ថ្លែងក្នុងកិច្ចប្រជុំពិនិត្យ និងពិភាក្សាការងារ នាថ្ងៃទី៥ ខែមករា ឆ្នាំ២០២៦ លោក យឿន ចាន់ អនុប្រធានមន្ទីរព័ត៌មានខេត្តសៀមរាប ទទួលបន្ទុករួម បានណែនាំ និងជំរុញលើកទឹកចិត្តដល់មន្រ្តីនៃមន្ទីរទាំងអស់ បន្ដយកចិត្តទុកដាក់បន្ថែម លើការងារសារធាណៈមតិ ជាពិសេស ក្នុងស្ថានភាពព្រំដែនកម្ពុជា-ថៃ មានភាពមិនប្រាកដប្រជា ដែលនាំឱ្យការបញ្ចេញមតិលើបណ្ដាញសង្គមនានា អាចនឹងការទទួលបានព័ត៌មានពិតផង និងមិនពិតផង។
លោក យឿន ចាន់ មានប្រសាសន៍បន្ដថា ការដែលប្រជាពលរដ្ឋទទួលបានព័ត៌មានមិនគ្រប់ជ្រុងជ្រោយ ងាយឱ្យពួកគាត់មានការភ័ន្តច្រឡំ និងអាចក្លាយជាព័ត៌មានក្លែងក្លាយ ដោយបានបំផ្លាញជំនឿទុកចិត្តរបស់ប្រជាជនចំពោះអាជ្ញាធរ ចំពោះអ្នកពាក់ព័ន្ធ ក្រសួងស្ថាប័ននានា ក៏ដូចជាធ្វើឱ្យពលរដ្ឋស្ថិតក្នុងភាពមន្ទិលសង្ស័យ និងព្រួយបារម្ភ និងគិតខុស យល់ខុស។
លោកក៏បានថ្លែងការកោតសរសើរ និងអរគុណចំពោះថ្នាក់ដឹកនាំ និងមន្រ្តីទាំងអស់ ក្នុងការលះបង់កម្លាំងកាយចិត្ត បំពេញការងារតាមជំនាញរៀងៗខ្លួន ដែលនាំឱ្យការងារចុះយកព័ត៌មានទទួលបានលទ្ធផលជាវិជ្ជមានគួរឱ្យកត់សម្គាល់។ ជាមួយគ្នានេះ លោកក៏បានលើកទឹកចិត្តឱ្យបន្ត្រីទាំងអស់ បន្តពង្រឹងសមត្ថភាពបន្ថែមទៀត ដើម្បីឱ្យការផ្ដល់ព័ត៌មានកាន់តែមានប្រសិទ្ធភាព និងប្រសិទ្ធផល។
លោកអនុប្រធានមន្ទីរ ក៏បានបញ្ជាក់ថា សម្រាប់កិច្ចប្រជុំនាពេលនេះដែរ គឺពីនិត្យ ពិភាក្សា បំពេញបន្ថែមនូវចំណុចខ្វះខាត និងបញ្ហាប្រឈមនានា ដែលការិយាល័យជំនាញទាំង៥ កំពុងជួបប្រទះ ដើម្បីធ្វើការដោះស្រាយឱ្យបានទាន់ពេលវេលា និងដាក់ចេញនូវផែនការការងារបន្ត៕
អត្ថបទ ៖ លោកស្រី ហែម បូរ៉ាន្នី
កែសម្រួល៖ លោក អ៊ុន ណារាជ្យ
