លោក ម៉ក់ ម៉េងលី និង លោក ប៉ាន សុវណ្ណដាំ ចុងភៅជនជាតិខ្មែរ ២រូប នៃសមាជិកសមាគមចុងភៅកម្ពុជា បាននាំយកមេដាយប្រាក់ចំនួន២គ្រឿងជូនប្រទេសកម្ពុជា ក្នុងព្រឹត្តិការណ៍នៃការប្រកួតធ្វើម្ហូប ដណ្តើមពានរង្វាន់ ម៉ាក្រូ ហូរីកា ឆាលិន ២០១៩ (Makro HoReCa Challenge) 2019 ធ្វើឡើងនៅទីក្រុងបាងកក ប្រទេសថៃ ចាប់ពីថ្ងៃទី២១ ដល់ទី២៤ ខែវិច្ឆិកា ឆ្នាំ២០១៩។
ក្នុងដំណើរមាតុភូមិនិវត្តន៍មកដល់ព្រលានយន្តហោះអន្តរជាតិខេត្តសៀមរាប នាថ្ងៃទី២៥ខែវិច្ឆិកាឆ្នាំ២០១៩ លោក វិន សាន សហស្ថាបនិកសមាគមចុងភៅកម្ពុជា ដែលបានដឹកនាំអ្នកជំនាញចម្អិនម្ហូបកម្ពុជា ចូលរួមការប្រកួតនេះ បានឲ្យដឹងថា កម្មវិធីនេះ គឺជាព្រឹត្តិការណ៍ប្រចាំឆ្នាំ ដែលតែងតែរៀបចំឡើងដោយផ្សារម៉ាក្រូ ក្នុងក្របខណ្ឌថ្នាក់ជាតិ ក៏ប៉ុន្តែសម្រាប់ការប្រកួតក្នុងឆ្នាំ២០១៩នេះ គឺជាលើកទី១ហើយដែលផ្សារម៉ាក្រូ រៀបចំប្រកួតជាលក្ខណៈអន្តរជាតិ ដើម្បីអបរអរសាទរខួបទី ៣០ឆ្នាំ នៃការបង្កើតផ្សារម៉ាក្រូ។ ការប្រកួតនោះ មានប្រទេសចំនួន ៧ប្រទេសចូលរួម និងចែកជា១៨ក្រុម ក្នុងនោះ ១២ ក្រុម ជាក្រុមម្ចាស់ផ្ទះ ប្រទេសថៃ រីឯ ៦ក្រុមទៀតមានដូចជា កម្ពុជា ចិន សិង្ហបុរី ឥណ្ឌា មីយ៉ាន់ម៉ា និងវៀតណាម ។
លោក វិន សាន បានបង្ហាញថា ក្នុងការប្រកួតមួយក្រុមមានគ្នា២រូប មុខម្ហូបសម្រាប់ការប្រកួត គណៈកម្មការតម្រូវឲ្យមាន០៤ មុខ ក្នុងមួយមុខ ១០ចាន រីឯ គ្រឿងផ្សំ មាន បន្លែ ត្រី សាច់ ត្រូវបានជ្រើសរើសយកនៅក្នុងប្រអប់អាថ៌កំបាំង និងមានពេលវេលា ០២ ម៉ោង សម្រាប់ការចម្អិន។ មុខម្ហូបដែលសមាគមចុងភៅកម្ពុជា យកទៅប្រកួតនោះ មាន ញ៉ាំក្រូចថ្លុង-បង្កងយក្ស ឡាបសាច់ជ្រូក ឡុកឡាក់ទា-បាយខ្ទិះដូង និងការីត្រីសាម៉ុង-ទឹកអំពិលទុំ ។
លោក វិន សាន បញ្ជាក់ថា ចុងភៅកម្ពុជា ទទួលបានពិន្ទុ ៨៧ ទទួលបានមេដាយប្រាក់ចំនួន២គ្រឿង។ ប៉ុន្តែ មេដាយមាស ពុំមានប្រទេសដណ្ដើមយកបានឡើយ ដោយ ជ័យលាភីនេះ ត្រូវការរហូតដល់ ៩០ពិន្ទុ។ ដោយឡែក ភាគីម្ចាស់ផ្ទះ ដែលមាន១២ក្រុមចូលរួមប្រកួត ក្នុងនោះមាន១ក្រុម ទទួលបានពានជ័យលាភីកិត្តិយសព្រះមហាក្សត្រ ក្នុងពិន្ទុ ៨៨.៦០ អមដោយមេដាយប្រាក់ចំនួន២ ទឹកប្រាក់ចំនួន ១០ម៉ឺនបាត ។
សូមជម្រាបថា ចុងភៅកម្ពុជាពីររូបដែលទៅចូលរួមប្រកួត គឺ ទី១លោក ម៉ក់ ម៉េងលី អាយុ ២៩ ឆ្នាំ ចាប់យកអាជីពជាចុងភៅអស់រយៈពេល ៨ ឆ្នាំ ធ្លាប់បានរៀនវិជ្ជាធ្វើម្ហូបនៅសាលាសណ្ឋាគារនិងទេសចរណ៍ ប៉ូលឌុយប្រូល ( Paule du brule) ក្នុងខេត្តសៀមរាប រយៈពេល ១ ឆ្នាំ ។ ទី២ លោក ប៉ាន សុវណ្ណដាំ អាយុ ៣៥ ឆ្នាំ បច្ចប្បន្នកំពុងធ្វើការនៅក្នុងគ្រុបភោជនីយដ្ឋាន ចំនួន ១៤ ក្នុងក្រុងសៀមរាប ។
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក សេង ផល្លី
