យុវជនសាខាកាកបាទក្រហមកម្ពុជាខេត្តសៀមរាប មានសមាជិកសរុបចំនួន ៣៦ នាក់ ដឹកនាំដោយលោកស្រី សំ សាវ៉ាង មន្ត្រីគម្រោងសុវត្ថិភាពចរាចរណ៍ នៃសាខាកាកបាទក្រហមកម្ពុជាខេត្តសៀមរាប និង លោក ឃឹម សុផល អ្នកសម្របសម្រួលគម្រោងសុវត្ថិភាពចរាចរណ៍ បានផ្សព្វផ្សាយសុវត្ថិភាពចរាចរណ៍ ស្តីពី ហានីភ័យការបើកបរក្រោមឥទ្ធិពលគ្រឿងស្រវឹង និង បើកបរមិនពាក់មួកសុវត្ថិភាព នៅវិទ្យាល័យ សម្តេចឪ រយៈពេល២ថ្ងៃ គឺថ្ងៃទី២១-២២ ខែវិច្ឆិកា ឆ្នាំ២០១៩ ក្នុងគោលបំណងចូលរួមកាត់បន្ថយអត្រាការស្លាប់ របួស និងពិការភាពដោយគ្រោះថ្នាក់ចរាចរណ៍ ។
ក្នុងសកម្មភាពផ្សព្វផ្សាយនោះ មានបង្រៀនអំពីការមួកពាក់មួកសុវត្ថិភាពឲ្យបានត្រឹមត្រូវ , ផលប៉ះពាល់នៃការបើកបរក្រោមឥទ្ធិពលគ្រឿងស្រវឹង , អប់រំផ្សព្វផ្សាយតាមថ្នាក់រៀន , បង្រៀនអំពីរបៀបឆ្លងផ្លូវដោយសុវត្ថិភាព ព្រមទាំងមានចែកខិតប័ណ្ណសុវត្ថិភាពចរាចរណ៍ ផ្សព្វផ្សាយព័ត៌មានពីស្ថានភាពគ្រោះថ្នាក់ចរាចរណ៍ វិធីពាក់មួកសុវត្ថិភាព ឱ្យបានត្រឹមត្រូវ និងសារសុវត្ថិភាព (ថ្ងៃនេះថ្ងៃស្អែកកុំឱ្យមានគ្រោះថ្នាក់ចរាចរណ៍) និងស្ទិកខ័រចំណាំងផ្លាតជនពិការផងដែរ។
លោកស្រី សំ សាវ៉ាង បានឱ្យដឹងថា បច្ចុប្បន្នគ្រោះថ្នាក់ចរាចរណ៍ គឺជាបញ្ហាប្រឈមដ៏ធំរបស់ប្រទេសកម្ពុជា វាបានសម្លាប់មនុស្សជារៀងរាល់ថ្ងៃ បានធ្វើឱ្យបាត់បង់ធនធានមនុស្ស បន្សល់ទុកនូវកុមារកំព្រា ស្ត្រី មេម៉ាយ ជនពិការ ប៉ះពាល់ដល់សេដ្ឋកិច្ចប្រទេសជាតិ និងខូចខាតសណ្តាប់ធ្នាប់សង្គម គឺបណ្តាលមកពីអ្នកប្រើប្រាស់ផ្លូវ មិនគោរពច្បាប់ចរាចរណ៍ បើកបរក្រោមឥទ្ធិពលគ្រឿងស្រវឹង បើកបរហួសល្បឿនកំណត់ និងមិនពាក់មួកសុវត្ថិភាព នៅពេលធ្វើដំណើរផងដែរ។
លោក ឈិន តៃឈាង នាយកសាលាវិទ្យាល័យសម្តេចឪ បានមានប្រសាសន៍ថា៖ នៅសាលាវិទ្យាល័យរបស់លោក បច្ចុប្បន្ននេះ មានសិស្សសរុបចំនួន២.៦៥០នាក់ និងលោកគ្រូ អ្នកគ្រូចំនួន២០៤នាក់ ខណៈកាលពីឆ្នាំចាស់កន្លងទៅកូនសិស្សបានជួបប្រទះនឹងគ្រោះថ្នាក់ចរាចរណ៍ដែលបណ្តាលមកពីឡានដឹកដី បើកបរដោយគ្មានការប្រុងប្រយ័ត្នទើបធ្វើឲ្យគ្រោះថ្នាក់បែបនោះ ដូច្នេះតាមរយៈនេះ សំណូមពរដល់អ្នកបើកបរយាយន្តគ្រប់ប្រភេទ ពេលមកដល់ជិតសាលារៀន មន្ទីរពេទ្យ និងទីប្រជុំជននានា សូមមេត្តាបន្ថយល្បឿនផង ដើម្បីរួមគ្នាកាត់បន្ថយ ការស្លាប់និងរបួសដោយសារគ្រោះថ្នាក់ចរាចរណ៍ ព្រមទាំងបានជំរុញដល់ប្រជាពលរដ្ឋដែលបានចូលរួម សូមជួយណែនាំដល់កូនចៅក្នុងសមាជិគ្រួសារ និងអ្នកជិតខាង ឱ្យពួកគាត់ពេលបើកបរត្រូវពាក់មួក និងពាក់ខ្សែក្រវ៉ាត់សុវត្ថិភាពឱ្យបានជាប់ជាប្រចាំ បើកបរទៅតាមល្បឿនកំណត់ គោរពស្លាកសញ្ញាតាមដងផ្លូវ ជាដើម ដើម្បីជៀសវាងនៅការគ្រោះថ្នាក់ដោយយថាហេតុណាមួយបានកើតឡើង ៕
ការផ្សព្វផ្សាយស្ដីពី ពិការភាពនិងសុវត្ថិភាពចរាចរណ៍ នៅវិទ្យាល័យសម្តេចឪ…………….
ក្រុមការងារសាខាកាកបាទក្រហមកម្ពុជាខេត្តសៀមរាប ធ្វើការផ្សព្វផ្សាយស្ដីពី ពិការភាពនិងសុវត្ថិភាពចរាចរណ៍ នៅវិទ្យាល័យសម្តេចឪ#ព័ត៌មានខេត្តសៀមរាប
Posted by ទូរទស្សន៍ជាតិខេត្តសៀមរាប – TV Siem Reap on Saturday, November 23, 2019
អត្ថបទ និង រូបថត ៖ លោក ស៊ាន សុផាត
កែសម្រួលអត្ថបទ ៖ លោក លីវ សាន្ត
