បាញ់ប្រហារទៅលើស្ត្រី ២នាក់ នៅសាលារៀនក្នុងរដ្ឋ វ៉ាស៊ីនតោន ចុងក្រោយខ្មាន់កាំភ្លើងបាញ់សម្លាប់ខ្លួន

យោងតាមការិយាល័យប៉ូលីសតំបន់ Clark County បាននិយាយថា វាគឺជាការវាយប្រហារដែលត្រូវបានកំណត់គោលដៅ ហើយអ្នកបាញ់ទើបត្រូវបាន ដោះលែងពីពន្ធនាគារ ដែលជាប់ចោទពីបទ ប្រើអំពើហឹង្សាក្នុងគ្រួសារ។

យោងតាមសារព័ត៌មាន Sputnik ចេញផ្សាយនៅថ្ងៃទី២៧ ខែវិច្ឆិកា ឆ្នាំ២០១៩ បានឱ្យដឹងថា នៅក្នុងសេចក្តីថ្លែងការណ៍មួយ កាលពីល្ងាចថ្ងៃអង្គារថា បុរសម្នាក់បានបាញ់ទៅលើស្ត្រីពីរនាក់ នៅឯចំណតរថយន្ត ក្នុងសាលា Sarah J. Anderson Elementary ទីក្រុង Vancouver រដ្ឋ វ៉ាស៊ីនតោន ។ការិយាល័យប៉ូលីសបាននិយាយថា នៅទីបំផុតជនសង្ស័យបានឈប់នៅ Padden Parkway និង Andresen Road ហើយបានបាញ់សម្លាប់ខ្លួនឯង។ ករណីនេះគឺកំពុងឋិតក្នុងដំណើរការស៊ើបអង្កេត។

សូមបញ្ជាក់ថា ការបាញ់ប្រហារនេះ វាមិនមែនជាឧប្បត្តិហេតុដំបូង នៃប្រភេទនេះនោះទេ ហើយសហរដ្ឋអាមេរិក ក៍មានការរញ្ជួយចិត្តជាខ្លាំងព្រោះ ការបាញ់ប្រហារ នៅតាមសាលារៀន និងកន្លែងសាធារណៈនាពេលថ្មីៗនេះចំពេលមានការ អំពាវនាវជាសាធារណៈ ឱ្យអាជ្ញាធររឹតបន្តឹងច្បាប់កាំភ្លើង៕