នៅព្រឹកថ្ងៃទី២៦ ខែវិច្ចិកា ឆ្នាំ២០១៩នេះ មន្ទីរកិច្ចការនារីខេត្តសៀមរាបបានបើកកិច្ចប្រជុំដើម្បីធ្វើការបូកសរុបលទ្ធផលការងារបញ្ជ្រាបយេនឌ័រប្រចាំឆមាសទី០២ ឆ្នាំ២០១៩របស់ខ្លួន ជាមួយបណ្ដាលយេនឌ័រមន្ទីរ អង្គភាពនានាក្នុងខេត្ត ដោយមានការអញ្ជើញចូលរួមក្រោមអធិបតីលោកស្រី យូ សុភា អភិបាលរងខេត្ត តំណាងដ៏ខ្ពងខ្ពស់ ឯកឧត្តម ទៀ សីហា អភិបាលនៃគណៈអភិបាលខេត្តសៀមរាប ដោយមានការអញ្ជើញចូលរួមពីសំណាក់ លោកលោកស្រីជាប្រធាន អនុប្រធានមន្ទីរ អង្គភាពនានាជុំវិញខេត្ត ព្រមទាំងអង្គការជាដៃគូរបស់មន្ទីរកិច្ចការនារីខេត្តជាច្រើននាក់ផងដែរ ។
បើតាមការលើកឡើងរបស់លោកស្រី ហិញ ហាច ប្រធានមន្ទីរកិច្ចការនារីខេត្តសៀមរាប បានឲ្យដឹងថា គោលបំណងនៃកិច្ចប្រជុំនៅពេលនេះ គឺដើម្បីធ្វើការពង្រឹងកិច្ចការងារផ្សេងៗ ដោយសហការជាមួយបណ្ដាលយេនឌ័រ មន្ទីរ អង្គភាព និងអង្គការនានា ដើម្បីធ្វើការជំរុញការងារយេនឌ័រ និងការផ្ដល់សេវាជូនជនរងគ្រោះដោយអំពើហិង្សាទាក់ទងនឹងយេនឌ័រ ជាពិសេសដើម្បីធ្វើការបូកសរុបនូវលទ្ធផលការងារបញ្ជ្រាបយេនឌ័រប្រចាំឆមាសទី២ ឆ្នាំ២០១៩ និង ពិភាក្សាអំពីបញ្ហាប្រឈម ស្វែងរកដំណោះស្រាយបន្ថែមដើម្បីអនុវត្តបន្តសម្រាប់ឆ្នាំ២០២០ ។
មានប្រសាសន៍ក្នុងឱកាសនោះ លោកស្រី យូ សុភា បានលើកឡើងថា ការរៀបចំកិច្ចប្រជុំក្នុងពេលនេះ គឺជាការបញ្ជាក់អោយឃើញពីការយកចិត្តទុកដាក់របស់អាជ្ញាធរ និងមន្ទីរអង្គភាពដែលពាក់ព័ន្ធ ក្នុងការគាំទ្រទៅលើសមភាពយេឌ័រ សមធម៌សង្គម និងបរិយាប័ន្ន ក៏ដូចជាការជួយគាំទ្រជួយដល់ស្ត្រី និងកុមារ ។
លោកស្រីអភិបាលរងខេត្ត ក៏បាន ថ្លែងអំណរគុណ និងការកោតសរសើរ ចំពោះការខិតខំប្រឹងប្រែងរួមចំណែកយ៉ាងសកម្មរបស់មន្ទីរ អង្គភាព អង្គការនានា ជាពិសេសមន្ទីរកិច្ចការនារីខេត្តសៀមរាប ដែលបានបន្តរៀបចំកិច្ចប្រជុំនេះឲ្យប្រព្រឹត្តទៅយ៉ាងរលូន ទោះបីជាមានបញ្ហាប្រឈមជាច្រើនចំពោះការងារនេះក៏ដោយ ។
លោកស្រីបន្តថា ជាមួយគ្នានោះលោកស្រីក៏បានអំពាវនាវដល់ភាគីពាក់ព័ន្ធទាំងអស់ សូមបន្តគាំទ្រដល់ការលើកកម្ពស់សមធម៌សង្គម និងបរិយាប័ន្នទាំងនៅថ្នាក់ខេត្ត ក្រុង ស្រុក និងជួយពង្រឹងកិច្ចទំនាក់ទំនងឱ្យកាន់តែប្រសើរ ក្នុងការជំរុញឱ្យការបញ្ជ្រាបយេនឌ័រ បរិយាប័ន្ន និងសមធម៌សង្គម ជាពិសេសការបង្កើនភាពអង់អាចដល់ស្ត្រី ដើម្បីធានាថាទាំងការអភិវឌ្ឍសមត្ថភាព និងការពិចារណាបានឲ្យគ្រប់ជ្រុងជ្រោយនៅពេលធ្វើការជ្រើសរើស ការតែតាំង ការលើកសរសើរ និងការតម្លើងឋានន្តរស័ក្តិធ្វើយ៉ាងណាឲ្យមានសមធម៌សង្គមផងដែរ ៕
អត្ថបទ និង រូបភាព ៖ ធន់ ពូថេ
