នៅសណ្ឋាគារ Angkor Paradise ខេត្តសៀមរាប រដ្ឋបាលជលផលនៃក្រសួងកសិកម្ម រុក្ខាប្រមាញ់ និងនេសាទ សហការជាមួយក្រុមការងារលេខាធិការដ្ឋានផែនការថ្នាក់តំបន់ ដែលមានទីស្នាក់ការនៅទីក្រុង Jarkarata ប្រទេស Indonesia បានរៀបចំកិច្ចប្រជុំថ្នាក់តំបន់លើកទី១២ ស្តីពីការបង្ការ ទប់ស្កាត់ និងលុបបំបាត់ការនេសាទខុសច្បាប់ គ្មានបាយការណ៍និងគ្មានការអនុញ្ញាត (IUU ) ក្នុងរយៈពេល៣ថ្ងៃ ដោយចាប់ផ្តើមពីថ្ងៃទី២៦ ដល់ថ្ងៃទី២៨ ខែវិច្ឆិកា ឆ្នាំ២០១៩ ដោយមានការចូលរួមពីបណ្តាប្រទេសជាសមាជិកចំនួន១១ប្រទេស ក្នុងនោះ ប្រទេសជាសមាជិកអាស៊ានចំនួន៩ , ប្រទេសប៉ាពូញូគីនា និងប្រទេសអូស្ត្រាលី ព្រមទាំងមានការចូលរួមពីអង្គការអន្តរជាតិពាក់ព័ន្ធនានាផងដែរ។
កិច្ចប្រជុំនេះធ្វើឡើងដើម្បី ៖ ទី១- ពិនិត្យអំពីវឌ្ឍនភាពនៃការអនុវត្តផែនការសកម្មភាពថ្នាក់តំបន់ស្តីពីការបង្ការ ទប់ស្កាត់ និងលុបបំបាត់ការនេសាទខុសច្បាប់ គ្មានរបាយការណ៏ និងគ្មានការអនុញ្ញាត (RPOA-IUU) ឆ្នាំ២០១៩ , ទី២- ពិភាក្សាអំពីបញ្ហាប្រឈមដែលបណ្តាប្រទេសជាសមាជិកជួបប្រទះក្នុងអនុវត្តផែនការថ្នាក់តំបន់ (RPOA) ស្តីពីការបង្ការ ទប់ស្កាត់ និងលុបបំបាត់ការនេសាទខុសច្បាប់ គ្មានរបាយការណ៏ និងគ្មានការអនុញ្ញាត (LU) និង ទី៣- រៀបចំផែនការសកម្មភាពថ្នាក់តំបន់ (RPOA) ស្តីពីការបង្ការ ទប់ស្កាត់ និងលុបបំបាត់ការនេសាទខុសច្បាប់ គ្មានរបាយការណ៍ និងគ្មានការអនុញ្ញាត (IUD) សម្រាប់អនុវត្តឆ្នាំ២០២០។
ឯកឧត្តម នុត ច័ន្ទសុខា រដ្ឋលេខាធិការប្រចាំ ក្រសួងកសិកម្ម រុក្ខាប្រមាញ់ និងនេសាទ ក្នុងនាម ឯកឧត្តមរដ្ឋមន្ត្រី វេងសាខុន រដ្ឋមន្ត្រីក្រសួងរុក្ខាប្រមាញ់និងនេសាទ បានមានប្រសាសន៍ថា រាជរដ្ឋាភិបាលកម្ពុជា បានផ្តល់ការយល់លើកិច្ចព្រមព្រៀង ស្តីពីផលស្តុកត្រីផ្លាស់ទីមធ្យម និងផលស្តុកត្រីផ្លាស់ទីឆ្ងាយ ខណៈបច្ចុប្បន្នសេចក្តីព្រាងច្បាប់ ស្តីពីការអនុម័តយល់ព្រមឱ្យព្រះរាជាណាចក្រកម្ពុជា ចូលជាសមាជិកនៃកិច្ចព្រមព្រៀងសម្រាប់អនុវត្តបទបញ្ញត្តិនៃអនុសញ្ញាសហប្រជាជាតិស្តីពីច្បាប់សមុទ្រ ចុះថ្ងៃទី១០ ខែធ្នូ ឆ្នាំ១៩៨២ ទាក់ទងនឹងការគ្រប់គ្រង និងអភិរក្សផលស្តុកត្រីផ្លាស់ទីមធ្យម និងផលស្តុកត្រីផ្លាស់ទីឆ្ងាយ បាននឹងកំពុងដំណើរតាមនិតិវិធីច្បាប់នៃព្រះរាជាណាចក្រកម្ពុជា ហើយបច្ចុប្បន្ន កិច្ចព្រមព្រៀង ស្តីពីវិធានការរដ្ឋម្ចាស់កំពង់ ត្រូវបានបញ្ជូនទៅតំកល់ទុកនៅលេខាធិការដ្ឋានរបស់អង្គការស្បៀង និងកសិកម្មសហប្រជាជាតិ នៅទីក្រុងរ៉ូម ប្រទេស អ៊ុតាលី ។
ឯកឧត្តម នុត ច័ន្ទសុខា មានប្រសាសន៍បន្ថែមថា បច្ចុប្បន្ននេះ កិច្ចការមួយចំនួនដែលក្រសួងកសិកម្ម រុក្ខាប្រមាញ់ និងនេសាទ បាននឹងកំពុងដំណើរការរៀបចំ រួមមាន ៖ ១- កំពុងរៀបចំកែសម្រួលច្បាប់ ស្តីពីជលផល , ២- រៀបចំផែនការសកម្មភាពជាតិពាក់ព័ន្ធនឹងការបង្ខារ ទប់ស្កាត់ និងលុបបំបាត់ការនេសាទខុសច្បាប់ គ្មានរបាយការណ៍ និងគ្មានការអនុញ្ញាត (IUU) ដែលនឹងត្រូវចុះហត្ថលេខាដោយសម្តេចតេជោ ហ៊ុនសែន នាយករដ្ឋមន្ត្រីនៃកម្ពុជា និង ៣- កំពុងរៀបចំផែនការជាតិត្រួតពិនិត្យ និងអធិការកិច្ច ដែលនឹងត្រូវចុះហត្ថលេខាដោយ ឯកឧត្តមរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ។
ក្នុងឱកាសនោះដែរ ឯកឧត្តម នុត ច័ន្ទសុខា បានសំណូមពរដល់សមាជិកសមាជិកាក្នុងកិច្ចប្រជុំ ជាពិសេស បណ្តាប្រទេសជាសមាជិកចូលរួមសហការគ្នាឱ្យជិតស្និត និងទទួលខុសត្រូវខ្ពស់ទាក់ទងទៅនិងការបង្ការ ទប់ស្កាត់ និងលុបបំបាត់ការនេសាទខុសច្បាប់ គ្មានរបាយការណ៏ និងគ្មានការអនុញ្ញាត (IUU) ហើយដៃគួរអភិវឌ្ឍន៍ និងបណ្តាប្រទេសដែលពាក់ព័ន្ធ បន្តជួយឧបត្ថម្ភទាំងថវិកា និងបច្ចេកទេសដល់បណ្តាប្រទេសជាសមាជិក ៕
អត្ថបទ និង រូបថត ៖ លោក យូ វង្ស និង លោក ស៊ាន សុផាត
កែសម្រួលអត្ថបទ ៖ លោក លីវ សាន្ត
