នៅរសៀលថ្ងៃទី២៤ ខែវិច្ឆិកា ឆ្នាំ២០១៩ សមាគមអ្នកបើកបររថយន្តដឹកភ្ញៀវប្រចាំអាកាសយាន្តដ្ឋានអន្តរជាតិសៀមរាប បានរៀបចំបើកសន្និបាតសាមញ្ញបូកសរុបលទ្ឋផលការងាររបស់ក្រុមប្រឹក្សាភិបាលអាណត្តិទី៩ ប្រចាំឆ្នាំ២០១៩ និងលើកទិសដៅការងារសម្រាប់អនុវត្តបន្តឆ្នាំ២០២០ នៅសណ្ឋាគារស៊ីធីអង្គរខេត្តសៀមរាប ក្រោមអធិបតីភាពឯកឧត្តមអ្នកឧកញ៉ា សៀង ណាំ តំណាងរាស្ត្រមណ្ឌលសៀមរាប និង ឯកឧត្តម ប៊ុន រដ្ឋា នាយកអាកាយនដ្ឋានអន្តរជាតិសៀមរាប ដោយមានការចូលរួមពីសំណាក់សមាជិកសមាជិកាសមាគម សរុបចំនួនប្រមាណជាង២៥០នាក់។
លោក អេង ភារម្យ ប្រធានសមាគមអ្នកបើកបររថយន្តដឹកទេសចរប្រចាំអាកាសយាន្តដ្ឋានអន្តរជាតិសៀមរាប ថា៖សមាគមនេះបានបង្កើតឡើងនៅឆ្នាំ១៩៩៨ បច្ចុប្បន្នមានសមាជិក សមាជិកា ចំនួន៣២៥នាក់ក្នុងនោះស្រី១២នាក់ ចែកចេញជាពីរផ្នែក គឺផ្នែករថយន្ត និងផ្នែកទោចក្រយានយន្ត ហើយចាប់ពីខែមករាឆ្នាំ២០១៨មក អ្នកបើកបររថយន្តជួបនឹងបញ្ហាប្រឈមដៃគូប្រកួតប្រជែងសេវាកម្មដឹកភ្ញៀវតាមរយៈApp មានដូចជាGrab App Pass Appជាដើម ប៉ុន្តែសម្រាប់ទិសដៅត្រូវអនុវត្តបន្ត គឺពង្រឹងទំនាក់ទំនងជាមួយស្ថាប័នពាក់ព័ន្ឋ ដូចជាមន្ទីរទេសចរណ៍ខេត្ត សាលាខេត្តនិងក្រុមហ៊ុនខេមស៍ជាដើម ពង្រឹងផ្នែកសេវាកម្មនិងបដិសណ្ឋារកិច្ចឱ្យកាន់តែល្អប្រសើរ បង្កើតកម្មវិធីសប្បុរសធម៌សម្រាប់ជនក្រីក្រនិងគ្រោះមហន្តរាយនានា ។
ឯកឧត្តមអ្នកឧកញ៉ា សៀង ណាំ តំណាងរាស្ត្រមណ្ឌលសៀមរាប មានប្រសាសន៍ថា វិស័យទេសចរណ៍នៅខេត្តសៀមរាប បាននឹងកំពុងបន្តបោះជំហ៊ានទៅមុខ ស្របនឹងវិស័យផ្សេងទៀត ប៉ុន្តែគ្មានប្រទេសណាមួយនៅលើសាកលលោក ដែលអាចស្វែងរកការរីកចម្រើនបាននោះទេ បើសិនជាប្រទេសជាតិណាមួយនោះគ្មានសន្តិភាព ហើយក៏រឹតច្បាស់ណាស់ដែរថា សត្រូវដ៏ធំបំផុតរបស់ក្នុងវិស័យទេសចរណ៍ គឺអសន្តិសុខ យ៉ាងណាក៏ដោយសម្រាប់ការជំរុញសេវាកម្មទេសចរណ៍ឲ្យស្ថិតចូលក្នុងបន្ទាត់នៃភាពទាក់ទាញនោះ ខ្សែក្រវ៉ាត់ទី១ គឺបដិសណ្ឋារកិច្ចល្អ ហេតុនេះបងប្អូនដែលកំពុងប្រកបអាជីកម្មដឹកជញ្ជូនភ្ញៀវ គួរត្រូវត្រិះរិះពិចារណាពីស្ថានភាពនយោបាយ និងសេដ្ឋកិច្ចទាំងស្ថានភាពក្នុងស្រុកនិងសកល ព្រោះថា នយោបាយនិងសេដ្ឋកិច្ច តែងតែដើរទន្ទឹមគ្នាជានិច្ច។
ព័ត៌មានជាតិ ថ្មីៗ
ឯកឧត្តម សៀង ណាំ មានប្រសាសន៍បន្ថែមថា អ្នកបើកបររថយន្តដឹកជញ្ជូនភ្ញៀវទេសចរ គឺជាកម្លាំងជួរមុខក្នុងវិស័យទេសចរណ៍ ដែលទាមទារឲ្យមានការគោរពក្រមសីលធម៌ វិជ្ជាជីវៈឲ្យបានត្រឹមត្រូវ ព្រោះថាវិន័យក្រមសីលធម៌នេះ មិនត្រឹមតែមានតម្លៃស្រូបទាញភ្ញៀវ បម្រើទីផ្សារប្រកួតប្រជែងខាងផ្នែកសេវាកម្មប៉ុណ្ណោះទេ តែបើយល់ឲ្យបានស៊ីជម្រៅ អ្នកបើបរម្នាក់ គឺត្រូវតែជាអ្នកការទូតដ៏ប៉ិនប្រសប់ម្នាក់ ព្រោះថាក្រោយពីភ្ញៀវចុះពីលើយន្តហោះ អ្នកបើកបររថយន្តនេះហើយ ដែលត្រូវជួបប្រាស្រ័យរាក់ទាក់មុនគេបំផុត ជាមួយភ្ញៀវទេសចរទាំងនោះ ដូច្នេះវាមិនមែនតែសម្រាប់ការធ្វើឲ្យប្រសើរឡើងនូវសេវាកម្មជំនាញរបស់ខ្លួនប៉ុណ្ណោះទេ តែកិត្តិយសជាតិ ក៏ស្ថិតនៅជាមួយគ្នានោះដែរ៕
អត្ថបទ និង រូបថត ៖ លោក យូ វង្ស និង លោក ងិន គឹមឡេង
កែសម្រួលអត្ថបទ ៖ លោក លីវ សាន្ត
