ក្រោមការយកចិត្តទុកដាក់ខ្ពស់ពីសំណាក់ ឯកឧត្តម ប្រាក់ សោភ័ណ អភិបាលខេត្តសៀមរាប ចំពោះសុខទុក្ខ និងជីវភាពរបស់បងប្អូនភៀសសឹកពីតំបន់សមរភូមិមុខ ដែលកំពុងស្នាក់នៅទីតាំងសុវត្ថិភាពក្នុងភូមិសាស្ត្រខេត្តសៀមរាប វគ្គបណ្ដុះបណ្ដាលជំនាញរយៈពេលខ្លីត្រូវបានរៀបចំឡើង ដើម្បីផ្ដល់ជាទុនចំណេះដឹងសម្រាប់កសាងជីវភាពនាពេលអនាគត។
នៅថ្ងៃទី៥ ខែមករា ឆ្នាំ២០២៦ ក្រុមការងារចម្រុះបានរៀបចំពិធីប្រឡងបញ្ចប់ការសិក្សា និងកាត់សេចក្ដីដោយគណៈកម្មការជំនាញ ក្នុងការភ្លក់រសជាតិ និងដាក់ពិន្ទុដល់បងប្អូនភៀសសឹកដែលបានបញ្ជាប់ការសិក្សាវគ្គ “របៀបធ្វើភេសជ្ជៈ” ដែលវគ្គបណ្ដុះបណ្ដាលនេះ ត្រូវបានបង្រៀនដោយផ្ទាល់ពីគ្រូឧទ្ទេសនៃ អង្គការកល្យាណមិត្ត។
សកម្មភាពនេះកើតឡើងទៅតាមការណែនាំដ៏ខ្ពង់ខ្ពស់របស់ ឯកឧត្តមអភិបាលខេត្ត ដែលចង់ឃើញបងប្អូនដែលរងគ្រោះដោយសារសង្គ្រាម មានឱកាសក្រេបជញ្ជក់យកចំណេះជំនាញថ្មីៗ សម្រាប់យកទៅប្រកបមុខរបរចិញ្ចឹមជីវិតដោយខ្លួនឯង ក្រោយពេលត្រឡប់ទៅលំនៅឋានវិញ ឬបង្កើតអាជីវកម្មខ្នាតតូចក្នុងសហគមន៍។
ក្នុងឱកាសនោះដែរ តំណាងរដ្ឋបាលខេត្តសៀមរាប បានថ្លែងអំណរគុណយ៉ាងជ្រាលជ្រៅចំពោះអង្គការកល្យាណមិត្ត ដែលបានសហការយ៉ាងស្អិតរមួតជាមួយអាជ្ញាធរខេត្ត ក្នុងការផ្ដល់ជំនាញបច្ចេកទេស និងសម្ភារសិក្សាដល់បងប្អូនភៀសសឹក។ កិច្ចខិតខំប្រឹងប្រែងនេះ មិនត្រឹមតែជួយកាត់បន្ថយភាពតានតឹងក្នុងអំឡុងពេលភៀសខ្លួនប៉ុណ្ណោះទេ ប៉ុន្តែថែមទាំងជាការផ្ដល់ក្ដីសង្ឃឹម និងឱកាសការងារយ៉ាងពិតប្រាកដដល់ពួកគេ។
គណៈកម្មការក៏បានរៀបចំពិធីប្រគល់វិញ្ញាបនបត្របញ្ជាក់ការសិក្សា ជូនដល់សិក្ខាកាមទាំងអស់ ដើម្បីជាការទទួលស្គាល់នូវសមត្ថភាព និងការខិតខំប្រឹងប្រែងក្នុងរយៈពេលកន្លងមក៕
អត្ថបទ និងរូបភាព៖ លោក អ៊ុន ណារាជ្យ
