នាព្រឹកថ្ងៃទី៥ ខែមករា ឆ្នាំ២០២៦ ក្រុមប្រឹក្សាខេត្តសៀមរាប បានបើកកិច្ចប្រជុំសាមញ្ញលើកទី១០ អាណត្តិទី៤ របស់ខ្លួន ក្នុងគោលបំណងត្រួតពិនិត្យលទ្ធផលការងារ និងលើកទិសដៅដោះស្រាយបញ្ហាសំខាន់ៗដែលកើតមានក្នុងខេត្ត ក្រោមអធិបតីភាព ឯកឧត្តម តោ គឹមស៊ាន ប្រធានស្តីទីក្រុមប្រឹក្សាខេត្ត និង លោក ឌី រ៉ាដូ អភិបាលរងខេត្ត ដោយមានការចូលរួមពីសមាជិកក្រុមប្រឹក្សាខេត្ត ថ្នាក់ដឹកនាំមន្ទីរ-អង្គភាព កងកម្លាំងប្រដាប់អាវុធទាំងបីប្រភេទ និងអភិបាលក្រុង-ស្រុកទូទាំងខេត្ត។
អង្គប្រជុំបានផ្តោតការពិភាក្សាយ៉ាងស៊ីជម្រៅលើរបៀបវារៈសំខាន់ៗដែលប៉ះពាល់ដល់ជីវភាពរស់នៅរបស់ប្រជាពលរដ្ឋ និងមុខមាត់ខេត្តទេសចរណ៍ រួមមាន៖ ការពង្រឹងការបង្ក្រាបបទល្មើសគ្រឿងញៀន ក្មេងទំនើង និងការទប់ស្កាត់អំពើហិង្សាលើស្ត្រី និងកុមារ។ បញ្ហាការគ្រប់គ្រងសំរាមនៅតាមដងផ្លូវសាធារណៈដែលនៅមានកម្រិត និងការកកស្ទះចរាចរណ៍ក្នុងក្រុង។ ការដឹកជញ្ជូនថ្មលើសទម្ងន់ដែលធ្វើឱ្យផ្លូវជនបទរងការខូចខាតធ្ងន់ធ្ងរ និងការយកចិត្តទុកដាក់លើបងប្អូនប្រជាពលរដ្ឋភៀសសឹកដែលកំពុងស្នាក់នៅតាមមណ្ឌលសុវត្ថិភាព ដោយសារបញ្ហាគ្រាប់បែកចង្កោម និងយុទ្ធភ័ណ្ឌមិនទាន់ផ្ទុះក្នុងភូមិដ្ឋាន។
ក្នុងឱកាសនោះ លោក ឌី រ៉ាដូ អភិបាលរងខេត្ត បានជំរុញឱ្យអាជ្ញាធរក្រុង-ស្រុក និងសមត្ថកិច្ចពាក់ព័ន្ធ ត្រូវអនុវត្តឱ្យមានប្រសិទ្ធភាពនូវរាល់ចំណុចដែលបានលើកឡើងក្នុងកិច្ចប្រជុំ។ លោកបានបញ្ជាក់ថា សៀមរាបគឺជាបេះដូងនៃទេសចរណ៍ ដូច្នេះការងារអនាម័យ បរិស្ថាន និងសណ្ដាប់ធ្នាប់ ត្រូវតែធ្វើឱ្យបានល្អបំផុតដើម្បីទាក់ទាញភ្ញៀវទេសចរ។
ឯកឧត្តម តោ គឹមស៊ាន ក៏បានណែនាំឱ្យអង្គភាពសាមី ត្រូវដោះស្រាយបញ្ហាភាពអនាធិបតេយ្យតាមដងផ្លូវឱ្យខានតែបាន ចំពោះបញ្ហាគ្រឿងញៀន បារីអេឡិចត្រូនិច និងក្មេងទំនើង ឯកឧត្តមបានសង្កត់ធ្ងន់ថា ត្រូវអនុវត្តតាមវិធានការក្តៅរបស់រាជរដ្ឋាភិបាល ដោយគ្មានការយោគយល់ ឬការអន្តរាគមន៍ណាមួយឡើយ។
ឯកឧត្តមក៏បានណែនាំឱ្យរដ្ឋបាលក្រុង-ស្រុក បង្កើនការត្រួតពិនិត្យសុខភាព ជីវភាព និងសន្តិសុខនៅតាមមណ្ឌលសុវត្ថិភាព។ លោកបានព្រមានឱ្យប្រុងប្រយ័ត្នចំពោះមុខសញ្ញាជួញដូរគ្រឿងញៀន ឬជនបង្កអសន្តិសុខដែលឆ្លៀតឱកាសបន្លំក្នុងជួរប្រជាពលរដ្ឋភៀសសឹក ដើម្បីធានាសុវត្ថិភាពជូនបងប្អូនដែលកំពុងរងគ្រោះឱ្យបានល្អប្រសើរ។ ជាមួយគ្នានេះ ឯកឧត្តមបានកោតសរសើរចំពោះលទ្ធផលការងារដែលរដ្ឋបាលខេត្តសម្រេចបានក្នុងឆ្នាំ២០២៥ និងស្នើឱ្យគ្រប់ផ្នែកពាក់ព័ន្ធបន្តខិតខំដោះស្រាយចំណុចខ្វះខាត ដើម្បីឈានទៅសម្រេចគោលដៅសម្រាប់ឆ្នាំបន្តបន្ទាប់ទៀត៕
អត្ថបទ និងរូបភាព៖ លោក ម៉ី សុខារិទ្ធ
កែសម្រួល៖ លោក អ៊ុន ណារាជ្យ
