នារសៀលថ្ងៃទី២៦ ខែវិច្ឆិកា ឆ្នាំ២០១៩នេះ លោកជំទាវ កុយ សាលីណា ភរិយានាយឧត្តមសេនីយ៍ ខេង សុមេធ រួមទាំងបុត្រ-បុត្រធីតា ចៅៗ និងញាតិមិត្តមួយចំនួនទៀតបាននាំយកថវិកាចំនួន១០ម៉ឺនដុល្លារអាមេរិចដែលបានមកពីទឹកចិត្តនៃការចែករំលែកចេញពីចំណងដៃអាពាហ៍ពិពាហ៍របស់កូនប្រុសពៅ ឧបត្ថម្ភដល់មន្ទីរពេទ្យកុមារចំនួន២ក្នុងខេត្តសៀមរាប។
ក្នុងនោះ ថវិកាចំនួន ៥ម៉ឺនដុល្លារអាមេរិច ត្រូវបានឧបត្ថម្ភជូន មន្ទីរពេទ្យកុមារអង្គរ ក្រុងសៀមរាប និងចំនួន ៥ម៉ឺនដុល្លារអាមេរិចទៀត ឧបត្ថម្ភជូន មន្ទីរពេទ្យកុមារជ័យវរ្ម័នទី៧ ក្រុងសៀមរាប ដែលជាមន្ទីរពេទ្យគន្ធបុប្ផាទី៣ ដើម្បីចូលរួមទ្រទ្រង់ដល់កិច្ចដំណើរការ ថែទាំ ពិនិត្យ និងព្យាបាល សុខភាពកុមារកម្ពុជា ដោយមិនគិតថ្លៃ និងនិន្នាការអ្វីទាំងអស់។
ព្រះមហាវិមលធម្ម ពិន សែម សិរីសុវណ្ណោ ព្រះរាជាគណៈថ្នាក់ទោ សមាជិកថេរសភាសង្ឃនៃព្រះរាជាណាចក្រកម្ពុជា ព្រះគ្រូចៅអធិការវត្តរាជបូណ៌ (ក្រុងសៀមរាប) មានថេរដីការថា ទឹកចិត្តសទ្ធានៃសប្បុរសជន ជួយដល់មន្ទីរពេទ្យដែលកំពុងតែដំណើរការ ព្យាបាល សង្គ្រោះ អាយុជីវិតមនុស្ស វៀរចាកចេញពីរោគាព្យាធិ ឲ្យពេញបរិបូណ៌វិញនូវសុខភាព ឬក៏រួចផុតពីក្តីមរណៈបៀតបៀននោះ បុណ្យកុសលនេះគឺនឹង រាប់ទាំងបច្ចុប្បន្នជាតិ និងអនាគតជាតិ ជាបុគ្គលឬជាក្រុមដែលត្រូវទទួលបាននូវមហាកិត្តិយសដ៏ឧត្តុង្គឧត្តម ទាំងក្នុងផ្លូវលោក និងផ្លូវធម៌ ។
លោកជំទាវ កុយ សាលីណា បានលើកឡើងថា ទឹកចិត្តសប្បុរសនេះ ផ្តើមគំនិតចេញពីស្វាមីរបស់លោកជំទាវគឺ នាយឧត្តមសេនីយ៍ ខេង សុមេធ រួមទាំងមានការមូលមតិគ្នាក្នុងក្រុមគ្រួសារទាំងមូល ដោយការយល់ឃើញថា ប្រជាពលរដ្ឋធម្មតាដែលមិនមែនជាគ្រូពេទ្យ មិនអាចព្យាបាលជួយសង្គ្រោះជីវិត និងសុខភាពមនុស្សបានឡើយ ក៏ប៉ុន្តែសប្បុរសជនអាចជួយបាន តាមរយៈនៃចលនាសប្បុរសធម៌ បរិច្ចាគថវិកាជូនមន្ទីរពេទ្យ មានន័យថា សប្បុរសជនម្នាក់ គឺជាគ្រូពេទ្យម្នាក់។
បើតាមការឲ្យដឹងរបស់មន្ត្រីមន្ទីពេទ្យកុមារទាំង២ បានបញ្ជាក់ថា សម្រាប់មន្ទីរពេទ្យកុមារគន្ធបុប្ផា លោកជំទាវ កុយ សាលីណា និងក្រុមគ្រួសារ បានចូលរួមឧបត្ថម្ភចំនួន៣លើក រួមទាំងលើកនេះ និងមន្ទីរពេទ្យកុមារអង្គរ ចំនួន ២លើក ។
លោកសាស្ត្រាចារ្យរង ម៉ៅ សុខ អនុប្រធានទី២ មន្ទីរពេទ្យគន្ធបុប្ផាទី៣ ខេត្តសៀមរាប បង្ហាញនូវការកោតសរសើរដល់
នាយឧត្តមសេនីយ៍ ខេង សុមេធ និងលោកជំទាវ ព្រមទាំងក្រុមគ្រួសារ ដែលបានលើកកម្ពស់ការចូលរួមជួយកិច្ចការសង្គម ដែលនេះបង្ហាញឲ្យឃើញថា វប្បធម៌នៃការចែករំលែកជួយគ្នា កំពុងរីកដុះដាលក្នុងសង្គមជាតិ ៕
ចំណងដៃអាពាហ៍ពិពាហ៍ ១០ម៉ឺនដុល្លា ត្រូវបានបរិចា្ចគជូនមន្ទីរមន្ទីរពេទ្យកុមារ
ចំណងដៃអាពាហ៍ពិពាហ៍ ១០ម៉ឺនដុល្លា ត្រូវបានបរិចា្ចគជូនមន្ទីរមន្ទីរពេទ្យកុមារគន្ធបុប្ផា និងមន្ទីរពេទ្យកុមារអង្គរខេត្តសៀមរាប#ព័ត៌មានខេត្តសៀមរាប
Posted by ទូរទស្សន៍ជាតិខេត្តសៀមរាប – TV Siem Reap on Wednesday, November 27, 2019
អត្ថបទ និង រូបភាព ៖ លោក ងិន គឹមឡេង
កែសម្រួលអត្ថបទ ៖ លោក សេង ផល្លី
