នៅព្រឹកថ្ងៃទី២៥ ខែវិច្ឆិកា ឆ្នាំ២០១៩នេះ នៅរដ្ឋបាលសាលាខេត្តសៀមរាប ក្រសួងបរិស្ថាន បានរៀបចំវេទិកា ការការពារ និងអភិរក្សធនធានធម្មជាតិ ក្រោមប្រធានបទ «ការប្ដេជ្ញាចិត្ត និងភាពជាម្ចាស់ការនៅមូលដ្ឋាន ដើម្បីធានាឲ្យបានដល់និរន្តរភាពនៃការប្រើប្រាស់ធនធានធម្មជាតិ»។
វេទិកានេះ ប្រារព្ធក្រោមអធិបតីភាព ឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន លោក ង៉ាន់ ភិរុណ អភិបាលរងខេត្តសៀមរាប ដោយបានចូលរួមពីសំណាក់ ឯកឧត្តម លោកជំទាវ រដ្ឋលេខាធិការ អនុរដ្ឋលេខាធិការ អភិបាលរងខេត្ត (កំពង់ចាម កំពង់ធំ ព្រះវិហារ បន្ទាយមានជ័យ និងឧត្ដរមានជ័យ) ព្រមទាំងអស់លោក លោកស្រី ប្រធាន អនុប្រធាន មន្ទីរបរិស្ថាន ប្រធានសហគមន៍ និងអ្នកពាក់ព័ន្ធនានាសរុបចំនួនប្រមាណជាង២២៨នាក់។
តាមសេចក្ដីរាយការណ៍របស់ លោក ង៉ាន់ ភិរុណ អភិបាលរងខេត្តសៀមរាប បានឲ្យដឹងថា តំបន់ការពារធនធានធម្មជាតិ ក្នុងខេត្តសៀមរាប មាន០៨កន្លែង ដូចជា៖ ១-ឧទ្យានជាតិព្រះជ័យវរ្ម័ន-នរោត្តម ភ្នំគូលែន ២-តំបន់ការពារទេសភាពអង្គរ ៣-តំបន់ប្រើប្រាស់ច្រើនយ៉ាងបឹងទន្លេសាប ៤-ដែនជម្រកសត្វព្រៃគូលែន-ព្រហ្មទេព ៥-ដែនជម្រកសត្វព្រៃបឹងពែរ ៦-ដែនជម្រកសត្វព្រៃភ្នំត្នោត-ភ្នំពក ៧-តំបន់ការពារទេសភាពទំនាបខាងជើងបឹងទន្លេសាប ៨-តំបន់ស្នូលបឹងទន្លេឆ្មារ (តំបន់រ៉ាមសារ) ។ តំបន់ការពារទាំងអស់នេះ កំពុងតែប្រឈមនឹងការកាប់ទន្ទ្រានព្រៃឈើ និងរានយកដីពីជនខិលខូចជាបន្តបន្ទាប់។
ជាអនុសាសន៍របស់ ឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន ដើម្បីការពារ និង អភិរក្សធនធានធម្មជាតិរបស់យើង លុះត្រាតែមានការប្ដេជ្ញារចិត្ត និងភាពជាម្ចាស់ការនៅមូលដ្ឋាន ក្នុងនោះ ប្រជាពលរដ្ឋនៅក្នុងសហគមន៍ ត្រូវទទួលបានអត្ថប្រយោជន៍ពីសហគមន៍ និងធ្វើឲ្យជីវភាពសហគមន៍មានការប្រសើរឡើង រួមមានអាហាររូបត្ថម្ភ សន្តិសុខស្បៀង សុខុមាលភាពរបស់ប្រជាជន ភាពមានការងារធ្វើ ហេដ្ឋារចនាសម្ព័ន្ធគ្រប់គ្រាន់ ដើម្បីកែប្រែសហគមន៍ តំបន់អភិវឌ្ឍន៍ តំបន់អេកូទេសចរណ៍ និងស្របតាមគោលនយោបាយ អេកូទេសចរណ៍ រួមបញ្ចូលសហគមន៍ជាបេតិកភណ្ឌជាតិ ។
ឯកឧត្តមរដ្ឋមន្ត្រី ក៏បានបង្ហាញពីគោលបំណងនៃវេទិកានេះផងដែរ គឺ៖ ១-ដើម្បីពិភាក្សាបញ្ហាប្រឈម និងតម្រូវវការនានា ដែលធ្វើឲ្យរាំងស្ទះ និងប៉ះពាល់ដល់ការប្តេជ្ញាចិត្ត និងភាពជាម្ចាស់ការក្នុងមូលដ្ឋានដែលរួមចំណែកដល់ការគ្រប់គ្រង និងប្រើប្រាស់ធនធានធម្មជាតិដោយនិរន្តរភាព។ ២-ដើម្បីបង្កើនភាពជាម្ចាស់របស់សហគមន៍ទាំងមូលដ្ឋាន និងអ្នកពាក់ព័ន្ធនានានៅថ្នាក់ក្រោមជាតិ ក្នុងការងារអភិបាលកិច្ចធនធានធម្មជាតិ និងការទទួលខុសត្រូវ និងដើម្បីពង្រឹងកិច្ចសហការរវាងអ្នកពាក់ព័ន្ធទាំងអស់ក្នុងការការពារធនធានធម្មជាតិនៅក្នុងប្រទេសកម្ពុជា សម្រាប់អ្នកជំនាន់ក្រោយ វាជាការពិតណាស់ដែលយើងទាំងអស់គ្នាគួរតែចូលរួមអភិរក្ស នឹងថែរក្សាឲ្យបានគង់វង្ស។
ជាមួយគ្នានោះ ឯកឧត្តម ក៏បានលើកទឹកចិត្តឱ្យមន្ត្រីពាក់ព័ន្ធនិងដៃគូចូលរួមរអភិវឌ្ឍន៍នៅតាមតំបន់សហគមន៍នានា ដើម្បីលើកកម្ពស់ជីវភាពប្រជាសហគមន៍ តាមរយៈនៃការធ្វើផ្លូវថ្នល់ ទឹកស្អាត ផ្តល់នូវចំណេះដឹងលើការចិញ្ចឹមសត្វគ្រប់ប្រភេទ ដើម្បីប្រជាសហគមន៍អាចដោះស្រាយជីវភាពរស់នៅបានធូរធារ។ ក្រៅពីនេះក្រសួងបរិស្ថាន នឹងចូលរួមសហការជាមួយក្រសួងសុខាភិបាល ក្នុងគោលបំណងលុបបំបាត់នូវជំងឺគ្រុនចាញ់ ជំងឺគ្រុនឈាម ជំងឺអេដស៍ក៏ដូចជាជួយលើវាក់សាំងបង្ការរោគ ជំងឺមួយចំនួន តាមសហគមន៍ផងដែរ៕
អត្ថបទ និង រូបថត ៖ លោក ស៊ាន សុផាត
កែសម្រួលអត្ថបទ ៖ លោក សេង ផល្លី
