ដើម្បីចូលរួមចំណែកលើកកម្ពស់វិស័យទេសចរណ៍ និងសេដ្ឋកិច្ចក្នុងសហគមន៍ ក្រុមយុវជនដែលជាអ្នកស្រុកអង្គរ បានសម្រេចចិត្តបើកដំណើរការសេវាកម្មដែលមានភាពទាក់ទាញថ្មី នៃហាងកាហ្វេ Pop-up Coffee ក្នុងក្រុងសៀមរាប ដែលអាជីវកម្មថ្មីនេះ មិនត្រឹមតែជាកន្លែងសម្រាកកាយ និងទទួលទានអាហារប៉ុណ្ណោះទេ ប៉ុន្តែថែមទាំងជាផ្នែកមួយក្នុងការបង្កើតការងារដល់យុវជនក្នុងមូលដ្ឋាន និងជួយផ្សព្វផ្សាយកសិផលខ្មែរទៅកាន់ទេសចរបរទេស។
លោក សូត្រ គីមសួរ ម្ចាស់ Pop-up Coffee បានឱ្យដឹងថា ទីនេះមានការរៀបចំ ដោយមានរចនាបថយ៉ាងប្លែកភ្នែក ក្នុងគោលបំណងលើកកម្ពស់វិស័យទេសចរណ៍ និងសេដ្ឋកិច្ចក្នុងតំបន់ឱ្យកាន់តែមានភាពរស់រវើកឡើងវិញ ដោយមិនត្រឹមតែជាកន្លែងសម្រាប់ទទួលទានភេសជ្ជៈប៉ុណ្ណោះទេ ប៉ុន្តែជាគោលដៅទេសចរណ៍ថ្មីមួយបន្ទាប់ពីការទស្សនាប្រាសាទបុរាណ។
លោក សូត្រ គីមសួរ បញ្ជាក់ថា តាមរយៈការបង្កើតសាខាថ្មីនេះ គឺលោកបានសង្កត់ធ្ងន់លើការជួយជ្រោមជ្រែងដល់សហគមន៍តាមរយៈការផ្តល់ឱកាសការងារដល់យុវជនក្នុងស្រុក ជាពិសេសការគាំទ្រកសិករខ្មែរក្នុងមូលដ្ឋាន ដោយរាល់បន្លែ ត្រី សាច់ និងផ្លែឈើដែលប្រើប្រាស់ក្នុងហាង គឺបញ្ជាទិញផ្ទាល់ពីកសិករក្នុងតំបន់។ ចំពោះគោលបំណងធំបំផុតរបស់លោក នៃការបើកអាជីវកម្មនេះ គឺលោកចង់ឱ្យទីនេះក្លាយជាកន្លែងសម្រាកកាយដ៏ត្រជាក់ចិត្តសម្រាប់ភ្ញៀវទេសចរ និងជាចំណែកមួយក្នុងការជំរុញសេដ្ឋកិច្ចខេត្តសៀមរាបឱ្យកាន់តែរីកចម្រើន។
លោកបានបញ្ជាក់ទៀតថា ចំណុចពិសេសនៅទីនេះ គឺការតុបតែងហាងត្រូវបានធ្វើឡើងយ៉ាងសម្រិតសម្រាំង ដោយយកឈើ និងគ្រឿងសង្ហារឹមដែលគេបោះបង់ចោល មកច្នៃជាថ្មី បញ្ចូលជាមួយសោភ័ណភាពទឹកធ្លាក់ និងរុក្ខជាតិលម្អយ៉ាងត្រជាក់ភ្នែក។ សម្រាប់មុខម្ហូប និងភេសជ្ជៈមានជាង ១០០មុខ ជាពិសេសគឺមានការ៉េមធ្វើដោយដៃ ច្នៃពីផ្លែឈើស្រស់ៗរបស់កសិករខ្មែរ ជាមួយទីតាំងថតរូបស្អាតៗសម្រាប់យុវវ័យ កំដរដោយបរិយាកាសដ៏ស្រស់ស្អាត និងការស្តាប់តន្ត្រីហ្គីតា-វីយូឡុង រាល់ថ្ងៃចុងសប្ដាហ៍។ ក្រៅពីនេះ ក៏មានបន្ទប់ប្រជុំធំសម្រាប់អ្នកដែលស្វែងរកបរិយាកាសការងារបែបថ្មី និងផាសុកភាពផងដែរ៕
អត្ថបទ និងរូបភាព៖ លោក អ៊ុន ណារាជ្យ
