នាព្រឹកថ្ងៃទី២ ខែមករា ឆ្នាំ២០២៦ ឯកឧត្តម ប្រាក់ សោភ័ណ ប្រធានគណៈកម្មាធិការសាខាកាកបាទក្រហមកម្ពុជា ខេត្តសៀមរាប បានចាត់ លោក សូរ ប្លាតុង ប្រធានអនុសាខាកាកបាទក្រហមស្រុកប្រាសាទបាគង ចុះសួរសុខទុក្ខ និងផ្ដល់អំណោយជូនស្រ្ដីដែលមានផ្ទៃពោះ ៩ខែ និងសម្រាលកូនបាន១ខែ ចំនួន២៩នាក់ ដែលកំពុងស្នាក់នៅក្នុងវត្តស្វាយធំ និងវត្តលលៃ ស្រុកប្រាសាទបាគង ខេត្ដសៀមរាប។
ក្នុងឱកាសនោះ លោក សូរ ប្លាតុង បាននាំនូវការផ្តាំផ្ញើសួរសុខទុក្ខ និងការលើកទឹកចិត្តពីសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និង ឯកឧត្តម ប្រាក់ សោភ័ណ ប្រធានគណៈកម្មាធិការសាខា ដោយលោកតែងតែយកចិត្តទុកដាក់ចំពោះសុខទុក្ខរបស់ប្រជាពលរដ្ឋគ្រប់រូប ដោយមិនប្រកាន់វណ្ណៈ ជាតិសាសន៍ ពណ៌សម្បុរ ឬនិន្នាការនយោបាយឡើយ ជាពិសេសបងប្អូនជនភៀសសឹកដែលកំពុងស្នាក់នៅបណ្ដោះអាសន្នក្នុងភូមិសាស្ត្រខេត្តសៀមរាប។
លោក សូរ ប្លាតុង ក៏បានជំរុញ និងណែនាំដល់បងប្អូនជាស្រ្ដីដែលមានផ្ទៃពោះ និងសម្រាលកូនរួច នៅក្នុងមណ្ឌលសុវត្ថិភាពទាំងអស់ ត្រូវយកចិត្តទុកដាក់លើការថែទាំអនាម័យ សុខភាពឱ្យបានត្រឹមត្រូវ ជាពិសេសត្រូវសម្អាតបរិវេណកន្លែងរស់នៅឱ្យបានស្អាតដើម្បីទប់ស្កាត់ ការឆ្លងមេរោគផ្សេងៗ ដែលអាចបង្កជំងឺដល់ទារក និងមាតា។ សម្រាប់អំណោយដែលបានផ្ដល់ជូននាពេលនេះ រួមមានសម្ភារប្រើប្រាស់របស់ទារក និងមាតា ម្សៅទឹកដោះគោ និងអង្ករ ២៥គីឡូក្រាម៕
អត្ថបទ និងរូបភាព៖ លោក អោត រត់
កែសម្រួល៖ លោក អ៊ុន ណារាជ្យ
