មណ្ឌលព័ត៌មានទេសចរណ៍ គឺជាកន្លែងដ៏សំខាន់ សម្រាប់ភ្ញៀវទេសចរគ្រប់ជាតិសាសន៍ សាកសួរអំពីតំបន់រមណីយដ្ឋានស្អាតៗ តំបន់ប្រាសាទ មធ្យោបាយធ្វើដំណើរក្នុងទីក្រុង ស្ថានភាពអាកាសធាតុ វប្បធម៌ ប្រពៃណី និងរបៀបរវបបរស់នៅរបស់ប្រជាជនក្នុងតំបន់។ ក្នុងនោះ បង្គន់អនាម័យសាធារណៈ ជាផ្នែកមួយដ៏សំខាន់ដើម្បីចូលរួមប្រឡងប្រណាំងវាយតម្លៃទីក្រុងស្អាត។
នៅក្នុងកិច្ចប្រជុំ ស្ដីពីការសាងសង់មណ្ឌលព័ត៌មានទេសចរណ៍ស្តង់ដាជាតិ រួមជាមួយនឹងបង្គន់អនាម័យសាធារណៈស្តង់ដាអាស៊ាន នៅសាលាខេត្តសៀមរាប នារសៀលថ្ងៃ ទី២៥ ខែវិច្ឆិកា ឆ្នាំ២០១៩ ក្រុមការងារគ្រប់គ្រងមណ្ឌលព័ត៌មានទេសចរណ៍ដែលដឹកនាំដោយ ឯកឧត្តម ថោង រដ្ឋសក្តិ អគ្គនាយកនៃអគ្គនាយកដ្ឋានអភិវឌ្ឍន៍ទេសចរណ៍ និង សហប្រតិបត្តិការអន្តរជាតិ និង ជាប្រធានក្រុមការងារគ្រប់គ្រងមណ្ឌលព័ត៌មានទេសចរណ៍កម្ពុជា បានស្នើដល់លោក នាក់ ណេរ៉ុន អភិបាលរងខេត្តសៀមរាប តំណាង ឯកឧត្តម ទៀ សីហា អភិបាលខេត្តសៀមរាប ជួយសហការ និងសម្របសម្រួលលើ កិច្ចការសាងសង់មណ្ឌលព័ត៌មានទេសចរណ៍ នៅលើទីតាំងថ្មីមួយបន្ថែមទៀត ស្ថិតនៅភូមិទ្រាំង សង្កាត់ស្លក្រាម ក្រុងសៀមរាប (កែងសណ្ឋាគារសុខាសៀមរាប ) ដែលមានទំហំ ៣៥ម x ៣៥ម ។
ជាការឆ្លើយតប លោក នាក់ ណេរ៉ុន អភិបាលរងខេត្តសៀមរាប បានបញ្ជាក់ថា ពាក់ព័ន្ធនឹងការស្នើសុំទីតាំងសាងសង់នេះ ឯកឧត្តមអភិបាលខេត្ត រួមទាំងប្រធានមន្ទីរអង្គភាពពាក់ព័ន្ធជុំវិញខេត្តសៀមរាប បានឯកភាពរួចរាល់ និង ជួយសហការ សម្របសម្រួលជាបន្តបន្ទាប់ផងដែរ។
គួរជម្រាបថា កន្លងមកមណ្ឌល់ព័ត៌មានទេសចរណ៍ស្តង់ដាជាតិ រួមជាមួយនឹងបន្ទប់អនាម័យសាធារណៈស្តង់ដាអាស៊ាន មានចំនួន៣ទីតាំង ទី១. នៅសួនច្បារ ឯកឧត្តម អ៊ុង អឿន ទី២. នៅសួនច្បារមុខព្រះរាជដំណាក់ក្រុងសៀមរាប ទី៣.នៅគល់ស្ពានមន្ទីរទេសចរណ៍ចាស់ និងទី៤ គ្រោងសាងសង់ កែងសណ្ឋាគារ សុខាសៀមរាប។
សូមរំលឹកដែរថា កន្លងមក អាស៊ានបានដាក់ចេញនូវការអនុវត្ត ស្តង់ដា គុណភាព ដល់ប្រទេសសមាជិក រួមមាន៖ ស្តង់ដាទីក្រុងទេសចរណ៍ស្អាតអាស៊ាន ស្តង់ដាសហគមន៍ទសចរណ៍អាស៊ាន ស្តង់ដាបង្គន់សាធារណៈអាស៊ាន ស្តង់ដាសណ្ឋាគារបៃតងអាស៊ាន ស្តង់ដាស្ប៉ាអាស៊ាន ស្តង់ដាផ្ទះស្នាក់អាស៊ាន និងស្តង់ដាបន្ទប់ប្រជុំអាស៊ាន (MICE)៕
មណ្ឌលព័ត៌មានទេសចរណ៍ស្តង់ដាជាតិ និងបង្គន់អនាម័យសាធារណៈស្តង់ដា
មណ្ឌលព័ត៌មានទេសចរណ៍ស្តង់ដាជាតិ និងបង្គន់អនាម័យសាធារណៈស្តង់ដាអាស៊ាន ថ្មីមួយទៀត នឹងសាងសង់ក្បែរគ្រឺះស្ថានអង្គរ#ព័ត៌មានខេត្តសៀមរាប
Posted by ទូរទស្សន៍ជាតិខេត្តសៀមរាប – TV Siem Reap on Tuesday, November 26, 2019
អត្ថបទ និង រូបថត ៖ លោក ខេង ឧត្តម
កែសម្រួលអត្ថបទ ៖ លោក សេង ផល្លី
