នៅថ្ងៃទី២៣ ខែធ្នូ ឆ្នាំ២០២៥ អង្គការស្លាបព្រាកម្ពុជា (Spoons Cambodia) បានរៀបចំពិធីប្រគល់វិញ្ញាបនបត្រជូនដល់សិក្ខាកាមចំនួន ៨០នាក់ ដែលបានបញ្ចប់ការសិក្សាលើជំនាញវិជ្ជាជីវៈទេសចរណ៍ និងបដិសណ្ឋារកិច្ច ដើម្បីត្រៀមខ្លួនចូលបម្រើការងារក្នុងទីផ្សារការងារដ៏សកម្មរបស់កម្ពុជា។
លោកស្រី ម៉ៅ សុផានី នាយិកាអង្គការស្លាបព្រាកម្ពុជា បានឱ្យដឹងថា ក្នុងចំណោមសិក្ខាកាមទាំង ៨០នាក់ មកពីខេត្តចំនួន៨ មាន២៤នាក់ ជាយុវជនដែលធ្លាប់បោះបង់ការសិក្សា ប៉ុន្តែត្រូវបានអង្គការជ្រើសរើសឱ្យមកទទួលការអប់រំម្តងទៀត។ ជំនាញដែលពួកគេទទួលបានរួមមាន៖ ផ្នែកផលិតកម្មម្ហូបអាហារ សេវាកម្មម្ហូបអាហារ និងភេសជ្ជៈ ជំនាញគេហកិច្ច និងជំនាញការិយាល័យជួរមុខ។
លោកស្រីបញ្ជាក់ថា ជាលទ្ធផលគួរឱ្យកត់សម្គាល់ សិក្ខាកាមចំនួន ៤២នាក់ បានចុះកិច្ចសន្យាការងាររួចរាល់ជាមួយប្រាក់ខែចន្លោះពី ១៦០ ដល់ ២២០ ដុល្លារ ខណៈ ៣៦នាក់ទៀត កំពុងស្ថិតក្នុងដំណាក់កាលសម្ភាសន៍ចុងក្រោយ។ ដើម្បីឆ្លើយតបនឹងកំណើនទេសចរណ៍ នៅឆ្នាំ២០២៦ អង្គការមានផែនការបណ្ដុះបណ្ដាលអតីតសិស្ស ១០០នាក់ បន្ថែមលើផ្នែកភាពជាអ្នកដឹកនាំក្នុងវិស័យបដិសណ្ឋារកិច្ច និង ឆ្នាំ២០២៨ គ្រោងពង្រីកចំនួនសិក្ខាកាមឱ្យដល់ ៣០០នាក់។
លោក ង៉ូវ សេងកាត់ អភិបាលរងខេត្ដសៀមរាប មានប្រសាសន៍ថា ការបណ្ដុះបណ្ដាលឯកទេសលើវិស័យទេសចរណ៍ដល់សិក្ខាកាម ទាមទារឱ្យមានធនធានមនុស្សប្រកបដោយគុណភាព សមស្របសម្រាប់ទ្រទ្រង់ការអភិវឌ្ឍវិស័យនេះ ប្រកបដោយចីរភាព ដែលបាន និងកំពុងមានសន្ទុះ និងមានទំហំយ៉ាងធំធេងនាពេលបច្ចុប្បន្ន ក្រោយពីវិបត្តិនៃការរីករាយដាលនៃជំងឺកូវីដ១៩។
លោកបន្ថែមថា ក្នុងបរិការណ៍នេះ បេសកកម្មរបស់អង្គការស្លាបព្រាកម្ពុជា នៅតែជាយន្តការដ៏សំខាន់ និងមានសក្ដានុពលនៅខេត្តសៀមរាប និងជាអាទិភាព សម្រាប់ព្រះរាជាណាចក្រកម្ពុជា ក្នុងការរួមចំណែកជាមួយរាជរដ្ឋាភិបាលកម្ពុជា នីតិកាលទី៧ ក្រោមការដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្រ្តី ពិសេសក្រសួងការងារ និងបណ្ដុះបណ្ដាលវិជ្ជាជីវៈ និងក្រសួងទេសចរណ៍ ក្នុងក្របខណ្ឌនៃការបណ្ដុះបណ្ដាលធនធានមនុស្ស ដើម្បីជំរុញកិច្ចអភិវឌ្ឍប្រទេសជាតិលើ គ្រប់វិស័យ និងដើម្បីកំណើនការងារសមធម៌ ក្នុងការចូលរួមកាត់បន្ថយភាពក្រីក្រ ការចំណាកស្រុករបស់ប្រជាពលរដ្ឋនៅកម្ពុជាជាបណ្តើរៗ។
ឯកឧត្ដម ប៉ាក់ សុខុម រដ្ឋលេខាធិការក្រសួងទេសចរណ៍ មានប្រសាសន៍ថា វិស័យទេសចរណ៍ នៅតែជាវិស័យអាទិភាពមួយរបស់រាជរដ្ឋាភិបាលកម្ពុជា ហើយបានកំណត់ច្បាស់ក្នុងបញ្ចកោណទី២ ដែលផ្តោតលើការធ្វើពិពិធកម្មសេដ្ឋកិច្ច និងការបង្កើនភាពប្រកួតប្រជែង។ គោលដៅសំខាន់ៗរួមមាន៖ ការធ្វើពិពិធកម្មសេវាកម្ម តាមរយៈការបង្កើនប្រភេទសេវាកម្ម និងព្រឹត្តិការណ៍ទេសចរណ៍ឱ្យកាន់តែសម្បូរបែប, ការទាក់ទាញភ្ញៀវទេសចរ សំដៅបង្កើនចំនួនភ្ញៀវជាតិ និងអន្តរជាតិឱ្យកាន់តែច្រើន, បង្កើតឱកាសការងារ បង្កើនប្រាក់ចំណូលជូនពលរដ្ឋ និងជំរុញការនាំចេញនៅនឹងកន្លែង និងធានាបាននូវការការពារវប្បធម៌ បរិស្ថាន និងធនធានធម្មជាតិប្រកបដោយការទទួលខុសត្រូវ។
ឯកឧត្ដមបន្ដថា ដើម្បីឆ្លើយតបទៅនឹងការរីកចម្រើននៃវិស័យនេះ ក្រសួងទេសចរណ៍បានដាក់ចេញនូវយុទ្ធនាការ «បុគ្គលិកម្នាក់ ជំនាញមួយ» ដែលជាផ្នែកមួយនៃផែនការយុទ្ធសាស្ត្រអភិវឌ្ឍន៍ធនធានមនុស្ស។ យុទ្ធនាការនេះមានគោលបំណងពង្រឹងទាំងបរិមាណ និងគុណភាពអ្នកជំនាញទេសចរណ៍។ តម្រូវការកម្លាំងពលកម្មជំនាញក្នុងវិស័យទេសចរណ៍ ចំនួនអ្នកជំនាញដែលត្រូវការឆ្នាំ២០៣០ ប្រមាណ ១,១ លាននាក់ និង ឆ្នាំ២០៣៥ ប្រមាណ ១,៤ លាននាក់។
ឯកឧត្ដម ប៉ាក់ សុខុម បានសង្កត់ធ្ងន់ថា ការបង្កើតឱកាសការងារ និងការអភិវឌ្ឍជំនាញច្បាស់លាស់សម្រាប់យុវជន គឺជាតួនាទីដ៏សំខាន់របស់គ្រប់ភាគីពាក់ព័ន្ធទាំងអស់ ដើម្បីធានាបាននូវការអភិវឌ្ឍប្រកបដោយចីរភាព និងសម្រេចបានតាមគោលដៅអភិវឌ្ឍន៍របស់អង្គការសហប្រជាជាតិ៕
អត្ថបទ និងរូបភាព៖ លោក ឈិត សាវី
កែសម្រួល៖ លោក អ៊ុន ណារាជ្យ
