កាលពីរសៀលថ្ងៃទី២២ ខែវិច្ជិកា ឆ្នាំ២០១៩ ម្សិលមិញនេះ ក្រុមហ៊ុនតូយ៉ូតា ខេមបូឌា បាននាំយកនូវថវិកាសប្បុរសធម៌ ចំនួន ១៥.០០០ដុល្លារអាមេរិក ដែលទទួលបានពីការប្រគុំតន្ត្រី តូយ៉ូតា ក្លាស៊ិក យកមកប្រគល់ជូនដល់មន្ទីរពេទ្យកុមារអង្គរខេត្តសៀមរាប ដើម្បីជួយទ្រទ្រង់ការខិតខំប្រឹងប្រែងរបស់មន្ទីរពេទ្យក្នុងការផ្តល់សេវាព្យាបាលដោយឥតគិតថ្លៃ និងប្រកបដោយគុណភាពដល់កុមារមកពីគ្រប់ទីកន្លែងក្នុងប្រទេសកម្ពុជា។
លោក ឧកញ៉ា គង់ នួន ប្រធានក្រុហ៊ុនតូយ៉ូតា ខេមបូឌា បានមានប្រសាសន៍ថា ការនាំយកថវិកាដែលបានមកពីការប្រគុំតន្ត្រី តូយ៉ូតា ក្លាស៊ិក យកមកបរិច្ចាគជូនដល់មន្ទីរពេទ្យនៅថ្ងៃនេះ គឺជាការចូលរួមចំណែកមួយបន្ថែមទៀត ពីក្រុមហ៊ុនក្រុហ៊ុនតូយ៉ូតា ខេមបូឌា ដែលតែងយកចិត្តទុកដាក់ចំពោះការអភិវឌ្ឍប្រទេសកម្ពុជា នេះជាឆ្នាំទី២ហើយ ដែលក្រុមហ៊ុនតូយ៉ូតាបានធ្វើការផ្តល់ជូនជាថវិកាដល់មន្ទីរពេទ្យកុមារអង្គរ ដែលសកម្មភាពនេះ ជាការបង្ហាញនូវទឹកចិត្តរួមគ្នាជួយដល់មន្ទីរពេទ្យកុមារអង្គរ ដែលបានខិតខំពិនិត្យព្យាបាលសង្គ្រោះដល់កុមារកម្ពុជាប្រកបដោយទឹកចិត្តសប្បុរសធម៌ តាមរយៈផ្តល់នូវសេវាព្យាបាលសុខភាពផ្សេងៗជាច្រើន សម្រាប់ជំងឺកុមារគ្រប់ប្រភេទ រាប់ចាប់ពីជំងឺស្រាលរហូតដល់ជំងឺធ្ងន់ផងដែរ ។
មានប្រសាសន៍ក្នុងឱកាសនោះ លោកវេជ្ជបណ្ឌិត ងួន ចាន់ភ័ក្ត្រា នាយកមន្ទីរពេទ្យកុមារអង្គរ បានសម្ដែងនូវការអរគុណចំពោះហ៊ុនក្រុហ៊ុនតូយ៉ូតា ខេមបូឌា ដែលបាននាំយកថវិកាជូនជាថវិកាដល់មន្ទីរពេទ្យកុមារអង្គរ ខណៈដែលមន្ទីរពេទ្យកុមារអង្គរ នៅខ្វះថវិកា និងមិនទាន់គ្រប់តាមតម្រូវការសម្រាប់ប្រតិបត្តិការ ព្រោះថាកុមារដែលចូលមកទទួលសេវាសង្គ្រោះ ព្យាបាល និងថែទាំជំងឺ មិនមានការបង់ថ្លៃទេ មិនតែប៉ុណ្ណោះ មន្ទីរពេទ្យបានជួយឧបត្ថម្ភរបប ហូបចុកបន្ថែម ដល់គ្រួសារកុមារក្រីក្រ កំពុងសម្រាកព្យាបាលក្នុងមន្ទីរពេទ្យថែមទៀតផង ក្នុងនោះក៏បានជួយសង្គ្រោះ និងព្យាបាលដល់កុមារ លើសេវាសង្គ្រោះបន្ទាន់ វះកាត់បេះដួង និងពិនិត្យព្យាបាលជំងឺទូទៅ សម្រាប់កុមារអ្នកជំងឺធ្ងន់ ដែលមានបន្ទប់សម្រាប់សម្រាកព្យាបាលផងដែរ ។
ព័ត៌មានជាតិ ថ្មីៗ
លោកវេជ្ជបណ្ឌិត ងួន ចាន់ភ័ក្ត្រា មានប្រសាសន៍បន្ថែមថា មន្ទីរពេទ្យកុមារអង្គរ ដើរតួនាទីយ៉ាងសំខាន់ក្នុងការព្យាបាល ការអប់រំ ការបណ្តុះបណ្តាលបុគ្គលិកសុខាភិបាល និងការការពារដល់ សហ គមន៍ ហើយមន្ទីរពេទ្យព្យាបាលដោយឥតគិតថ្លៃដល់គ្រប់អ្នកជំងឺ ដែលនេះជាបញ្ហាលំបាករបស់យើង ត្រូវការថវិកាដើម្បីទ្រទ្រង់ ដោយពឹងលើសប្បុរសធម៌ទាំងក្នុង និងក្រៅប្រទេស ៕
អត្ថបទ និង រូបថត ៖ លោក ទ្រា ពន្លឺ
កែសម្រួលអត្ថបទ ៖ លោក លីវ សាន្ត
