ថ្ងៃទី២៦ ខែវិច្ឆិកា ឆ្នាំ២០១៩នេះ គណៈកម្មាធិការជាតិជាតិសន្តិសុខលំហសមុទ្រ កងយោធពលខេមរៈភូមិន្ទ នៃព្រះរាជាណាចក្រកម្ពុជា បានធ្វើជាម្ចាស់ផ្ទះរៀបចំកិច្ចប្រជុំលើកទី១៣ មេបញ្ជាការកងទ័ពជើងទឹកអាស៊ាន ក្រោមប្រធានបទ៖បង្កើនកិច្ចសហប្រតិបត្តិការ ដើម្បីសន្តិសុខសមុទ្រយូរអង្វែង ក្នុងគោលបំណងធ្វើការពិភាក្សាក្នុងក្របខណ្ឌកងទ័ពជើងទឹកអាស៊ាន ដើម្បីពង្រីកទៅវេទិកាអន្តជាតិដទៃទៀតនាពេលខាងមុខ សំដៅលើកកម្ពស់សន្តិភាព និង ស្ថេរភាពក្នុងតំបន់ ក៏ដូចជាជំរុញទំនាក់ទំនងឲ្យកាន់តែរឹងមាំ ក្នុងចំណោមកងទ័ពជើងទឹកអាស៊ាន រួមចំណែកឲ្យកាន់តែស៊ីជម្រៅលើការជឿទុកចិត្តគ្នា កិច្ចសប្រតិបត្តិការ និងការយោគយល់គ្នារវាងកងទ័ពជើងទឹកអាស៊ាន ។
កិច្ចប្រជុំបានប្រព្រឹត្តទៅក្រោមអធិបតីភាពដ៍ខ្ពង់ខ្ពស់សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានគណៈកម្មាធិការជាតិសន្តិសុខលំហសមុទ្រ ដោយមានការចូលរួមពីសំណាក់មេបញ្ជាករកងទ័ពជើងទឹកនៃបណ្តាប្រទេសអាស៊ានទាំង១០ តំណាងមន្ត្រីអនុព័ន្ឋយោធាប្រចាំកម្ពុជា និងប្រតិភូមន្ត្រីក្រសួងការពារជាតិកម្ពុជាសរុបប្រមាណជាង២០០នាក់ ។
នាយឧត្តមនាវី ទៀ វិញ មេបញ្ជាការកងទ័ពជើងទឹកកម្ពុជា និងជាអគ្គលេខាធិកាធិការ នៃគណកម្មាធិការជាតិសន្តសុខលម្ហសមុទ្រ បានបង្ហាញថា ដោយផ្អែកលើស្ថានការជាក់ស្តែងដែលកំពុងអភិវឌ្ឍក្នុងតំបន់ និងអនុលោមតាមគោលការណ៍ចំនួន ៣ ដែលបានលើកឡើងក្នុងកិច្ចប្រជុំថ្នាក់រដ្ឋមន្ត្រីការពារជាតិអាស៊ាន គឺកសាងភាពធន់ទ្រាំរឹងមាំ កសាងសមត្ថភាពឆ្លើយតប និងកសាងសមត្ថភាពនៃការស្តារឡើងវិញ ដើម្បីបម្រើឲ្យគោលបំណងបង្កើនឡើងនូវកាលានុវត្តភាព និងសម្រេចបានគោលដៅជាបឋមខាងលើ គឺត្រូវថែរក្សាការពារសុខសន្តិភាព និងសុវត្តិភាពលើផ្ទៃសមុទ្រក្នុងតំបន់ ប្រធានបទនៃកិច្ចប្រជុំមេបញ្ចាការកងទ័ពជើងទឹកអាស៊ាន ( ANCM )លើកទី១៣ ឆ្នាំ២០១៩នេះ ត្រូវបានជ្រើសរើសយកប្រធានបទ បង្កើនកិច្ចសហប្រតិបត្តិការ ដើម្បីសន្តិសុខសមុទ្រយូរអង្វែង ។
សម្តេចពិជ័យសេនា ទៀ បាញ់ មានប្រសាសន៍ថា ៖ កម្ពុជាពិតជាមានកិត្តិយសដ៏ឧត្តុង្គឧត្តមក្នុងការធ្វើជាម្ចាស់ផ្ទះរៀបចំកិច្ចប្រជុំដ៏មានសារៈសំខាន់នេះ ស្របពេលការប្រារព្ធខួបលើកទី៥០ឆ្នាំនៃការបង្កើតអាស៊ាន ដែលប្រទេសសមាជិកអាស៊ាន ទាំងអស់ ខិតខំប្រឹងប្រែងសម្រេចបាននូវចក្ខុវិស័យសហគមន៍អាស៊ានឆ្នាំ២០១៥ តាមរយៈកិច្ចសហប្រតិបត្តិការឈ្នះ ឈ្នះ ជាមួយនឹងគោលការណ៍ជឿជាក់ ការគោរពផលប្រយោជន៍ទៅវិញទៅមក ខណៈកម្ពុជាបានឆ្លងកាត់ការបែកបាក់ និងសង្គ្រាមស៊ីវិល ដែលអូសបន្លាយជាង៣ ទសវត្សរ៍ បានបន្សល់ទុកនូវសោកនាដកម្ម ទុក្ខវេទនាហួសពីការស្មាន ហើយកម្ពុជានាបច្ចុប្បន្នបានទទួលស្គាល់ថា សន្តិភាពពិតជាមានតម្លៃ មិនអាចខ្វះបាន ទើបជានិច្ចកាលកម្ពុជាបានជំរុញលើកទឹកចិត្ត ខិតខំការពារសុខសន្តិភាព ស្ថិរភាព និងកិច្ចសហប្រតិបត្តិការ ដើម្បីអភិវឌ្ឍន៍ និងការរុងរឿង ។
សម្តេចពិជ័យសេនាឧបនាយករដ្ឋមន្ត្រី ទៀ បាញ់ រដ្ឋមន្ត្រីក្រសួងការពារជាតិ មានប្រសាសន៍បន្ថែម យើងពិតជាទទួលស្គាល់អំពីបញ្ហាប្រឈមទាំងឡាយ ដែលកំពុងបន្តកើតមានឡើងលើលម្ហសមុទ្រ ទាំងសន្តិសុខបែបប្រពៃណី និងមិនប្រពៃណី មានដូចជា បញ្ហាអធិបតេយ្យភាពលើដែនសមុទ្រ បញ្ហាចារកម្មប្រដាប់អាវុធ អន្តោប្រវេសន៍ខុសច្បាប់ ការជួញដូរគ្រឿងញៀន ការនេសាទខុសច្បាប់ ការបំពុលបរិស្ថាន គ្រោះមហន្តរាយធម្មជាតិ អំពើភេវរកម្ម ។ល។ ដូចនេះ កិច្ចសហប្រតិបត្តិការកងទ័ពជើងទឹក នៃបណ្តាប្រទេសអាស៊ាន តាមរយៈនៃកិច្ចប្រជុំ ANCM គឺជាសក្ខីកម្មនៃស្មារតីឯកភាពគ្នា និងជាការខិតខំរួមគ្នាលើវិស័យនាវាចរ ដើម្បីធានាបាននូវសន្តិសុខយូរអង្វែងលើផ្ទៃសមុទ្រ និងទទួលខុសត្រូវលើជោគវាសនា របស់ប្រជាជាតិអាស៊ានទាំងមូល ។
គួររំលឹកដែរថា ៖ កិច្ចប្រជុំមេបញ្ជាការកងទ័ពជើងទឹកអាស៊ាន ដែលហៅកាត់ថា ANCM ចាប់បដិសន្ធិនៅក្នុងឆ្នាំ២០០១ តាមរយៈនៃកិច្ចប្រជុំលើកដំបូងរបស់ខ្លួននាទីក្រុងបាងកក ( ប្រទេសថៃ ) ហើយមានប្រធានបទជាច្រើន ជាពិសេសពាក់ព័ន្ធដល់សន្តិសុខសមុទ្រ ត្រូវបានពិនិត្យ ពិចារណា និងលើកយកមកពិភាក្សា ក្នុងស្មារតីនៃកិច្ចសហប្រតិបត្តិការប្រកបដោយសុឆន្ទៈ ភាពចុះសម្រុងគ្នា ដើម្បីរិះរកដំណោះស្រាយ ដោះស្រាយបញ្ហាប្រឈមទាំងឡាយលើផ្ទៃសមុទ្រ ដើម្បីរក្សាសន្តិភាព និងស្ថិរភាពក្នុងតំបន់ ៕
អត្ថបទ និង រូបថត ៖ លោក យូ វង្ស និង លោក ងិន គឹមឡេង
កែសម្រួលអត្ថបទ ៖ លោក លីវ សាន្ត
