រពៃណីយ៍ខ្មែរ ដែលនឹងឈានមកដល់នៅប៉ុន្មានថ្ងៃទៀតនាពេលខាងមុខនេះ នៅតាមបណ្តាទីវត្តអារាម ក៏ដូចជាទីប្រជុំជននានា ត្រូវចូលរួមសហការជាមួយសមត្ថកិច្ចមូលដ្ឋាន ដើម្បីការពារសន្តិសុខ រក្សាសណ្ឋាប់ធ្នាប់ជូនប្រជាពលរដ្ឋ ក្នុងពេលកម្សាន្តសប្បាយ ។
ជាមួយគ្នានេះដែររដ្ឋបាលខេត្ត បាននាំយកនូវអំណោយជាគ្រឿងឧបភោគបរិភោនិង សម្ភារៈប្រើប្រាស់ ជូនកងពលតូចអន្តរាគមន៍លេខ៥ នូវឧបភោគបរិភោគ ចំនួន ២៨មុខ និង ប្រេងម៉ាស៊ូត ១ពាន់លីត្រ,ស័ង្កសី ២ពាន់សន្លឹក ,តង់ ០១ផ្ទាំង ស្រាបៀរ ១០០កេស និង ថវិកា ២០លានរៀល ជូនកងទ័ពម្នាក់ៗ ២ម៉ឺនរៀល , ឧបត្ថម្ភដល់កងពលធំអន្តរាគមន៍លេខ២ នូវស្រាបៀរ៥០កេស ថវិកា៦លានរៀល , ជូនដល់ទីបញ្ជាការប្រចាំទិសទី២ នៃយោធភូមិភាគទី៤ នូវស្រាបៀរ ៥០កេស ថវិកា ៥លានរៀល មី ៤០កេស គោ ១ក្បាល, អង្គភាពវរៈសេនាតូចលេខ១ មានគ្រឿងឧបភោគបរិភោគ ចំនួន ២២មុខ និងថវិកា សរុប ១២លានរៀល ស្រាបៀរ ៥០កេស ,ប្រេងម៉ាស៊ូត ៥០០លីត្រ ពុយដាក់ប្រេង ០៥ពុយ និង តង់០១ ក្នុងនោះ បានចែកជូនយោធិន ម្នាក់ៗ ៤ម៉ឺនរៀលផងដែរ ៕
អត្ថបទ និង រូបភាព ៖ លោក យូ វង្ស
កែសម្រួលដោយ លីវ សាន្ត
