នៅរាត្រីថ្ងៃទី២៦ ខែ វិច្ឆិកា ឆ្នាំ២០១៩ម្សិលមិញនេះ រដ្ឋបាលខេត្តសៀមរាប បានរៀបចំពិធីលៀងសាយភោជន៍ ទទួលស្វាគមន៍ដល់គណៈប្រតិភូថ្នាក់មេបញ្ជាការកងទ័ពជើងទឹកអាស៊ាន ក្រោយពី កិច្ចប្រជុំថ្នាក់មេបញ្ជាការកងទ័ពជើងទឹកអាស៊ានលើកទី១៣ បានដំណើរការ និងបញ្ចប់កិច្ចប្រជុំរបស់ខ្លួន ប្រកបដោយភាពជោគជ័យ។
ក្នុងពិធីលៀងសាយភោជន៍នាឱកាសនោះ ក្រោមវត្តមានដ៏ខ្ពង់ខ្ពស់ របស់សម្តេចពិជ័យសេនា ទៀ បាញ់ ឧបនាយករដ្ឋមន្ត្រីរដ្ឋ មន្ត្រីក្រសួងការពារជាតិ និងអញ្ជើញចូលរួមពីសំណាក់ឯកឧត្តម ទៀត សីហា អភិបាលខេត្តសៀមរាប និង លោកជំទាវផងដែរ។
មានប្រសាសន៍សំណេះសំណាលនាឱកាសនោះ ឯកឧត្តមនាយឧត្តមនាវី ទៀ វិញ អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងទ័ពជើងទឹក និង ជាអគ្គលេខាធិការនៃគណៈកម្មាធិការជាតិសន្តិសុខលំហសមុទ្រ បានថ្លែងអំណរគុណដល់ ចំពោះវត្តមានសម្តេចពិជ័យសេនា ទៀ បាញ់ និងឯកឧត្តមអភិបាលខេត្តសៀមរាប ក្នុងការទទួល ស្វាគមន៍ដល់គណៈប្រតិភូនាពេលនេះ។
ព័ត៌មានជាតិ ថ្មីៗ
ឯកឧត្តមនាយឧត្តមនាវី បានបញ្ជាក់ថា កិច្ចប្រជុំដ៏មានសារៈសំខាន់នេះ វាស្របទៅនឹងគោលដៅ ពិធីប្រារព្ធខួបលើកទី៥០ឆ្នាំ នៃការបង្កើតសមាគមប្រជាជាតិអាស៊ីអាគ្នេយ៍ ហៅកាត់ថា អាស៊ាន ដែលសមាជិកទាំងអស់បានខិតខំប្រឹងប្រែងរួមគ្នា ដើម្បីឈានទៅសម្រេចបាន នូវចក្ខុវិស័យសហគមន៍អាស៊ានឆ្នាំ២០២៥ តាមរយៈកិច្ចសហប្រតិបត្តិការឈ្នះ ឈ្នះ ជាមួយនឹងគោលការណ៍ជឿជាក់ ការគោរពផលប្រយោជន៍គ្នាទៅវិញទៅមក។
ឯកឧត្តម បានបញ្ជាក់បន្ថែមថា ដោយបណ្ដាប្រទេស នៃតំបន់អាស៊ីអាគ្នេយ៍ បានភ្ជាប់គ្នាដោយសមុទ្រ ខណៈតំបន់ប្រជុំកោះមួយចំនួន ខ្វះខាតហេដ្ឋារចនាសម្ព័ន្ធមូលដ្ឋានតភ្ជាប់គ្នា ដោយដីគោក។ ជាមួយនោះ អាស៊ីអាគ្នេយ៍ ស្ថិតនៅចំច្រកបំពង់ក ដែលភ្ជាប់រវាងមហាសមុទ្រឥណ្ឌា និង មហាសមុទ្រប៉ាស៊ីហ្វិក ទើបការដឹកជញ្ជូនតាមផ្លូវទឹកមានសារៈសំខាន់ពុំអាចខ្វះបាន ដែលជាអាយុជីវិតសម្រាប់ប្រទេសក្នុង តំបន់ និង ពិភពលោកផងដែរ។
ក្នុងន័យនេះ កិច្ចប្រជុំថ្នាក់មេបញ្ជាការកងទ័ពជើងទឹកអាស៊ានលើកទី១៣ ក្រោមប្រធានបទ “បង្កើនកិច្ចសហប្រតិបត្តិការ ដើម្បីសន្តិសុខសមុទ្រយូរអង្វែង“ ដែលបានបញ្ចប់ដោយផ្លែផ្កានេះ ជាមូលដ្ឋានគ្រឹះ នៃកិច្ចសហប្រតិបត្តិការល្អ ការរក្សាសន្តិភាព ស្ថិរភាពក្នុងតំបន់ ជំរុញកិច្ចទំនាក់ទំនងគ្នាឲ្យកាន់តែរឹងមាំ ការយោគយល់គ្នារវាងកងទ័ព ជើងទឹកអាស៊ាន និងឈរលើគោលការណ៍ នៃការមិនជ្រៀតជ្រែកកិច្ចការផ្ទៃក្នុង ការគោរពឯករាជ្យភាព អធិបតេយ្យភាព គោរពគ្នាទៅវិញទៅមក ។
គួរជម្រាបថា កិច្ចប្រជុំថ្នាក់មេបញ្ជាការកងទ័ពជើងទឹកអាស៊ានលើកទី១៤នៅឆ្នាំបន្ត នឹងត្រូវរៀបចំនៅប្រទេសវៀតណាម។
រដ្ឋបាលខេត្តសៀមរាប រៀបចំពិធីលៀងសាយភោជន៍ ស្វាគមន៍គណៈប្រតិភូថ្នាក់
រដ្ឋបាលខេត្តសៀមរាប រៀបចំពិធីលៀងសាយភោជន៍ ស្វាគមន៍គណៈប្រតិភូថ្នាក់មេបញ្ជាការកងទ័ពជើងទឹកអាស៊ាន#ព័ត៌មានខេត្តសៀមរាប
Posted by ទូរទស្សន៍ជាតិខេត្តសៀមរាប – TV Siem Reap on Wednesday, November 27, 2019
អត្ថបទ និង រូបភាព ៖ លោក ម៉ី សុខារិទ្ធ
កែសម្រួលអត្ថបទ ៖ លោក សេង ផល្លី
