សាខាកាកបាទក្រហមកម្ពុជា ខេត្តសៀមរាប ដោយមានការសហការជាមួយមន្ទីរអប់រំ យុវជន និងកីឡាខេត្ត កាលពីថ្ងៃទី៣១ ខែធ្នូ ឆ្នាំ២០២៥ បានរៀបចំពិធីបិទវគ្គបណ្ដុះបណ្ដាលមូលដ្ឋាន និងបំពាក់កន្សែងជូនយុវជនកាកបាទក្រហមកម្ពុជាថ្មី ចំនួន ១១៥នាក់ មកពីវិទ្យាល័យចំនួន៥ ក្នុងក្រុងសៀមរាប ក្រោមអធិបតីភាព ឯកឧត្តម គុជ លីណា អនុប្រធានអចិន្ត្រៃយ៍គណៈកម្មាធិការសាខាកាកបាទក្រហមកម្ពុជាខេត្តសៀមរាប។
ឯកឧត្តម គុជ លីណា បានបញ្ជាក់ថា ការបំពាក់កន្សែងនាពេលនេះ គឺជាការទទួលស្គាល់ជាផ្លូវការនូវកម្លាំងបន្តវេនរបស់សមាគមជាតិ ដែលជាស្ថាប័នមនុស្សធម៌ដ៏ធំជាងគេនៅកម្ពុជា ក្នុងការជួយជ្រោមជ្រែងអាជ្ញាធរសាធារណៈ។ ហើយសម្រាប់វគ្គបណ្ដុះបណ្ដាលនេះដែរ យុវសិស្ស និងលោកគ្រូអ្នកគ្រូទីប្រឹក្សា បានក្រេបជញ្ជក់ចំណេះដឹងសំខាន់ៗ រួមមាន៖ ប្រវត្តិចលនាកាកបាទក្រហម និងអឌ្ឍចន្ទក្រហម វិជ្ជាសង្គ្រោះបឋម និងការគ្រប់គ្រងក្លិបយុវជន និងចំណេះដឹងអំពីសុវត្ថិភាពចរាចរណ៍ និងបរិយាបន្ន។
ឯកឧត្តម ក៏បានផ្ដាំផ្ញើនូវអនុសាសន៍សំខាន់ៗរបស់ សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដល់យុវជនទាំងអស់ ដោយត្រូវប្រកាន់ខ្ជាប់នូវការគោរពវិន័យសាលា ខិតខំរៀនសូត្រ និងមានឥរិយាបថថ្លៃថ្នូរ, ផ្សព្វផ្សាយគោលការណ៍គ្រឹះទាំង៧ និងចូលរួមសកម្មភាព “មិត្តអប់រំមិត្ត” ,គោរពច្បាប់ចរាចរណ៍ (ពាក់មួកសុវត្ថិភាព) ជៀសឆ្ងាយពីគ្រឿងញៀន និងអប់រំអនាម័យបង្ការជំងឺឆ្លង។ ជាពិសេសត្រូវធ្វើឱ្យបានកាន់តែច្រើនជាងមុន ធ្វើឱ្យបានកាន់តែល្អជាងមុន ធ្វើឱ្យបានកាន់តែជ្រៅ និងទៅឱ្យបានកាន់តែឆ្ងាយជាងមុន។
គួររំលឹកផងដែរថា យុវជនដែលទទួលបានការបំពាក់កន្សែងនាពេលនេះ រួមមានមកពី៖ វិទ្យាល័យសម្ដេចឪ ចំនួន២០នាក់, វិទ្យាល័យបាយ័ន ចំនួន២៨នាក់, វិទ្យាល័យ ១០មករា ១៩៧៩ ចំនួន២៥នាក់, វិទ្យាល័យ ហ៊ុន សែន សៀមរាប ចំនួន២០នាក់ និងវិទ្យាល័យ ហ៊ុន សែន វត្តស្វាយ ចំនួន២០នាក់៕
អត្ថបទ៖ លោក អ៊ុន ណារាជ្យ
