នៅព្រឹកថ្ងៃទី ២៤ ខែ វិច្ឆិកា ឆ្នាំ២០១៩នេះ រដ្ឋបាលខេត្តសៀមរាប បានប្រារព្ធទិវាអន្តរជាតិ រំលឹកដល់ជនរងគ្រោះដោយគ្រោះថ្នាក់ចរាចរណ៍ផ្លូវគោកលើកទី១៤ នៅស្រុកសូទ្រនិគម ក្រោមអធិបតីភាព លោក ពិន ប្រាកដ អភិបាលរងនៃគណៈភិបាលខេត្តសៀមរាប និង ជាអនុប្រធាន នៃអនុគណៈកម្មការសុវត្ថិភាពចរាចរណ៍ផ្លូវគោកខេត្តសៀមរាប ដោយមានការអញ្ជើញចូលរួមពីថ្នាក់ដឹកនាំមន្ទីរ អង្គភាព អាជ្ញាធរស្រុក មន្ត្រីរាជការ សិស្សានុសិស្ស និង ប្រជាពលរដ្ឋ ប្រមាណជាង ៥០០នាក់ចូលរួម ។
លោក ពិន ប្រាកដ មានប្រសាសន៍ថា ការប្រារព្ធទិវានេះ គឺជាការបន្លឺស្នូរជួងជាថ្មីទៀតរបស់រាជរដ្ឋាភិបាលកម្ពុជា ជាមួយនឹងការផ្សព្វផ្សាយច្បាប់ ស្តីពីចរាចរណ៍ផ្លូវគោកដែលទើបតែមានការធ្វើវិសោធនកម្មថ្មី ដើម្បីដាស់តឿនអ្នកប្រើប្រាស់ផ្លូវ ទាំងថ្មើរជើង និងអ្នកបើកបរយានយន្តគ្រប់ប្រភេទ ត្រូវតែផ្លាស់ប្តូរឥរិយាបថ ដែលមិនគោរពច្បាប់ មកប្រកាន់យកឥរិយាបថ ចេះអធ្យាស្រ័យគ្នា និងគោរពច្បាប់ចរាចរណ៍ នៅពេលធ្វើដំណើរ និង បើកបរយានយន្ត ។
លោក ពិន ប្រាកដ មានប្រសាសន៍បន្ថែមថា ជាសាកលនៅបណ្តាប្រទេសក្នុងតំបន់អាស៊ីប៉ាស៊ីហ្វិក និងទូទាំងពិភពលោក បានប្រារព្ធទិវានេះដូចគ្នា រំលឹកដល់ជនរងគ្រោះដោយគ្រោះថ្នាក់ចរាចរណ៍ផ្លូវគោក ហើយសេចក្តីសម្រេចរបស់អង្គការសហប្រជាជាតិ ស្តីពីទស្សវត្សរ៍សុវត្ថិភាពចរាចរណ៍ផ្លូវគោក គឺកាត់បន្ថយចំនួនអ្នកស្លាប់ឲ្យបាន ៥០% នៅក្នុងឆ្នាំ២០២០ ខណៈសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានចេញនូវអនុសាសន៍ និង អំពាវនាវឲ្យជាពលរដ្ឋកម្ពុជា អនុវត្តដោយការចងចាំ គឺ ថ្ងៃនេះ ថ្ងៃស្អែក កុំឲ្យមានគ្រោះថ្នាក់ចរាចរណ៍ ។
ព័ត៌មានជាតិ ថ្មីៗ
លោក គី វិរិន្ទ ប្រធានមន្ទីរសាធារណការនិងដឹកជញ្ជូន និងជាប្រធានលេខាធិការដ្ឋាននៃអនុគណកម្មការសុវត្ថិភាពចរាចរណ៍ផ្លូវគោកខេត្តសៀមរាប បានឲ្យដឹងថា បើគិតជាមធ្យមក្នុងខេត្តសៀមរាបយើង ក្នុងមួយសប្តាហ៍មានប្រជាពលរដ្ឋស្លាប់២នាក់ ដោយសារគ្រោះថ្នាក់ចរាចរណ៍ ដែលជាបញ្ហាប្រឈម ចំពោះការអភិវឌ្ឍជាតិ សុខុមាលភាពប្រជាជន ប៉ះពាល់ដល់គោលនយោបាយកាត់បន្ថយភាពក្រីក្រ របស់រាជរដ្ឋាភិបាល និង បន្សល់ផលវិបាកជាច្រើនទៀតក្នុងសង្គមជាតិ ដូចជាបានបង្កើតឡើងនូវសោកនាដកម្ម បន្សល់ទុកកូនកំព្រា ស្ត្រីមេម៉ាយ និងពិការភាពជាដើម ។
សូមបញ្ជាក់ថា យោងតាមការប្រៀបធៀបទិន្នន័យគ្រោះថ្នាក់ចរាចរណ៍ផ្លូវគោកនៅខេត្តសៀមរាប រយៈពេល១០ខែ រវាងឆ្នាំ២០១៨ និងឆ្នាំ២០១៩ ឃើញថាឆ្នាំ២០១៨មានគ្រោះថ្នាក់ចរាចរណ៍ចំនួន ៥៨ករណី ខណៈឆ្នាំ២០១៩មានចំនួន ៧៤ករណី កើនឡើង១៦ករណី មានអ្នករងគ្រោះចំនួន២០៦នាក់ ក្នុងនោះស្រី៨១នាក់ ហើយបណ្តាលឲ្យស្លាប់ចំនួន៧៤នាក់ ក្នុងនោះស្រី១៨នាក់ , របួសធ្ងន់ចំនួន ៤២នាក់ ក្នុងនោះស្រី២១នាក់ និង របួសស្រាលចំនួន៩០នាក់ ក្នុងនោះស្រី៣៨នាក់ ៕
អត្ថបទ ៖ លោក ខេង ឧត្ដម
រូបថត ៖ រដ្ឋបាលខេត្តសៀមរាប
