នៅរសៀលថ្ងៃទី២៣ ខែធ្នូ ឆ្នាំ២០២៥ លោកជំទាវ ញ៉ែម មរកត រដ្ឋលេខាធិការក្រសួងកិច្ចការនារី និងជាអនុប្រធានក្រុមការងាររាជរដ្ឋាភិបាលចុះជួយមូលដ្ឋានស្រុក និង ឯកឧត្តម ចាប តូ អនុរដ្ឋលេខាធិការក្រសួងសង្គមកិច្ច រួមជាមួយរដ្ឋបាលខេត្តសៀមរាប បានចុះសួរសុខទុក្ខ និងនាំយកអំណោយសប្បុរសជន ចែកជូនដល់គ្រួសារកងទ័ព និងគ្រួសារភៀសសឹកចំនួន ១៩០គ្រួសារ ស្ថិតក្នុងស្រុកប្រាសាទបាគង។
ក្នុងឱកាសនោះ លោក ឌី រ៉ាដូ អភិបាលរងខេត្តសៀមរាប បានបញ្ជាក់ថា ក្រោមការណែនាំពីប្រមុខរាជរដ្ឋាភិបាល អាជ្ញាធរបានរៀបចំ “សួនដំណាំបន្លែ” នៅតាមមណ្ឌលសុវត្ថិភាពនានា ដើម្បីឱ្យបងប្អូនភៀសសឹកអាចដាំដុះសម្រាប់ដោះស្រាយជីវភាពប្រចាំថ្ងៃក្នុងអំឡុងពេលស្នាក់នៅបណ្ដោះអាសន្ន។ ទន្ទឹមនឹងនេះ លោកក៏បានផ្ដាំផ្ញើដល់បងប្អូនប្រជាពលរដ្ឋឱ្យយកចិត្តទុកដាក់លើអនាម័យខ្លួនប្រាណ និងបរិស្ថានរស់នៅ បញ្ជូនកូនចៅទៅសិក្សានៅសាលារៀនដែលនៅជិតបំផុត ដែលរៀបចំដោយអាជ្ញាធរ។ ក្នុងករណីមានបញ្ហាសុខភាព ត្រូវប្រញាប់ទៅកាន់មន្ទីរពេទ្យ ឬមណ្ឌលសុខភាព ដោយភ្ជាប់ជាមួយ “បណ្ណភៀសសឹក” ដើម្បីទទួលបានការពិនិត្យ និងព្យាបាលដោយឥតគិតថ្លៃ។
លោកជំទាវ ញ៉ែម មរកត និង ឯកឧត្តម ចាប តូ បានសម្ដែងនូវការសោកស្ដាយជាពន់ពេកចំពោះការបាត់បង់ទ្រព្យសម្បត្តិ និងផ្ទះសម្បែងរបស់បងប្អូន ដោយសារស្ថានភាពវិវាទតាមព្រំដែន។ លោកជំទាវបានសង្កត់ធ្ងន់ថា រាជរដ្ឋាភិបាលក្រោមការដឹកនាំរបស់ សម្ដេចតេជោ ហ៊ុន សែន ប្រធានព្រឹទ្ធសភា និង សម្ដេចធិបតី ហ៊ុន ម៉ាណែត នាយករដ្ឋមន្ត្រី តែងតែគិតគូរពីសុខទុក្ខរបស់ប្រជាពលរដ្ឋគ្រប់ស្រទាប់វណ្ណៈ។ លោកជំទាវបានអំពាវនាវឱ្យប្រជាពលរដ្ឋបន្តជឿជាក់លើការការពារបូរណភាពទឹកដីរបស់វីរកងទ័ព និងត្រូវរក្សាស្មារតី “ខ្មែរស្រឡាញ់ខ្មែរ” សាមគ្គីគ្នាជាធ្លុងមួយដើម្បីជម្នះរាល់ការលំបាក។
លោក សូរ ប្លាតុង អភិបាលស្រុកប្រាសាទបាគង បានឱ្យដឹងថា ក្នុងស្រុកប្រាសាទបាគង មានបងប្អូនភៀសសឹកស្នាក់នៅមណ្ឌលសុវត្ថិភាពទាំង ៦កន្លែង និងតាមខ្នងផ្ទះ សរុបចំនួន ២,៥០២គ្រួសារ ស្មើនឹង ៧ ៩៦៤នាក់ គិតត្រឹមថ្ងៃទី២៣ ខែធ្នូ ឆ្នាំ២០២៥៕
អត្ថបទ និងរូបភាព៖ មន្ត្រីមន្ទីរ
កែសម្រួល៖ លោក អ៊ុន ណារាជ្យ
