នៅព្រឹកថ្ងៃទី០៧ ខែមេសា ឆ្នាំ២០២៣នេះ ឯកឧត្តមបណ្ឌិត អ្នកឧកញ៉ា សៀង ណាំ តំណាងរាស្ត្រមណ្ឌលសៀមរាប បានអញ្ជើញជាអធិបតីកាត់ខ្សែបូរបញ្ចុះខ័ណ្ឌសីមាសម្ពោធដាក់ឱ្យប្រើប្រាស់ជាផ្លូវការនូវព្រះវិហារ រួមជាមួយសមិទ្ឋផលមួយចំនួនទៀត ក្នុងវត្តព្រះវិហារវត្តអារញ្ញវាសីមហាប្រាសាទ ហៅវត្តប្រាសាទ ស្ថិតក្នុងស្រុកពួក ខេត្តសៀមរាប។ ពិធីនេះដែរក៏មានការអញ្ជើញចូលរួមពីសំណាក់លោកអភិបាលស្រុក អាជ្ញាធរមូលដ្ឋាន គណៈកម្មការអាចារ្យវត្តយាយជីតាជី លោកគ្រូអ្នកគ្រូ សិស្សានុសិស្ស និងប្រជាពុទ្ធបរិស័ទយ៉ាងច្រើនរូប។
លោក ស៊ីន ចាន់ថុល អភិបាលស្រុកពួក បានឲ្យដឹងថា វត្តប្រាសាទនេះ មានអាយុកាល ៥២៦ឆ្នាំមកហើយ ដែលមានទីតាំងស្ថិតនៅភូមិជ្រលង ឃុំខ្នាត ស្រុកពួក ខេត្តសៀមរាប ជាអារាមមានវ័យចំណាស់មួយ មានព្រះវិហារចាស់ទ្រុឌទ្រោមខ្លាំង និងដោយសារកំណើនប្រជាពុទ្ឋបរិស័ទកាន់តែមានចំនួនកើនឡើងផងនោះ ទើបព្រះចៅអធិការ គណៈកម្មការ និងបរិស័ទចំណុះជើងវត្តបានឯកភាពផ្តួចផ្តើមរុះរើព្រះវិហារចាស់សាងសង់ថ្មីឡើងវិញ។ ចំពោះព្រះវិហារថ្មី ដែលកាត់ខ្សែបូរបញ្ចុះខ័ណ្ឌសីមានៅពេលនេះ មានបណ្តោយ ៣២,២៨ម៉ែត្រ និងទទឹង១៤,២៨ម៉ែត្រ កម្ពស់៧ម៉ែត្រ បានចាប់សាងសង់ថ្មីនៅឆ្នាំ២០១៦ រហូតដល់ឆ្នាំ២០២៣ ចំណាយថវិកាបូកបញ្ចូលទាំងសមិទ្ឋផលក្នុងវត្តមួយចំនួនទៀត សរុបជាង ៥៥ម៉ឺន ៨ពាន់ដុល្លារអាមេរិក ដែលជាសទ្ឋាបានពីការចូលរួមរបស់ព្រះចៅអធិការ អាចារ្យ គណៈកម្មការវត្ត និងសប្បុរសជនជិតឆ្ងាយទាំងក្នុង និងក្រៅស្រុកផងដែរ។
ឯកឧត្តមបណ្ឌិត អ្នកឧកញ៉ា សៀង ណាំ មានប្រសាសន៍ថា ប្រទេសកម្ពុជា ក្រោមការដឹកនាំដោយសម្ដេចតេជោ ហ៊ុន សែន បានធ្វើឲ្យប្រទេសជាតិមានសុខសន្តិភាព និងការអភិវឌ្ឍន៏រីកចំរើនលើគ្រប់វិស័យ ទាំងអាណាចក្រ និងពុទ្ធចក្រ។ រំលឹកទៅសម័យកាលដែលប្រទេសកម្ពុជា ធ្លាក់ចូលទៅក្នុងរបប្រល័យពូជជសាសន៏ ៣ឆ្នាំ ៨ខែ ២០ថ្ងៃ ហេដ្ឋារចនាសម្ព័ន្ធ សង្គមជាតិ វត្តអារាមសាលារៀន ទ្រព្យសម្បត្តិសាធារណៈរបស់រដ្ឋ ត្រូវទទួលរងនូវការបំផ្លិចបំផ្លាញស្ទើរតែសូន្យ។ អាស្រ័យដោយមានជ័យជំនះ ៧មករា ឆ្នាំ១៩៧៩ ប្រជាជនកម្ពុជា បានរំដោះរួចផុតពីគ្រោះប្រល័យពូជសាសន៏ និងផ្តើមចេញពីការអនុវត្តគោលនយោបាយឈ្នះឈ្នះរបស់សម្តេចតេជោ បាននាំមកនូវសន្តិភាព ស្ថិរភាព និងការអភិវឌ្ឍលើគ្រប់វិស័យទូទាំងប្រទេស ទាំងពុទ្ធចក្រ និងអាណាចក្រទៀតផង។
ក្នុងឱកាសនោះដែរ ឯកឧត្តមបណ្ឌិត អ្នកឧកញ៉ា សៀង ណាំ ក៏បានប្រគេនថវិកាចំនួន ២០លានរៀល ជូនដល់ព្រះចៅអធិការវត្ត សម្រាប់បន្តកសាងគរុភ័ណក្នុងវត្ត និងផ្តល់ជូនប្រជាពលរដ្ឋចូលរួមចំនួន ២៥០នាក់ ក្នុងម្នាក់សារុង១ លោកយាយលោកតា ២០០នាក់ ក្នុងម្នាក់ៗទទួលបានក្រណាត់ស១ដុំ និងថវិកា១ម៉ឺនរៀល លោកគ្រូអ្នកគ្រូ ១៨នាក់ ក្នុងម្នាក់ៗទទួលបានថវិការ៥ម៉ឺនរៀល និងសិស្សានុសិស្សចំនួន ១២០នាក់ ក្នុងម្នាក់ៗទទួលបានសៀវភៅ ២ក្បាល ប៊ិក២ដើម និងថវិកា៥ពាន់រៀលផងដែរ៕
អត្ថបទ និងរូបភាព៖ លោក យូ វង្ស
កែសម្រួល៖ អ៊ុន ណារាជ្យ
