ប្រាសាទកោះកែរ ដែលស្ថិតនៅក្នុង អតីតរាជធានីកោះកេរិ៍ដ មានទំហំផ្ទៃដី១៦X១៦គីឡូម៉ែត្រ គឺជាតំបន់ទេសចរណ៍ដ៏ទាក់ទាញ ដែលក្នុងមួយឆ្នាំៗ មានភ្ញៀវទេសចរជាតិ និងអន្ដរជាតិ ប្រមាណ២ម៉ឺននាក់មកទស្សនា។ ប្រាសាទនេះ ស្ថិតនៅក្នុង ភូមិស្រយ៉ង់ជើង ឃុំស្រយ៉ង់ ស្រុកគូលេន ខេត្តព្រះវិហារ។
នៅក្នុងសិក្ខាសាលាពិគ្រោះយោបល់ រវាងអាជ្ញាធរជាតិព្រះវិហារ ជាមួយក្រុមវិស័យឯកជន និងស្ថាប័នពាក់ព័ន្ធ ស្ដីពី ផែនការគ្រប់គ្រងទេសចរណ៍តំបន់ប្រាសាទកោះកែរ ធ្វើឡើងនៅខេត្ដសៀមរាប កាលពីថ្ងៃទី២៣ ខែវិច្ឆិកាឆ្នាំ២០១៩ ឯកឧត្ដម គង់ ពុទ្ធិការ អគ្គនាយកអាជ្ញាធរជាតិព្រះវិហារ បានប្រសាសន៍ថា រមណីយដ្ឋានប្រាសាទកោះកែរ មានការទាក់ទាញអ្នកទេសចរប្រកបដោយនិរន្តរភាព ដូចតំបន់រមណីយដ្ឋានអង្គរដែរ។ រូបចំលាក់ដ៏ល្អឯក ដែលមានលក្ខណៈខុសប្លែកពីអង្គរ ជាពិសេស ហេដ្ឋារចនាសម្ព័ន្ធ ប្រព័ន្ធធារាសាស្ត្របុរាណ ដែលត្រូវបានអ្នកស្រាវជ្រាវវាយតម្លៃថា ជាស្នាដៃដែលបានជះឥទ្ធិពលដល់ការ កសាងប្រព័ន្ធធារាសាស្ត្រនៅក្នុងតំបន់អង្គរ។
ឯកឧត្ដមបានបញ្ជាក់ថា រាជរដ្ឋាភិបាលកម្ពុជា បានប្រគល់បេសកកម្មសំខាន់ ចំនួនពីរ ដល់អាជ្ញាធរជាតិព្រះវិហារ ក្នុងការអភិរក្ស និងការអភិវឌ្ឍលើតំបន់រមណីយដ្ឋានកោះកែរ និងប្រាសាទព្រះវិហារ។ បេសកកម្មទាំងនេះ បានផ្ដោតលើ ការចូលរួមអភិវឌ្ឍជីវភាពសហគមន៍ប្រជាជនក្នុងមូលដ្ឋាន និងការអភិវឌ្ឍន៍ទេសចរណ៍ ព្រោះវាជាផ្នែកមួយសំខាន់ក្នុងការជួយកសាងសេដ្ឋកិច្ចជាតិ។
ឯកឧត្ដម គង់ ពុទ្ធិការ បានលើកឡើងថា ដើម្បីកែប្រែ រមណីយដ្ឋានប្រាសាទកោះកែរជាគោលដៅទស្សនាថ្មីមួយដ៏ ពេញនិយម គឺមិនអាចខ្វះបានពីការចូលរួម របស់ភាគីពាក់ព័ន្ធនានាទាំងក្នុងកម្រិតថ្នាក់ជាតិ និងវិស័យឯកជនបានឡើយ។ ព្រោះ ពួកគាត់ជាអ្នកមានទំនាក់ទនងផ្ទាល់ ជាមួយភ្ញៀវទេសចរ និងប្រកបដោយប្រសិទ្ធិភាព មួយវិញទៀតវាជា គ្រប់ភាគីពាក់ព័ន្ធ ក៏ត្រូវមានការទទួលខុសត្រូវខ្ពស់ ចំពោះការអភិរក្សបេតិកភណ្ឌ ធនធានធម្មជាតិ និងសហគមន៍ប្រជាជនក្នុងតំបន់។
សូមជម្រាបថា ប្រាសាទកោះកែរ មានចម្ងាយ ៧២គ.ម ទីរួមខេត្តសៀមរាប កាត់តាមផ្លូវលេខ៦៤ (២១១) និងបន្តឆ្លងកាត់តាមផ្លូវខេត្តព្រះវិហារចម្ងាយ ៤៩គ.ម ពីទីរួមខេត្តព្រះវិហារ។
អត្ថបទ និង រូបថត ៖ លោក បូ សាវី
កែសម្រួលអត្ថបទ ៖ លោក សេង ផល្លី
