កាលពីថ្ងៃទី៤ ខែមីនា ឆ្នាំ២០២៣ម្សិលមីញនេះ អាជ្ញាធរស្រុកពួក ខេត្តសៀមរាប សហការជាមួយអង្គការសាលារៀនទន្សាយ បានរៀបចំប្រារព្ធពិធីយុទ្ធនាការជិះកង់ដើម្បីអបអរសាទរខួបលើកទី១១២ ទិវានារីអន្តរជាតិ៨មីនា ក្រោមប្រធានបទ” សិទ្ធិរបស់ជនមានពិការភាព ជាពិសេសស្ត្រី និងកុមារីចូលរួមកសកម្មភាពអភិវឌ្ឍសហគមន៍ដោយមិនមានការរើសអើង” នៅសាលាបឋមសិក្សា ទៀបាញ់ គំរូ ក្នុងស្រុកពួក ក្រោមអធិបតីភាពលោកស្រី ឆែម សុធា អភិបាលរង នៃគណៈអភិបាលស្រុកពួក ដោមានការចូលរួមពីសំណាក់លោក លោកស្រី ជាតំណាងអង្គភាពពាក់ព័ន្ធ ប្រជាពលរដ្ឋ និង ជនមានពិការភាពជាច្រើនរូបទៀត ។
លោកស្រី ឆែម សុធា អភិបាលរងស្រុកពួក បានលើកឡើងថា ការចូលរួមក្នុងសកម្មភាពសង្គមរបស់ជនពិការ ឬជនដែលមានពិការភាព បានបង្ហាញថា ពួកគាត់ក៏អាចមានសមត្ថភាពធ្វើកិច្ចការដូចមនសុ្សទូទៅដែរ ដូច្នេះក្នុងឱកាសនេះ សូមលើកទឹកចិត្តដល់ក្រុមគ្រួសាររបស់ជនពិការ ឬជនមានពិការភាព ត្រូវមានភាពក្លាហានក្នុងការលើកយកនូវបញ្ហានានា មកពិភាក្សា ជាមួយអាជ្ញាធរពាក់ព័ន្ធដែលនៅជិតខ្លួន ពិសេសទាំងជនពិការ ឬជនមានពិការភាព ត្រូវតែហ៊ានចូលរួមក្នុងសកម្មភាពសង្គម ដើម្បីបញ្ចប់ការរើសអើង ។
លោកស្រី បន្តថា បច្ចុប្បន្ននេះ អាជ្ញាធរមូលដ្ឋានក្នុងស្រុកពួក បានខិតខំតស៊ូមតិយ៉ាងខ្លាំងក្លា ដើម្បីការពារ និង រក្សានូវសិទ្ធិស្មើគ្នាចំពោះបងប្អូនដែលមានពិការភាព ក្នុងនោះក៏មានអង្គការសាលារៀនទន្សាយ ដែលបានជួយបណ្តុះបណ្តាល ជួយលើកទឹកចិត្តដល់ជនដែលមានពិការភាព ធ្វើយ៉ាងណាឲ្យពួកគាត់មានភាពស្មើមុខមាត់គ្នាក្នុងសង្គម។
លោក វង្ស វុទ្ធី តំណាងសាលារៀនទន្សាយ បានលើកឡើងថា យុទ្ធនាការនេះធ្វើឡើងក្នុងគោលបំណងផ្សព្វផ្សាយនិងបញ្ជ្រាបដល់ជនដែលមានពិការភាព ជាពិសេសស្រ្តី និងកុមារី បានយល់ដឹងអំពីសិទ្ធិរបស់ពួកគាត់ក្នុងការចូលរួមអភិវឌ្ឍន៍សហគមន៍ ក៏ដូចជាទទួលបាននូវការបណ្តុះបណ្តាលជំនាញវិជ្ជាជីវៈ ការប្រកបមុខរបរទទួលទានប្រកបដោយបរិយាបន្ន។ ជាមួយគ្នានេះ យុទ្ធនាការនេះក៏មានគោលបំណងចង់ឲ្យប្រជាពលរដ្ឋក្នុងស្រុកពួក លុបបំបាត់ឲ្យអស់នូវការរើសអើងជនមានពិការភាព។
ព័ត៌មានជាតិ ថ្មីៗ
សូមជម្រាបថា បច្ចុប្បន្ននេះ នៅស្រុកពួក អង្គការសាលារៀនទន្សាយ បានធ្វើសកម្មភាពចំនួន ៩ ឃុំ មាន ឃុំខ្នាត ឃុំពួក ឃុំសសរស្តម្ភ ឃុំត្រីញ័រ ឃុំយាង ឃុំល្វា ឃុំដូនកែវ ឃុំរើល និងឃុំសំរោងយា ក្នុងនេះមានសាលារៀនចំនួន៥ បានបើកឲ្យមានថ្នាក់អប់រំកុមារពិការ រួមមាន៖ សាលាបឋមសិក្សាខ្នាត ក្នុងឃុំខ្នាត , សាលាបឋមសិក្សាទៀបាញ់ គំរូ ក្នុងឃុំពួក , សាលាបឋមសិក្សា សសរស្តម្ភ ក្នុងឃុំសសរស្តម្ភ , សាលាបឋមសិក្សា អធិបតី ក្នុងឃុំត្រីញ័រ និងសាលាបឋមសិក្សាយាង ក្នុងឃុំយាង ៕
អត្ថបទ និងរូបភាព: លោក ជា ស្រស់
កែសម្រួល: លោក លីវ សាន្ត
